LEKCIJA 17

Savo tano o Isus?

Pečatimo izdanie

Keda sikljovaja bašo bukja so vakergja hem so kergja o Isus ki Phuv, ka dikha osobine kola so ka keren te manga te ova lea popaše hem leskere Dadea, e Jehovaja. Kola tane nesave taro adala šuže osobine hem sar šaj amen da te sikava len ko amaro životo?

1. Ki koja smisla o Isus tano sar plo Dad?

O Isus ko nebo sine zaedno ple Dadea hem but milijarde berša siklilo lestar. Adaleske ov razmislinela, osetinela hem postapinela sar plo Dad. (Čitin Jovan 5:19.) Ustvari, o Isus doborom šukar sikavela ple Dadeskere osobine so vakergja: „Koj dikhlja ma man, dikhlja me Dade da“ (Jovan 14:9). Kobor poviše ka sikljove bašo adava savo tano o Isus, doborom pošukar ka zapoznajne e Jehova. Na primer, adava sar o Isus grižingja pe e manušenge, sikavela kobor o Jehova grižinela pe tuke.

2. Sar o Isus sikavgja kaj mangela e Jehova?

O Isus vakergja: „Te šaj o sveto te džanel kaj mangava e Dade, adaleske kerava agjaar sar so zapovedingja mange o Dad te kerav“ (Jovan 14:31). Džikote sine ki Phuv, o Isus sikavgja kaj but mangela ple Dade agjaar so sine leske poslušno, čak keda sine pharo. Isto agjaar, adaleske so o Isus but mangela sine ple Dade ov sekogaš mangela sine te kerel lafi baši leste hem te pomožinel e javerenge da te oven paše amala lea (Jovan 14:23).

3. Sar o Isus sikavgja kaj mangela e manušen?

I Biblija vakerela kaj o Isus but mangela e manušen hem kaj ola sekogaš sine leskoro posebno bahtalipe (Izreki 8:31). Ov sikavgja plo mangipe agjaar so ohrabringja hem nesebično pomožingja e manušenge. O čudija so kergja na sikavgje samo leskiri mokj, nego hem leskoro sočuvstvo (Marko 1:40-42). Ov ponašingja pe ljubezno sekole jekhea hem na sine le predrasude sprema nikaste. Leskere lafija utešingje hem dengje nadež sa e iskrena manušenge so šungje le. Adaleske so mangela sine e manušen o Isus sine spremno te cidel muke hem te merel. Ama, ov posebno mangela okolen so ikerena pe ko leskere sikljojba. (Čitin Jovan 15:13, 14.)

DOZNAJN POVIŠE

Sikljov poviše bašo e Isuseskere osobine hem dikh sar šaj tu da te sikave mangipe hem te ove darežlivo sar leste.

4. O Isus mangela ple Dade

O Isus ple primerea sikavgja sar te sikava amaro mangipe e Devleske. Čitin Luka 6:12 hem Jovan 15:10; 17:26. Palo sekova stiho, keren lafi bašo akava pučibe:

Sar šaj te dža palo e Isuseskoro primer hem te sikava kaj mangaja e Jehova?

O Isus molinela pe. — O Isus mangela sine ple Dade soj ko nebo hem but puti kerela sine lea lafi ki molitva

5. O Isus grižinela pe e javerenge

O Isus poviše grižingja pe e javerenge nego peske. Čak keda sine umorno ov trošinela sine plo vreme hem pli sila te pomožinel e manušenge. Čitin Marko 6:30-44, a palo adava keren lafi bašo akala pučiba:

Ko kola načinija o Isus sikavgja kaj grižinela pe e javerenge? (Dikh o stihija 31, 34, 41 hem 42.)
So pottikningja e Isuse te pomožinel e manušenge? (Dikh o stiho 34.)
Adaleske so o Isus sikavela ple Dadeskere osobine, so sikljovaja bašo Jehova taro akava izveštaj?
Ko kola načinija šaj te dža palo e Isuseskoro primer hem te sikava kaj grižinaja amen e javerenge?

O Isus čudoja parvargja milje manušen pandže marencar hem duje tikne mačhencar. O učenikija delinena i hrana e muršenge, e džuvlenge hem e čhavenge.

6. O Isus tano darežlivo

Iako na sine le but materijalna bukja, o Isus sine darežlivo hem pottikningja amen da te ova darežliva. Čitin Dela 20:35, a palo adava keren lafi bašo akava pučibe:

Sprema e Isuseskere lafija, so ka kerel amen bahtale?

Dikh o VIDEOKLIPI, a palo adava keren lafi bašo akava pučibe:

VIDEOKLIPI: „Poviše isi bahtalipe keda dela pe“ — izvadok (4:00)

Ko kola načinija šaj te da, čak ako nane amen but?

Dali džanljan?

I Biblija sikavela amen te molina amen e Jehovaske ko e Isuseskoro anav. (Čitin Jovan 16:23, 24.) Keda molinaja amen agjaar, amen sikavaja kaj siem blagodarna bašo sa so kergja o Isus te šaj te ova paše amala e Jehovaja.

NESAVE ŠAJ VAKERENA: „O Devel na grižinela pe amenge keda cidaja muke“.