Kubudik

3 Moses wikala kafung wa amikoku a tatuwenend Jetro, mwin kupesh wa ku Madian. Chad pading payitwadinay amikoku ku mutambu wa kurand wa mpay, washika ku Horeb, mukandu wa Nzamb wakin. 2 Chad mwangel wa Yehova wamubudikina mu muzuzu wa kasu mu chifukis cha miy. Pashinshikinay, wamana anch chifukis chading chizutin kasu, pakwez chadingap chitemina. 3 Chawiy Moses walonda anch: “Chitin nisej bil piswimp nital chom chinech chishimokishena, niman mulong wak chifukis chiteminap.” 4 Pamanay Yehova anch Moses wading ukat kusej chakwel atal, wamutazukina mu chifukis anch: “Moses! Moses!” Ndiy wamwakula anch: “Am unou.” 5 Chad wamwela anch: “Kangal wasej piswimp nakash. Djol masandal mey, mulong wiminy pa divu ditumbila.”

6 Walonda kand anch: “Am nid Nzamb wa tatukwey, Nzamb wa Abraham, Nzamb wa Izak, ni Nzamb wa Jakobu.” Kupwa Moses wajindjika chifu chend, mulong wading wovil wom wa kumutal Nzamb wakin. 7 Kupwa Yehova wawejinaku anch: “Chakin kamu, namen mar mamenau antwam ada mu Idjibit, ni nateshin kudil kwau mulong wa antu ayisadishina midimu ku usu; nij nawamp kusansan kwovilau. 8 Nikushirik mulong wa kuyikamunin mu makas ma In Idjibit, nikuyibudish mwi ngand yiniya ni kuyitwal mwi ngand yiwamp ni yijim, ngand yipwekina mayel ni woch, ngand ya In Kanaan, ya In Het, ya In Amor, ya In Periz, ya In Hivi, ni ya In Jebus. 9 Chakin kamu, kudil kwa an a Isarel kwashikin kud am, ni namen kand mutapu uyimeshinau mar kwa chisum kud In Idjibit. 10 Katat tesh! Nikimbin kukutum kwa Farao, ni ukuyibudish antwam In Isarel mu Idjibit.”

11 Pakwez, Moses wamwakula Nzamb wakin anch: “Am nid nany chakwel niya kumanijan nend Farao ni kuyibudish In Isarel mu Idjibit?” 12 Nzamb wamwakula anch: “Nikwikal ney, ni ech chawiy chijingidij chikukwinkisha kashinsh anch yam nakutumina: Kupwa kwa kuyibudish antu mu Idjibit, ukumusadinany* Nzamb wakin pa mukandu winou.”

13 Pakwez Moses wamwela Nzamb wakin anch: “Chilakej mud anch naya kud In Isarel ni nayilej anch, ‘Nzamb wa angakiril en wantum kal kud en,’ chad awiy angipul anch, ‘dijin dend ndiy nany?’ Nikuyakul anch nchik?” 14 Chad Nzamb wamwakula Moses anch: “Nikwikal chinisotina* kwikal.”* Ni wawejinaku anch: “Ey yawiy yom ukuyileja In Isarel, ‘nikwikal wantum kal kud en.’” 15 Kupwa Nzamb wamuleja kand Moses anch:

“Ey yawiy yom ukuyileja In Isarel, ‘Yehova Nzamb wa angakiril en, Nzamb wa Abraham, Nzamb wa Izak, ni Nzamb wa Jakobu wantum kal kud en.’ Dined dawiy dijin dam chikupu, ni ku dijin dined kwawiy kufanyidinau kwinvurikin yirung yawonsu. 16 Katat yang, yikumangeja amakurump a Isarel ni yileja anch, ‘Yehova Nzamb wa angakiril en wambudikinang, Nzamb wa Abraham, wa Izak, ni wa Jakobu, ni walondang anch: “Nakushinshikinangany ni namanang yom yikusadinanyau mu Idjibit. 17 Chawiy nilondina anch, nikukukamuninany ku mar makumeshinanyau kud In Idjibit ni nikukutwalany mwi ngand ya In Kanaan, ya In Het, ya In Amor, ya In Periz, ya In Hivi, ni ya In Jebus, ngand yipwekina mayel ni woch.”’

18 “Akukutesh chakin kamu. Ni ukuyany, ey ni amakurump a Isarel, kud mwant wa Idjibit, ni ukumulejany anch: ‘Yehova Nzamb wa In Hebereu wisambang netu. Chawiy, tulikaku amboku tusal weny wa machuku masatu mwi mpay tukapesh yakupesh kud Yehova Nzamb wetu.’ 19 Pakwez am nij nawamp anch mwant wa Idjibit kakukulikanap uyany, kwij anch chikas cha dikand chamushindin kusal mwamu. 20 Chawiy nikwonin chikas cham ni nikumubul Idjibit nich yisal yam yawonsu yishimokishena, ni kupwa kwa yom yiney, ukukulikanyaku. 21 Ni nikuyikwash antu inay kwitapil dilau ku mes kwa In Idjibit, ni paukuyanya, ukuyanyap ap pakemp makas ma mwamu. 22 Mband mwawonsu ufanyidin kumwit mutej nend ni mband ushicha mu chikumbu chend yom ya utad wa arjang, ya or ni masun, ni ukuyidjikanyay anen amakuny ni amband; ni ukuyibuwany In Idjibit.”