O Jehova tano Devel kova so mangela o redo (1. Korinkjanite 14:33). Adaleske, leskoro narodo tano šukar organizirimo. Sar tano organizirimo o hristijansko sobranie? So šaj amen te kera te šaj te ikerel pe o redo hem o mir ko sobranie?

1. Koj vodinela o sobranie?

O Hristos tano poglavari ko sobranie (Efešanite 5:23). Taro nebo ov vodinela e Jehovaskere narodo ko celo sveto. O Isus postavingja jekh tikni grupa taro zrela starešine te služinen sar „verno hem razborito robo“. Akaja grupa tani isto agjaar pendžardi sar Vodečko telo. (Čitin Matej 24:45-47.) O Vodečko telo dela upatstvija sa e sobranienge ko celo sveto, isto sar so kerena sine adava o apostolija hem o starešine ko Erusalim taro prvo veko (Dela 15:2). Ama, akala manuša nane amare vodačija. Ola čitinena i Biblija te šaj te džanen so mangela o Jehova te keren hem isto agjaar tane poslušna ko e Isuseskere upatstvija.

2. Koja tani i uloga e starešinengiri ko sobranie?

O starešine tane zrela hristijanska murša kola so sikavena tari Biblija hem grižinena pe e Jehovaskere narodoske agjaar so pomožinena hem ohrabrinena len. Ola na dobinena pare bašo adava so kerena. Namesto adava, ola služinena „dobrovolno sar so mangela o Devel; na alčna te šaj te dobinen nešto, nego celo vilea“ (1. Petrovo 5:1, 2). O sluga-pomošnikija tane murša ko sobranie kola so pomožinena e starešinenge. Palo nesavo vreme, ola šaj te pheren o uslovija te služinen sar starešine.

O Vodečko telo postavinela nesave starešinen te služinen sar pokrainska nadglednikija. Akala nadglednikija posetinena različna sobranija te den upatstvija hem te ohrabrinen e phralen hem e phenjen. Ola isto agjaar imenujnena e phralen so ispolninena o uslovija te služinen sar starešine hem sluga-pomošnikija (1. Timotej 3:1-10, 12; Tit 1:5-9).

3. Koja uloga isi sekole Jehovaskere svedoko?

Sarine ko sobranie falinena e Jehovaskoro anav adalea so učestvujnena ko sostanokija hem propovedinena kobor so šaj sprema ple okolnostija. (Čitin Psalm 148:12, 13.)

DOZNAJN POVIŠE

4. O Isus tano grižlivo vodači

O Isus dela amen jekh but šuži pokana. Čitin Matej 11:28-30, a palo adava keren lafi bašo akava pučibe:

• Savo vodači tano o Isus hem sar ov mangela te osetina amen džikote vodinela amen?

VIDEOKLIPI: O starešine sigate reagiringje palo zemjotres ko Nepal (4:56)

I Biblija jasno sikavela sar valjani o starešine te keren pumari zadača.

Čitin Isaija 32:2 hem 1. Petrovo 5:1-3, a palo adava keren lafi bašo akala pučiba:

• Sar osetinea tut keda džanea kaj o starešine, isto sar o Isus, grižinena pe e javerenge?

• Ko kola javera da načinija o starešine džana palo e Isuseskoro primer?

5. O starešine dena šukar primer

VIDEOKLIPI: O starešine valjani te predvodinen! (7:39)

O Isus objasningja sar valjani te ponašinen pe o starešine. Čitin Matej 23:8-12, a palo adava keren lafi bašo akala pučiba:

• So vakerela i Biblija bašo adava sar valjani te ponašinen pe o starešine? So mislinea, dali o religiozna vodačija ikerena pe ko adava?

1. 1. O starešine trudinena pe te šaj ola hem lengere familie te ačhoven duhovno zorale

2. 2. O starešine grižinena pe sarinenge ko sobranie

3. 3. O starešine redovno propovedinena

4. 4. O starešine tane učitelija. Ola isto agjaar pomožinena ko čistibe hem ko javera bukja

6. Amen šaj te sorabotina e starešinencar

Ki Biblija pišinela jekh važno pričina soske te sorabotina e starešinencar. Čitin Evreite 13:17, a palo adava keren lafi bašo akava pučibe:

• So mislinea, soske i Biblija ohrabrinela amen te ova poslušna hem podložna okolenge so predvodinena?

Čitin Luka 16:10, a palo adava keren lafi bašo akava pučibe:

• Soske valjani sekogaš te ova poslušna e starešinenge, čak ko nesave bukja kolenge so mislinaja kaj nane doborom važno?

SO SIKLILEM

O Isus tano poglavari ko sobranie, a o starešine tane podložna leske. Amen spremno sorabotinaja lencar soske ola grižinena pe amenge hem dena amen šukar primer.

Sar ka odgovorine?

• Koj tano poglavari ko sobranie?

• Sar o starešine pomožinena ko sobranie?

• Koja uloga isi sekole Jehovaskere svedoko?

ISTRAŽIN

Dikh jekh primer bašo adava kobor o Vodečko telo hem o javera starešine grižinena pe bašo o phralja hem o phenja.

Te zajaknina e phralen kote so amare aktivnostija tane zabranime (4:22)

Doznajn poviše bašo adava so kerena o pokrainska nadglednikija.

O životo e pokrainsko nadglednikoskoro ko izolirime thana (4:51)

Čitin bašo adava savi uloga isi e džuvlen ko sobranie.

„Dali kaj Jehovinite svedoci i ženite služat kako propovednici?“ (Stražarska kula taro 1 septemvri 2012)

Doznajn kobor but trudinena pe o starešine te ohrabrinen e phralen hem e phenjen.

„Starešini — ,naši sorabotnici za da bideme radosni‘“ (Stražarska kula taro 15 januari 2013)

1. Savo sovet dela i Biblija e romenge?

O Jehova dengja zadača e romeske te ovel poglavari ki familija. (Čitin Efešanite 5:23.) O Jehova očekujnela lestar te anel odluke bašo šukaripe e familijakoro. I Biblija sovetinela e romen: „Mangen tumare romnjen“ (Efešanite 5:25). Sar šaj te keren adava? Jekh rom kova so mangela ple romnja sekogaš postapinela laja ljubezno, bizi razlika dali tane khere ili javere manušencar. Ov zaštitinela la hem dela plo najšukar te šaj te grižinel pe bašo lakere fizička hem emocionalna potrebe (1. Timotej 5:8). A soj najvažno, ov grižinela pe bašo lakere duhovna potrebe (Matej 4:4). Na primer, ov molinela pe hem čitinela i Biblija zaedno ple romnjaja. Keda jekh rom mangipaja grižinela pe ple romnjake, ov arakhela plo amalipe e Jehovaja. (Čitin 1. Petrovo 3:7.)

O Isus tano poglavari ko sobranie (Efešanite 5:23). Avdive, ov taro nebo vodinela ple sledbenikon soj tele ki Phuv preku „o verno hem razborito robo“. (Čitin Matej 24:45.) O Isus postavingja akale robo hem dengja le avtoriteti te anel nesave odluke. Sepak, akava robo mora te ovel poslušno e Isuseske hem te služinel leskere pomazime phralenge. Ama, koj tano akava robo hem sar ov grižinela pe amenge?