Kubudik
32 Pa chisu chinicha, antu amana anch Moses walaba kushirik ku mukandu. Chawiy antu amukumangena Aron ni amuleja anch: “Tumbuk, tusadina nzamb ukututakela, mulong twijap yamushikenang kal win Moses ou, ikuny watubudishina mwi ngand ya Idjibit.” 2 Chad Aron wayileja anch: “Tambulany tuziy twa or tuda ku matu ma akajen, ma anen amakuny ni amband, ni nletinanyatu.” 3 Chawiy antu awonsu asambisha kudjol tuziy twa or twadingau nich ku matu ni kumutwadinatu Aron. 4 Aron watambula or winou, ni wamuchila nich ngaas wamusal kapwany* wa musamb a ngomb ikwal. Antu asambisha kulond anch: “Winou ndiy Nzamb wey, A! Isarel, wakubudishina mwi ngand ya Idjibit.”
5 Pamanay Aron mwamu, watunga chintamb kurutu kwa kapwany winou. Kupwa watoya anch: “Damashik kukwikal musambu wa Yehova.” 6 Chawiy dichuku dambakenap antu alanka pamanch nakash ni asambisha kupesh yakupesh ya kwosh ni kupan yakupesh ya chisambu. Papwishau, antu ashakama mulong wa kuda ni kuna. Kupwa atumbuka mulong wa kwisangaresh.
7 Chad Yehova wamuleja Moses anch: “Shirik, yang, mulong antu ey wabudishina mwi ngand ya Idjibit, akat kwiyendish mu mutapu wijondina. 8 Apumbuk kal pakad kulab mwi njil nayileja kulondul. Isadinang kal kapwany* wa musamb a ngomb ikwal, ni akat kumuzengamin, kumupesh yakupesh ni kulond anch, ‘Winou ndiy Nzamb wey, A! Isarel, wakubudishina mwi ngand ya Idjibit.’” 9 Yehova wamuleja kand Moses anch: “Naman kal anch antu inay achinchikin michim.* 10 Katat nlika niyijiyish mu ujim wam upandikena, ni pa ndond yau nikwikadish ey muchid ujim.”
11 Chad Moses wamwilembina* Yehova Nzamb wend, wamwel anch: “A! Yehova, mulong wak ukuyijimena antwey chipandakena mwamu kupwa kwa kuyibudish mwi ngand ya Idjibit nich usu wey upandakena ni chikas chey cha dikand? 12 Ov, ukimbin In Idjibit alond anch, ‘Wayibudishin nich chitongijok chiyimp. Wad ukimbin kuyijipin ku mikandu ni kuyinongish pa divu’? Kangal wajiman nakash mwamu ni swimp* mupak wey wa kulet riyind riner pad antwey. 13 Yivurika atushalapol ey Abraham, Izak, ni Isarel, awachipina kusutin amwiney anch: ‘Am nikuyivudish aney* mud atutumbu a mwiur, ni nikuyinkish ngand yiney yawonsu yinalonda kuyinkish anen,* chakwel ayiswan chikupu.’”
14 Chawiy Yehova walika* kulet pad antwend mar malonday kuyiletin.
15 Kupwa Moses wafumba washirik ku mukandu nich masalet maad ma* Uman mu chikas chend. Pa masalet ading apafundin mitambu yawonsu yaad; ading apafundin piur ni kwinshin. 16 Masalet amasala kud Nzamb, ni yom yading yifundinau pa masalet ayifunda kud Nzamb. 17 Pateshay Yoshua masok ma antu ading atoyina, wamuleja Moses anch: “Kud masok ma njit mu chibeng.” 18 Pakwez Moses walonda anch:
“Madap masok ma muminy wa kuwin,*
ni madap masok ma madil ma antu awinau kal kwi njit;
niteshin masok ma muminy wa mutapu ukwau.”
19 Pasejay Moses piswimp ni chibeng ni pamanay musamb a ngomb ikwal ni maj, wajimana nakash, ni wasa masalet madingay nich mu makas mend pansh kwinshin kwa mukandu ni wamapuchola. 20 Wanona musamb a ngomb ikwal wasalau wamwosh kasu ni wamupuchola wikal wung; kupwa waumwangina pa mem ni wayinisham In Isarel. 21 Ni Moses wamwela Aron anch: “Antu inay akusalang yom ik chakwel uyisadikish chitil chijim mwamu?” 22 Aron wamwakula anch: “Kangal wajiman nakash nsalejam. Wij anch antu inay akwet chaku cha kusal yom yiyimp. 23 Anlejang anch, ‘Tusadina nzamb ukututakela, mulong twijap yamushikenang kal win Moses ou, ikuny watubudishina mwi ngand ya Idjibit.’ 24 Kwawiy nayilejang anch, ‘Mwawonsu ukweta chom cha or achidjol ni anginkishach.’ Chad nayidjubwilang mu kasu ni yabudishang musamb a ngomb ikwal winou.”
25 Moses wamana anch antu ading asadin kwau yom mud mukatinau,* mulong Aron wading uyitadin kwend mwamu, mu chilik cha kwiletin usany ku mes ma akankuny nau. 26 Chawiy Moses wimana pa chis cha chibeng ni walonda anch: “Nany uda ku mutambu wa Yehova? Eza kud am!” Ni In Levi awonsu amukungama Moses. 27 Chad wayileja anch: “Ey yawiy yom yalondangay Yehova Nzamb wa In Isarel, ‘Muntu ni muntu adjal mpak yend ya musamun ni auk chibeng kudokal mutambu kushik mutambu,* ni amujip mwanamakwend, mutej nend, ni murund nend wa piswimp.’” 28 In Levi asala yom yayilejau kud Moses. Chawiy piswimp amakuny tunan tusatu (3 000) ayijipa dichuku dinida. 29 Kupwa Moses walonda anch: “Iyaurilany* mulong wa Yehova nlel, mulong muntu ni muntu pakach pen wamurishikish kal mwanend ni mwanamakwend; nlel Nzamb ukukuyukishany.”
30 Dichuku dambakenap, Moses wayileja antu anch: “Wasalangany chitil chijim nakash, katat nikimbin kukaninik kud Yehova chakwel nimwilembin mulong wa kuman anch ukutwish kulikishin chitil chen.” 31 Chawiy Moses wachirika kud Yehova ni walonda anch: “Chitil chijim mud ik chasalangau antu inay! Isadinang nzamb wa or! 32 Katat anch ukatin, yilikishina chitil chau; anch bwat, njima kwey amboku mu buku wey wafunda.” 33 Pakwez, Yehova wamwakula Moses anch: “Muntu wasalang chitil* ndiy nikujima mu buku wam. 34 Katat yang, yitwala antu inay kwi ndond nakuleja. Tesh! Mwangel wam ukukutakel kurutu, ni pa dichuku nikwita kuchind, nikuyipup mulong wa chitil chau.” 35 Kupwa Yehova wasambisha kuyibul antu mulong wa musamb a ngomb ikwal wasalau, wasalay Aron.