Matej

13 Ko adava dive o Isus iklilo taro kher hem bešlja uzo more. 2 A okolu leste khedingje pe doborom but manuša so ov uklilo hem bešlja ko jekh čamco, a sa o manuša tergjona sine uzo more. 3 Tegani ov počmingja te sikavel len but bukja agjaar so koristingja sporedbe, hem vakergja: „Jekh manuš iklilo te frdel seme ki niva. 4 Džikote frdela sine, nesavo seme pelo uzo drumo, hem ale o čirikle hem hale le. 5 A nesavo seme pelo ko than kote so sine but bara, a na sine dovolno phuv. Hem adaleske so i phuv na sine hor, ov odma počmingja te bajrol. 6 Ama keda iklilo o kham ov thargja le, hem adaleske so na sine le koreno, šukilo. 7 A javer seme pelo maškar o kare, hem o kare barile hem zagušingje le. 8 A javer seme pelo ki šukar phuv hem počmingja te del plodi but puti poviše taro adava so sine sejmo — nesavo 100, javer 60, a javer 30 puti poviše. 9 Kas isi kana neka šunel“.

10 Tegani o učenikija ale ki leste hem pučle le: „Soske koristinea sporedbe džikote sikavea len?“ 11 Ov odgovoringja lenge: „Tumenge tano dendo te haljoven e Devleskere tajne* bašo nebesno Carstvo, ama lenge nane dendo. 12 Soske kas isi, ka del pe leske panda hem ka ovel le but poviše, a kas nane, ka lel pe lestar čak adava so isi le. 13 Adaleske sikavava len agjaar so koristinava sporedbe, soske ola dikhena ama sar te phene na dikhena, ola šunena ama sar te phene na šunena hem ni na haljovena adava. 14 Upri lende ispolninela pe o proroštvo taro Isaija, so vakerela: ’Ka šunen ama nane te haljoven, hem ka dikhen ama sar te phene na dikhle. 15 Soske o vilo akale manušengoro ulo zoralo sar bar hem kergje pe kašuke hem phanle pumare jakhja, te šaj ola nikogaš te na dikhen pumare jakhencar, te na šunen pumare kanencar, te na haljoven pumare vilencar hem te na iranen pe ki mande te šaj te sasljarav len‘.

16 Ama srekjna tane tumare jakhja soske dikhena hem tumare kana soske šunena. 17 Soske čače vakerava tumenge, but prorokija hem pravedna manuša mangle te dikhen adava so tumen dikhena, ama na dikhle, hem te šunen adava so tumen šunena, ama na šungje.

18 Akana šunen so značinela i sporedba bašo manuš so frdela seme ki niva. 19 Ko sekova manuš so šunela o haberi bašo Carstvo ama na haljovela le, avela o Beng hem lela lestar adava so sine leske sejmo ko vilo. Akava tano o seme so pelo uzo drumo. 20 A o seme so pelo ko than kote so sine but bara, tano okova so šunela o haberi hem odma radosno prifatinela le. 21 Ama adaleske so nane le koreno, ov ikerela pe nesavo vreme, ama keda avela i nevolja ili o progonstvo bašo haberi, ov odma perela. 22 A o seme so pelo maškar o kare tano adava so šunela o haberi, ama o sekiracie taro životo ko akava sveto* hem o barvalipe so hovavela, zagušinena o haberi hem ov na dela plodi. 23 A o seme so pelo ki šukar phuv tano okova so šunela o haberi hem haljovela le. Hem ov dela plodi but poviše taro adava so sine sejmo — nesavo 100, javer 60, a javer 30 puti poviše“.

24 Vakergja lenge panda jekh sporedba: „O nebesno Carstvo tano sar jekh manuš so sadingja šukar seme ki pli niva. 25 Džikote sarine sovena sine, alo leskoro dušmani hem sadingja divo čar* maškar o giv hem gelo peske. 26 Keda o steblo počmingja te bajrol hem te del plodi, počmingja te dikhjol i divo čar da. 27 Tegani o robija adale manušeskere ale hem vakergje leske: ’Gospodare, na sadingjan li šukar seme ki tli niva? Tegani kotar akaja divo čar?‘ 28 A ov vakergja lenge: ’Jekh dušmani kergja akava‘. Tegani o robija pučle le: ’Mangea li te dža hem te ikala i divo čar?‘ 29 Ov vakergja lenge: ’Na, soske džikote ikalena i divo čar, ka ikalen o giv da. 30 Mukhen solduj zaedno te bajron dži ki žetva, a keda ka avel o vreme e žetvakoro ka vakerav okolenge so khedena i žetva: prvo kheden i divo čar te šaj te tharen la, a palo adava kheden o giv ko mlo ambari‘“.*

31 Vakergja lenge panda jekh sporedba: „O nebesno Carstvo tano sar jekh seme taro sinap,* kova so o manuš lelja hem sadingja le ki pli niva. 32 Ov tano ustvari o najtikno seme taro sa o javera, ama keda bajrola ov ovela o najbaro rastenie taro sa o javera hem ovela kaš. A o ptice so letinena ko nebo, avena hem kerena gnezdo ko leskere granke“.

33 Vakergja lenge panda jekh sporedba: „O nebesno Carstvo tano sar kvasaco kova so jekh džuvli lelja hem mešingja le ko 10 kile varo, hem agjaar celo humer ušlilo“.

34 O Isus sikavgja sa akala bukja e manušen agjaar so koristinela sine sporedbe. Bizo sporedbe na sikavela len sine, 35 te šaj te ispolninel pe adava so sine vakerdo preku o proroko: „Ka koristinav sporedbe te šaj te sikavav, ka objavinav adava so sine garavdo panda taro početok“.*

36 Otkeda mukhlja e manušen te džan peske, o Isus khuvgja ko kher. Leskere učenikija ale ki leste hem vakergje leske: „Objasnin amenge i sporedba baši divo čar ki niva“. 37 Ov vakergja lenge: „O manuš so sejnela o šukar seme, tano o manušikano Čhavo,* 38 i niva tani o sveto, o šukar seme tane o čhave e Carstvoskere, a i divo čar tane o čhave e Bengeskere,* 39 a o dušmani so sadingja i divo čar tano o Beng. I žetva tani o posledna dive akale svetoskere,* a okola so khedena i žetva tane o angelija. 40 Znači sar so khedela pe i divo čar hem tharela pe, agjaar ka ovel ko posledna dive akale svetoskere.* 41 O manušikano Čhavo ka bičhalel ple angelen hem ola ka ciden taro leskoro Carstvo sa okolen so kerena o javera te grešinen hem so kerena lošna bukja, 42 hem ka frden len ki jagali pečka. Adathe ka roven hem ka krcinen pumare dandencar. 43 Tegani o pravednikija ka svetinen sar kham ko Carstvo pumare Dadeskoro. Kas isi kana neka šunel.

44 O nebesno Carstvo tano sar barvalipe soj tano garavdo ki niva, kova so jekh manuš arakhlja le hem garavgja le. Adaleske so sine but radosno ov gelo, bikingja sa so sine le hem kingja adaja niva.

45 Isto agjaar o nebesno Carstvo tano sar jekh trgovco so patujnela hem rodela šuže biserija. 46 Samo so arakhela jekh skupo biseri, ov džala hem odma bikinela sa so isi le hem kinela adava biseri.

47 O nebesno Carstvo isto agjaar tano sar jekh mreža so frdela pe ko more hem laja astarena pe razna mačhe. 48 Keda phergjola i mreža, ikalena la ko brego, tegani bešena hem khedena o šukar mačhe ko korpe, a okola so našti te han pe frdena len. 49 Agjaar ka ovel ko posledna dive akale svetoskere.* O angelija ka aven hem ka odvinen e lošna manušen taro pravedna 50 hem ka frden len ki jagali pečka. Adathe ola ka roven hem ka krcinen pumare dandencar.

51 Dali halilen sa akala bukja?“ Ola vakergje leske: „Oja“. 52 Tegani ov vakergja lenge: „Adaleske so halilen akala bukja, džanen kaj sekova učiteli so siklilo bašo nebesno Carstvo tano sar jekh manuš, jekh domakjini, kova so taro plo than kote so garavela o barvalipe, ikalela hem o neve bukja hem o purane bukja“.

53 Otkeda o Isus vakergja akala sporedbe, gelo peske adathar. 54 Otkeda gelo ki pli diz, počmingja te sikavel len ki lengiri sinagoga,* a o manuša sine vooduševime hem vakergje: „Kotar akale manušeske akaja mudrost hem i sila te kerel akala čudija? 55 Nane li akava e stolareskoro čhavo? Nane li leskiri daj i Marija hem leskere phralja o Jakov, o Josif, o Simon hem o Juda? 56 Hem o phenja leskere, na živinena li akate amencar? Tegani, kotar leske sa akava?“ 57 Adaleske na mangle te verujnen ki leste. Ama o Isus vakergja lenge: „E proroko poštujnena le segde, osven ki pli diz hem ko plo kher“. 58 Hem adaleske so na sine len vera ov na kergja but čudija ko adava than.