Kubudik
19 Mwi ngond wa kasatu, kupwa kwa In Isarel kubudik mwi ngand ya Idjibit, dichuku dawiy dimwing, ashika mwi mpay ya Sinay. 2 Adokala ku Refidim ashik mwi mpay ya Sinay ni ateka chibeng mwi mpay. Isarel watekina chibeng mwinamwa pantaliken ni mukandu.
3 Chad Moses wakaninika kuday Nzamb wakin, ni Yehova wamutazuka kudokal ku mukandu, wamulej anch: “Ey yawiy yom ukulonda kud antu a mu chikumbu cha Jakobu, ni ukuyileja In Isarel: 4 ‘Wimenanganyap ayinen yom nayisalang In Idjibit, mulong wa kukusendany pa mapur ma mbur ni kukuletany kud am amwinam. 5 Katat anch wanziyinany mu yawonsu ni anch walamany mansuk mam, ukwikalany chakin kamu antwam a pakampwil* pakach pa antu awonsu, mulong divu dawonsu did damam. 6 Ukwikalany kud am want wa in kupesh ni muchid utumbila.’ Minam mawiy mazu ukuyileja In Isarel.”
7 Chawiy Moses waya wayikumangej amakurump a antu ni wayileja mazu minam mawonsu mamulejau kud Yehova. 8 Kupwa antu awonsu, akula awonsu pamwing anch: “Tukusal kwa kwisotin yom yawonsu yalondangay Yehova.” Kapamp kamwing Moses waya kumushikijin Yehova chakul cha antu. 9 Ni Yehova wamuleja Moses anch: “Tesh! Nikwez kud ey mu didj dijal, chakwel antu atesh pinikwambamba ney ni chakwel akwitiyij niyey chisu chawonsu.” Kupwa Moses wamushikijina Yehova mazu malondau antu.
10 Kupwa Yehova wamuleja Moses anch: “Yang kud antu ni yishitwisha nlel ni damashik, ni afanyidin kutut masun mau. 11 Afanyidin kwirijek mulong wa dichuku da kasatu, mulong dichuku da kasatu Yehova ukushirik pa mukandu wa Sinay kurutu kwa antu awonsu. 12 Ufanyidin kuyitekin antu mimbu kuns kwa mukandu wawonsu ni ukuyilej anch: ‘Kangal wapakishany kukandam ku mukandu ap kupukun kuns. Muntu mwawonsu ukupukuna ku mukandu chakin kamu akumujip. 13 Kwikil chikas chikumupukunaku pakwez akumwas mayal ap kumupamp wa kupamp. Ikala nnam ap muntu, kakudandamenap kwikal mwom.’ Pakwez pakuteshau chidjimin cha museng wa mukoku ikwal, akutwish kukaninik ku mukandu.”
14 Chad Moses washirika ku mukandu waya kud antu, wasambisha kuyishitwish antu, ni atuta masun mau. 15 Wayileja antu anch: “Irijekany mulong wa dichuku da kasatu. Kangal wamusejinany mband.”*
16 Dichuku da kasatu pamanch, kwikala kubarumok kwa nzaj ni milayilay, didj dilimina pa mukandu ni chidjimin chikash cha museng, ni antu awonsu mu chibeng asambisha kuzal. 17 Chad Moses wayibudisha antu mu chibeng chakwel aya kumusankan Nzamb wakin, ni imana kwinshin kwa mukandu. 18 Mukandu wawonsu wa Sinay wading ukat kufind mish, mulong Yehova washirika pinapa mu kasu, mish yading yikat kukaninik mud mish ya fur, ni mukandu wawonsu wading ukat kuzal nayimp. 19 Pading payila chidjimin cha museng kupandakan, Moses walondang, ni dizu da Nzamb wakin damwakulang.
20 Chad Yehova washirika pa mukandu wa Sinay pa musong wa mukandu. Kupwa Yehova wamutazuka Moses pa musong wa mukandu, ni Moses wakaninika. 21 Yehova wamuleja Moses anch: “Shirik uyibabesh antu chakwel kangal apakish kumatik mimbu mulong wa kumutal Yehova, chamwamu avud pakach pau akufa. 22 Ni in kupesh akweting chaku cha kumusejin Yehova ishitwish, chakwel kangal Yehova wayibul.” 23 Chad Moses wamwakula Yehova anch: “Antu kakutwishap kukaninik ku mukandu wa Sinay, mulong wad watubabeshang kal pawatulejang anch, ‘Tek mimbu ku mukandu, ni wikadisha utumbila.’” 24 Pakwez Yehova wamuleja anch: “Yang, shirik, kupwa chad weza pamwing ni Aron, pakwez kangal wayilik in kupesh nau antu amatik mimbu mulong wa kukaninik kuday Yehova, chakwel kangal wayibul.” 25 Chawiy Moses washirika kudau antu ni wayileja.