Kubudik

37 Kupwa Bezalel wasala mushet wa mabay ma mutond wa kaash.* Wading ukwet akude* aad ni chikunku pa kulep, kude umwing ni chikunku pa kujimb, ni kude umwing ni chikunku pa kulep kuya mwiur.* 2 Waushirila nich or wa zwang mukach ni pol, ni kuns kuns wanyingumwishaku nkwat ya or. 3 Kupwa wawengurila yikom yinying ya or, ya kutek piur pa mend yinying ya Mushet; yikom yaad mutambu umwing wa Mushet, yikom yaad mutambu ukwau. 4 Wasala kand misil ya mabay ma kaash ni wayishirila nich or. 5 Kupwa wandjika misil mu yikom yida mutambu ni mutambu wa Mushet mulong wa kusendinaku Mushet.

6 Wasala chibwik cha or wa zwang. Chading chikwet akude aad ni chikunku pa kulep, ni kude umwing ni chikunku pa kujimb. 7 Kupwa wachila asheribeng* aad a or nich marto* ku jins jaad ja chibwik. 8 Sheribeng umwing wading ku ris rumwing, ni sheribeng mukwau ku ris rikwau. Wasala asheribeng ku jins jaad ja chibwik. 9 Asheribeng inay aad ading atanguril mapur mau mwiur, mapur mau mading mabwikin pa chibwik. Ading atalijadin umwing ni mukwau, ni yifu yau yading yitadin pa chibwik.

10 Kupwa wasala tebur wa mabay ma kaash. Wading ukwet akude aad pa kulep, kude umwing pa kujimb, ni kude umwing ni chikunku pa kulep kuya mwiur. 11 Ni wamushirila nich or wa zwang ni kuns kuns wanyingumwishaku nkwat ya or. 12 Kupwa wamunyingumwisha nich mutad ukweta kujimb kwa chilaz cha chikas* chimwing, ni ku mutad wanyingumwishaku nkwat ya or. 13 Chikwau kand, wamwengurila yikom yinying ya or ni wateka yikom pa makonk manying pading papampidinau mend yinying. 14 Yikom yading piswimp ni mutad, mwa kwandjik misil mulong wa kusendinaku tebur. 15 Kupwa wasala misil ya mabay ma kaash ni wayishirila nich or mulong wa kusendinaku tebur. 16 Kupwa kand, nich or wa zwang wasala yom ya pa tebur: Malong, mpas, yibakud, ni atufuchel ya kuziz nich mulambu wa yakuna.

17 Ni wasala mwend wa lamp wa or wa zwang. Mwend wa lamp wauchila wa kuchil nich marto. Mataku mau, mukung wau, mpas jau, mafuvu mau, ni yisalamb yau yasala chom chimwing. 18 Ku mukung wa mwend wa lamp kwading mitiy musamban, mitiy yisatu ya mwend wa lamp mutambu umwing ni mitiy yisatu mutambu ukwau. 19 Ku mitiy yisatu ya mutambu umwing kwading mpas jisatu jifanakena ni yisalamb ya mutond wa amand, ni rupas ni rupas rading ni difuvu ni chisalamb. Ni ku mitiy yisatu ya mutambu ukwau kwading mpas jisatu jifanakena ni yisalamb ya mutond wa amand, ni rupas ni rupas rading ni difuvu ni chisalamb. Wawiy mutapu wasalau mitiy musamban yading ku mukung wa mwend wa lamp. 20 Ni ku mukung wa mwend wa lamp kwading mpas jinying jifanakena ni yisalamb ya mutond wa amand, ni rupas ni rupas rading ni difuvu ni chisalamb. 21 Kwading difuvu dimwing mwinshin mwa mitiy yaad ya kusambish yida ku mukung, difuvu dikwau mwinshin mwa mitiy yaad yambakedinap, ni difuvu dikwau mwinshin mwa mitiy yaad ya nsuden. Mwawiy yading piur pa mitiy musamban yading ku mukung wa mwend wa lamp. 22 Mafuvu, mitiy, ni mwend wa lamp wawonsu yasala chom chimwing cha or wa zwang, cha kuchil ni marto. 23 Kupwa wasala malamp mau sambwad ni anzambu* au ni yifoy yau ya kasu, yawonsu ya or wa zwang. 24 Wasala mwend wa lamp ni yom yau yawonsu nich talant* umwing wa or wa zwang.

25 Kupwa wasala chintamb cha diseng da malash cha mabay ma kaash. Chading ni mitambu yinying yilakena. Chading ni kude umwing pa kulep, kude umwing pa kujimb, ni akude aad pa kulep kuya mwiur. Chasala chom chimwing pamwing ni miseng yach. 26 Wachishirila nich or wa zwang: Piur, mwimbet mwawonsu ni miseng yach, ni kuns kuns wanyingumwishaku nkwat ya or. 27 Wasala yikom ya or, yaad mutambu ni yaad mutambu ukwau, mwinshin mwa nkwat yach, mwa kwandjikin misil mulong wa kuchisend. 28 Kupwa wasala misil ya mabay ma kaash ni wayishirila nich or. 29 Wasala kand many ma kuzizen matumbila ni diseng da malash da res ruwamp, da zwang, yawonsu ya kupwat nawamp nakash.