Kubudik
33 Yehova wamuleja kand Moses anch: “Tumbuk pinap pamwing nau antu wabudishina mwi ngand ya Idjibit. Yang mwi ngand nayichipina Abraham, Izak, ni Jakobu anch, ‘nikuyinkishay aney.’ 2 Nikutum mwangel kurutu kwey ni nikuyopat In Kanaan, In Amor, In Het, In Periz, In Hivi, ni In Jebus. 3 Yang mwi ngand yipwekina mayel ni woch. Pakwez nikuyap nen mulong udany antu achinchikina michim,* chamwamu nikutwish kukunongishinany mwi njil.”
4 Pateshau antu mazu minam makash, asambisha kudil, ni kwikil muntu wadjala yileng yend. 5 Yehova wamuleja Moses anch: “Yileja In Isarel anch, ‘Udany antu achinchikina michim.* Nafanyinang kusut kapamp kamwing pakach pen ni kukunongishany. Katat kangal bil wadjalany yileng yen pinitongijokidina yom ya kukusalany.’” 6 Chawiy kudokal ku mukandu wa Horeb, In Isarel kadjalap* yileng yau.
7 Chad Moses wasenda mwinkand wend, wautekina pol pa chibeng, pa chintampu kanang ni chibeng, ni waupila anch mwinkand wa kukumangen. Mwawonsu wading ukweta kuswir kwa kumwipul Yehova wabudikang ni kuya ku mwinkand wa kukumangen, wading pol pa chibeng. 8 Anch kamu Moses wabudik mulong wa kuya ku mwinkand, antu awonsu atumbukang iman pa yis ya minkand yau, ni amulondwishang Moses mes djat kamu ni pakwandaminay mu mwinkand. 9 Anch kamu Moses wandam mu mwinkand, dinguj da didj dashirikang diman ku chis cha mwinkand padingay Nzamb ukat kwambamb ni Moses. 10 Pamanangau antu awonsu dinguj da didj diman pa chis cha mwinkand, muntu ni muntu watumbukang wabwikam pansh pa chis cha mwinkand wend. 11 Yehova wambambang nend Moses mes ni mes, mud mukatay kwambamb muntu ni mukwau muntu. Pachirikangay mu chibeng, kashalapol wend ni mwin kumukwash Yoshua mwan wa Nun, kadokalangap ku mwinkand.
12 Chad Moses wamuleja Yehova anch: “Winlejin anch, ‘Yitwala antu inay,’ pakwez wanlejangap nany ukwinginkisha mulong wa kuya nend. Kupwa walondang anch, ‘Nikwij pa dijin dey* ni ukwet dilau dam.’ 13 Anch nikwet dilau dey, ngijikisha amboku jinjil jey, chakwel nikwijik ni nidandamen kwikal ni dilau dey. Umana kand muchid winou anch ad antwey.” 14 Chawiy wamwakula anch: “Nikuya ney amwinam* ni nikukwinkish mutapu wa kwiswedish.” 15 Kupwa Moses wamuleja anch: “Anch amwiney uyilap* netu, kangal watushemunin pa ndond yiney. 16 Mutapu ik yikwijikana anch nikwet dilau dey, am nau antwey? Ov, kadap kusutil ey kuya netu, chakwel am ni antwey atwauril ni antu akwau awonsu ada pa divu?”
17 Yehova wamuleja kand Moses anch: “Nikusal kand yom yiney wangita kal mulong ukwet dilau dam ni nikwij pa dijin dey.” 18 Kupwa Moses wamuleja Nzamb anch: “Nlejaku amboku uyaj wey.” 19 Pakwez Nzamb wamwakula anch: “Nikusutish kuwap kwam kwawonsu kurutu kwey ni nikwijikish kurutu kwey dijin da Yehova; nikupan dilau dam kud mwawonsu nisotina kwinkishad, ni nikumwanaken mwawonsu nisotina kwanaken.” 20 Wawejinaku anch: “Ukutwishap kuman chifu cham, mulong kwikil muntu ukutwisha kwinman ni wadandamen kwikal mwom.”
21 Yehova wamuleja kand anch: “Ndond ey yida piswimp niyam. Iman pa diyal. 22 Pakusuta uyaj wam, nikukwandjik mu dipan da diyal, ni nikukuchidij nich chikas cham djat ni pinikusutina. 23 Kupwa nikudosh chikas cham ni ukuman nyim yam. Pakwez chifu cham chikutwishap kumekan.”