Kubudik
17 Chisak chawonsu cha In Isarel chadokala mwi mpay ya Sin pakemp pakemp kukwatijan ni mbil ya Yehova, ni atekina chibeng ku Refidim. Pakwez kwadingap mem ma kuna antu.
2 Chad antu asambisha kumutendish Moses anch: “Twinkisha mem ma kuna.” Pakwez Moses wayakula anch: “Mulong wak wintendishinanya am? Mulong wak udandamedinanya kumupak Yehova?” 3 Pakwez antu ading afang kal impu ya mem nakash, ni adandamena kumunyinyit Moses anch: “Mulong wak watubudishina mu Idjibit? Ov, chad mulong wa kutujip nich impu, etu, anetu, ni yivam yetu?” 4 Nsuden Moses wamudidina Yehova anch: “Nisala nchik nau antu inay? Kushadin pakemp angas mayal!”
5 Chad Yehova wamuleja Moses anch: “Sut kurutu kwa antu, ni send amakurump amwing a Isarel ni mukombu wabula nich wit wa Nil. Usenda mu chikas chey ni sambish kuya. 6 Tesh! Nikwiman kurutu kwey, kwinikwa, pa diyal mu Horeb. Ukubul diyal, dikubudish mem, ni antu akumana.” Mwawiy mwasalay Moses kurutu kwa amakurump a Isarel. 7 Chawiy wapila ndond yiniya anch Masah* ni Meriba* mulong wa matend mamutendishau kud In Isarel ni mulong amupaka Yehova palondau anch: “Ov, Yehova ud netu anch bwat?”
8 Kupwa In Amalek eza kuyirishikish In Isarel ku Refidim. 9 Chad Moses wamuleja Yoshua anch: “Tutondinaku amakuny ni yang ukarish nau In Amalek. Damashik nikwiman pa musong wa kamukandu, nich mukombu wa Nzamb wakin ku chikas cham.” 10 Kupwa Yoshua wasala mud mwamulejau kud Moses, ni warisha nau In Amalek. Moses, Aron, ni Hur aya pa musong wa kamukandu.
11 Palamangay Moses makas ma kuzambul mwiur, In Isarel akasikanang, pakwez pashirishangay kamu makas mend, In Amalek akasikanang. 12 Paziya makas ma Moses, Aron ni Hur anona diyal amutekinad kwinshin, ni Moses washakamap. Kupwa Aron ni Hur akwata makas mend, ou mutambu, mukwau mutambu, mwamu makas ma Moses madandamena kushal mwiur kushik ni pandamina muten. 13 Chawiy Yoshua wayipandakana In Amalek ni antwau nich mpak ya musamun.
14 Chad Yehova wamuleja Moses anch: “Fund yom ey mu buku kwikal chivurikish ni mulejay Yoshua: ‘Nikujiyish yivurikish yawonsu ya In Amalek mwinshin mwa diur.’” 15 Kupwa Moses watunga chintamb ni wachipila anch Yehova-nisi,* 16 walonda anch: “Mulong chikas cha In Amalek chipompatin ditand da Yah, Yehova ukuyirishikish mu yirung yawonsu.”