Savo tano o Jehova?

Sar zamislinea tuke e Jehova e Devle? Nesave manuša mislinena kaj o Devel tano but baro adaleske amen sar manuša našti nikogaš te ova lea paše. A javera mislinena kaj o Devel tano samo jekh bari sila, sar jekh gromi, ama nane le osobine sar jekh ličnost. Ama, savo čače tano o Jehova? Preku plo Lafi, i Biblija, o Jehova sikavela amenge nesave taro ple osobine, hem isto agjaar vakerela amenge kaj mangela amen hem kaj grižinela pe amenge.

1. Soske našti te dikha e Devle?

„O Devel tano Duho“ (Jovan 4:24). E Jehova nane le telo sar e manušengoro. Ov tano Duho so živinela ko nebo, ko than kova so amen našti te dikha le.

2. Kola tane nesave taro e Jehovaskere osobine?

Iako našti te dikha e Jehova, sepak šaj te zapoznajna le. Ustvari, kobor poviše ka zapoznajna leskere but šuže osobine, doborom poviše ka bajrol amaro mangipe sprema leste. I Biblija vakerela: „O Jehova mangela i pravda hem nane te mukhel okolen soj tane leske verna“ (Psalm 37:28). Isto agjaar, ov „tano pherdo sočuvstvo hem milost“, posebno sprema okola so cidena muke (Jakov 5:11). „O Jehova tano paše uzo adala soj phage vilea hem spasinela adalen soj phage duhoja“ (Psalm 34:18). Dali džanljan kaj amare postapke vlijajnena upro adava sar osetinela pe o Jehova? Keda nekoj kerela lošna bukja, o Jehova tano razočarimo hem tažno (Psalm 78:40, 41). Ama, keda nekoj postapinela ispravno, o Jehova tano bahtalo. (Čitin Izreki 27:11.)

3. Sar o Jehova sikavela kaj mangela amen?

E Jehovaskiri najbari osobina tani o mangipe. Ustvari, i Biblija vakerela: „O Devel tano mangipe“ (1. Jovanovo 4:8). O Jehova sikavela plo mangipe, na samo preku i Biblija, nego hem preku o bukja so stvoringja len. (Čitin Dela 14:17.) Na primer, razmislin bašo adava sar siem stvorime. O Jehova dengja amen i sposobnost te dikha but šuže boe, te šuna šuži muzika hem te uživina ki vkusno hrana. Ov mangela te uživina ko životo.

DOZNAJN POVIŠE

4. O sveti duh — e Devleskiri aktivno sila

Isto sar o manuš so koristinela ple vasta te kerel nesavi buti, agjaar o Jehova koristinela plo sveti duh. I Biblija sikavela kaj o sveti duh nane ličnost, nego i sila so koristinela o Devel te kerel o bukja so mangela. Čitin Luka 11:13 hem Dela 2:17, a palo adava keren lafi bašo akala pučiba:

• I Biblija vakerela kaj o Devel dela plo sveti duh e manušenge. Sprema akava, dali o sveti duh šaj te ovel ličnost? Soske mislinea agjaar?

O Jehova koristingja plo sveti duh te šaj te kerel bare hem but šuže bukja. Čitin Psalm 33:6 hem 2. Petrovo 1:20, 21, a palo adava keren lafi bašo akava pučibe:

• Ko kola načinija o Jehova koristingja plo sveti duh?

5. E Jehova isi le but šuže osobine

Iako o Mojsej sine e Devleskoro verno sluga, sepak ov manglja panda pošukar te pendžarel ple Stvoritele. Adaleske, o Mojsej vakergja leske: „Vaker mange... bašo tle drumija, te šaj te pendžarav tut“ (2. Mojseeva 33:13). A o Jehova vakergja leske save osobine isi le. Čitin 2. Mojseeva 34:4-6, a palo adava keren lafi bašo akala pučiba:

• Kola taro ple osobine o Jehova vakergja e Mojseeske?

• Kola taro e Jehovaskere osobine posebno svidžinena pe tuke?

6. O Jehova grižinela pe e manušenge

O Evreija, kola so sine e Devleskoro narodo, sine robija ko Egipet. Sar osetinela pe sine o Jehova keda ola cidena sine muke? Šun i AUDIOSNIMKA ili čitin 2. Mojseeva 3:1-10. Palo adava, keren lafi bašo akava.

AUDIOSNIMKA: E Jehovaske sine žal keda dikhela sine sar cidena muke (2:45)

• So sikljovaja taro akava izveštaj bašo adava sar osetinela pe o Jehova keda o manuša cidena muke? (Dikh o stihija 7 hem 8.)

• So mislinea, dali o Jehova čače mangela te pomožinel e manušenge, hem dali isi le i mokj te kerel adava? Soske mislinea agjaar?

7. E Jehovaskere osobine dikhjona ki priroda

O Jehova sikavela ple osobine preku o bukja so stvoringja len. Dikh o VIDEOKLIPI. Palo adava čitin Rimjanite 1:20, hem keren lafi bašo akava pučibe:

VIDEOKLIPI: O stvorime bukja sikavena e Jehovaskoro mangipe — o manušikano telo (1:57)

• Kola e Jehovaskere osobine dikhea ko bukja so stvoringja len?

SO SIKLILEM

E Jehova našti te dikha le soske ov tano Duho. Le isi le but šuže osobine, a i najbari tani o mangipe.

Sar ka odgovorine?

• Soske našti te dikha e Jehova?

• Soj tano o sveti duh?

• Kola tane nesave taro e Jehovaskere osobine?

ISTRAŽIN

Sikljov poviše taro e Devleskere štar glavna osobine.

„Kakov e Bog?“ (Stražarska kula br. 1, 2019)

Dikh nesave dokazija kaj o Jehova nane prisutno segde hem ko sa.

„Dali o Devel tano prisutno segde hem ko sa?“ (internet statija)

Dikh soske i Biblija bašo sveti duh vakerela kaj tano e Devleskere vasta.

„Soj tano o sveti duh?“ (internet statija)

Jekhe korole manušeske sine pharo te verujnel kaj o Devel mangela le. Dikh so pomožingja leske te meninel plo mislenje.

„Sega možam da im pomagam na drugite“ (Stražarska kula taro 1 oktomvri 2015)