Kubudik

22 “Anch muntu wiy ngomb ikwal ap mukoku ni wamujip ap wamulandish, ukufut angomb amakwal atan mulong wa ngomb ni amikoku anying mulong wa mukoku.

2 (“Anch amutanakesh mwij piyinay mu chikumbu, chad amubul ni wafa, wamujipang kakwikalap ni chisend cha mash. 3 Pakwez anch yasadik kupwa kwa kubudik kwa muten, ukumujipa ukwikal ni chisend cha mash.)

“Mwij ufanyidin kufut. Anch kakwetap chom, akumulandish mulong wa kuchirish yom yiyangay. 4 Anch yiyangay amutanay nich yichid ni mwom, ikala ngomb ikwal, ap chimbur, ap mukoku, ukuchirish tupamp twaad yiyangay.

5 “Anch muntu ukat kuyidish annam end mwi ndond yend ya kuyidishin, ap mu chir cha nviny, chad wayilik aya ada mu chir cha muntu mukwau, ukufut yom yiwamp nakash yikwangulay mu chir chend, ap yom yiwamp nakash yikwangulay mu chir chend cha nviny.

6 “Anch muntu wakish kasu ni kapalangan mu yifukis ya miy, chad kashiken kwosh yit ya mbut, ap mbut jakad kal kwangul mu chir, wakakishang ufanyidin kufut yom yatemang.

7 “Anch muntu wamwinkish mukwau nfalang ap yom kumulamin, chad amwiyay mu chikumbu, anch amukwat mwij, ufanyidin kufut tupamp twaad yom yiyangay. 8 Anch mwij kamekenap, akumutwal mwin chikumbu kurutu kwa Nzamb wakin, mulong wa kuman anch ndiy wasendang* yom ya mukwau. 9 Mu milong yawonsu mukusenday muntu chom chakad kwikal nchend, ikala ngomb ikwal, chimbur, mukoku, disun, ap chom chawonsu chashadikang chad ndiy walond anch, ‘Chom cham!’ antu inay aad akutwal mulong wau kurutu kwa Nzamb wakin. Muntu ukulejanau kud Nzamb anch ufil nich, ukumufut mukwau tupamp twaad.

10 “Anch muntu wamwinkish mukwau chimbur, ap ngomb ikwal, ap mukoku, ap chivam chikwau kumulamin, chad nnam winou wafa, ap wikal chilim, ap amusend pakad muntu kuman, 11 wada ulamina nnam ufanyidin kuchip kurutu kwa Yehova anch kasendangap chom cha mukwau; ni mwin nnam ufanyidin kwitiy. Mukwau kakumufutap. 12 Pakwez anch nnam amwiyangay, ukumufut mwin nnam. 13 Anch nnam amuzanonang kud nnam wa chidany, ukumulet mud uman. Kakufutap mulong wa nnam wazanonangau kud nnam wa chidany.

14 “Pakwez anch muntu wasondam nnam wa mukwau, chad nnam wikal chilim ap wafa pakad mwin nnam kwikalaku, wasondamang nnam winou ufanyidin kufut. 15 Anch mwin nnam udap, kakumufutap. Anch amufutinang, nfalang jamupaninangau dawiy difut.

16 “Chad anch ikuny wamwoz changadim wakad kal kwijik ikuny, wakadau kal kutond ni walal nend, ufanyidin kumupanin dipit chakwel ikal mukajend. 17 Anch tatukwend walik ni muchim umwing kumwinkishay, ikuny ukufut nfalang jilakena mu dipit da kwatan nich.

18 “Kangal wamulik mband mulaj adandamen kwikal mwom.

19 “Mwawonsu ukulalijana ni nnam chifanyidin kamu ching kumujip.

20 “Mwawonsu ukupana yakupesh kud anzamb akwau, kumudoshaku kusu Yehova, chifanyidin kumujiyish.

21 “Kangal wamumesh ngez mar ap kumusal nayimp, mulong niyen wadinganya angez mwi ngand ya Idjibit.

22 “Kangal wamumeshany mwadamufu ap umwing mar ap mwan anshon.* 23 Anch wamumesh mar mu mutapu kanang, chad wandidin, nikukanganyap kutesh kudil kwend; 24 ujim wam ukusarumuk, ni nikukujipany nich mpak ya musamun, akajen akwikal adaafu ni anen an anshon.

25 “Anch wamusondjik kazweny* ushicha pakach pa antwam nfalang, muntu ushicha nend, ufanyidinap kwikal kud ndiy mud mwin kusondjikan nfalang ja entere. Ufanyidinap kumwit entere.

26 “Anch wamusend mukwen disun mud chizu, ufanyidin kumuchirishinad kurutu kwa muten kwandam. 27 Mulong chawiy kusu chom chikwetay cha kwibwik, disun da kubwik mujimbu wend;* ov, ukudjal ik pa kulal? Anch wandidin, chakin kamu nikutesh, mulong nid mwin riy.

28 “Kangal wamushing* Nzamb, ap kumushing ntakel wa pakach pa antwey.

29 “Kangal widjidjek kwimpesh chikunku cha yakwangul yey piukwangula mbut jivud nakash ni chikunku cha yom ukukama piukukama yom yivud nakash.* Ukwinginkish mwan wa kusambish wa pakach pa aney amakuny. 30 Ey yawiy yom ukusala piur pa ngomb ikwal wey ni mukoku wey: Ukushal ni makwend mu machuku sambwad. Pa dichuku da chinan ukwinginkishay.

31 “Ufanyidinany kwikal antu atumbila kud am, ni ufanyidinanyap kuda mbij ja nnam wazanonangau kud nnam wa chidany mu masuku. Ufanyidinany kuyidjubwilaj atubu.