Kubudik

39 Asala masun machiminau nawamp nakash nich ndand wa ulombu wa ble,* ndand usunzirikina,* ni ndand musunz,* mulong wa kusal nich mudimu mwi ndond yitumbila. Asala masun matumbila ma Aron, mud mwamulejau Moses kud Yehova.

2 Wasala efod kusutin kuchim pamwing ndand wa ulombu wa ble, ndand usunzirikina, ndand musunz, ni leng muwamp wa kubul mibung. 3 Abula yibar ya or nich marto* yikal tuyibar tupipela, ni watulengola tumoj twabombau nich ndand wa ulombu wa ble, ndand usunzirikina, ndand musunz, ni leng muwamp, ni ayichima yifatul ya efod. 4 Asala yibel ya pa makij ya efod yading yisankanijadina pamwing ku jins jaad ja piur. 5 Ni mukab wa kuchim, watekau pa efod mulong wa kumulam ndond yimwing, ausala nich yom yawiy yimwing: Or, ndand wa ulombu wa ble, ndand usunzirikina, ndand musunz, ni leng muwamp wa kubul mibung, mud mwamulejau Moses kud Yehova.

6 Kupwa ateka mayal ma oniks mwi nkwat ja or, ni afundap majin ma an a Isarel, mud mukatau kutot chijingidij.* 7 Wamateka pa yibel ya pa makij ya efod mud mayal ma chivurikish mulong wa an a Isarel, mud mwamulejau Moses kud Yehova. 8 Kupwa wasala dibeng da pa ntul dikweta yifatul, mud yifatul ya pa efod, nich or, ndand wa ulombu wa ble, ndand usunzirikina, ndand musunz, ni leng muwamp wa kubul mibung. 9 Anch adibam mu yikunku yaad, dading ni mitambu yinying yilakena. Asala dibeng da pa ntul, mu mutapu wa kwel anch ang adibam mu yikunku yaad, dading ni ulal wa miny* umwing pa kulep ni ulal wa miny umwing pa kujimb. 10 Aditayoka nich milong yinying ya mayal. Pa mulong wa kusambish pading diyal da ribi, da topaz, ni da emerod. 11 Pa mulong wa kaad pading diyal da tirikwaz, da safir, ni da jasp. 12 Pa mulong wa kasatu pading diyal da leshem,* da agat, ni da ametist. 13 Ni pa mulong wa kanying pading diyal da krizolit, da oniks, ni da jad. Amateka mwi nkwat ja or. 14 Pa mayal pading majin ma an dikum ni aad (12) a Isarel. Majin amatota pa mayal mud chijingidij,* ni pa diyal ni diyal pading dijin dimwing da michid dikum ni yaad (12).

15 Kupwa asala miyolal ya or wa zwang mulong wa dibeng da pa ntul, ya kupwat mud mibung. 16 Ni asala nkwat jaad ja or ni tuyikom twaad twa or, ni ateka tuyikom twinetu twaad pa makonk maad ma dibeng da pa ntul. 17 Kupwa andjika moj yaad ya or mu tuyikom twaad twading pa makonk ma dibeng da pa ntul. 18 Kupwa kand andjika jins jaad ja moj yaad mu ankwat aad, ni ayikasina ku yibel ya pa makij ya efod, kurutu. 19 Asala kand tuyikom twaad twa or ni atuteka ku jins jaad ja mutambu wa mukach wa dibeng da pa ntul, mutambu ukwatina ku efod. 20 Kupwa asala tuyikom tukwau twaad twa or ni atuteka kurutu kwa efod, kwinshin kwa yibel yaad ya pa makij, piswimp ni pamunungidinau, piur pa mukab wa kuchim wa efod. 21 Nsuden, akwatisha dibeng da pantul nich moj wa ulombu wa ble, wading udokila ku tuyikom twa dibeng da pantul kushik ku tuyikom twa efod, chakwel dibeng da pa ntul dishal pa ndond yau pa efod, piur pa mukab wa kuchim, mud mwamulejau Moses kud Yehova.

22 Kupwa wasala kabwik wakad makas wa efod, wa kuchim kud mwin kuchim masun, mwawonsu amusala nich ndand wa ulombu wa ble. 23 Dipan da kabwik wakad makas dading pakach ni pakach, mud dipan da kabwik wa utad wa kurish nich. Dipan dined adinyingumwisha nich mutad, chakwel kangal kabwik wapuk. 24 Kupwa kwinshin kwa kabwik wakad makas, atekaku mabuj ma grenad ma kusal nich ndand wa ulombu wa ble, ndand usunzirikina, ni ndand musunz, yawonsu ya kuchim pamwing. 25 Asala kand tupwambu twa or wa zwang ni atutekola pakach pa mabuj ma grenad kwinshin kwawonsu kwa kabwik wakad makas, pakach pa mabuj ma grenad; 26 ateka karupwambu ni dibuj da grenad, karupwambu ni dibuj da grenad, kwinshin kwawonsu kwa kabwik wakad makas, wadjalangau mulong wa kusal mudimu, mud mwamulejau Moses kud Yehova.

27 Ni asala ankandj a leng muwamp, achimau kud mwin kuchim masun, mulong wa Aron ni anend, 28 ni chitambal cha ku mutu cha leng muwamp, tuyibel twa ku mutu twa kwileng nich twa leng muwamp, tutuputul twa mukach twa leng muwamp wa kubul mibung, 29 ni mupond wa leng muwamp wa kubul mibung, wa ndand wa ulombu wa ble, ndand usunzirikina, ni ndand musunz, yawonsu ya kuchim pamwing, mud mwamulejau Moses kud Yehova.

30 Nsuden asala kadilat ka ku mutu kalayamijadina ka or wa zwang, chijingidij chitumbila cha kwipan,* ni apafunda mud mutapu ukatau kutot chijingidij* anch: “Kutumb kud kwa Yehova.” 31 Akasaku moj wa ndand wa ulombu wa ble mulong wa kukakasin pa chitambal cha ku mutu, mud mwamulejau Moses kud Yehova.

32 Chawiy mudimu wawonsu wa dizang, mwinkand wa kukumangen, wapwa, ni In Isarel asala yom yawonsu yamulejau Moses kud Yehova. Mwawiy kamu mwasalau.

33 Kupwa amutwadina Moses dizang, mwinkand ni yom yau yawonsu: Malau mau, mabay mau ma kadre, nkwatish jau, manguj mau ni mashin mau; 34 chibwik chau cha yikit ya amikoku amakwal chitekinau ulombu usunz, chibwik chau cha yikit ya nnam utazukinau anch fok, rido wa kwauril nich; 35 mushet wa Uman, misil yau ni chibwik; 36 tebur, yom yend yawonsu ni mikat ya kulambul;* 37 mwend wa lamp wa or wa zwang, malamp mau matekinau pa mulong, ni yom yau yikwau yawonsu pamwing ni many makusadin mulong wa chitokish; 38 chintamb cha or, many ma kuzizen, diseng da malash da res ruwamp, disun* da ku chis cha mwinkand; 39 chintamb cha kwivre ni rusambu rau ra kwivre, misil yach, yom yawonsu ya kusadin ku chintamb, dilong ni pa ndond pa kudishichik; 40 masun ma chipang, manguj ni mashin mau, disun* da ku chis cha chipang, moj yau, mpopu jau, ni yom yawonsu ya kusal nich mudimu ku dizang, ku mwinkand wa kukumangen; 41 masun machiminau nawamp nakash mulong wa kusal nich mudimu mwi ndond yitumbila, masun matumbila mulong wa Aron mwin kupesh, ni masun makudjalau anend mulong wa kusal mud in kupesh.

42 In Isarel asala mudimu wawonsu kukwatijan ni yom yawonsu yamulejau Moses kud Yehova. 43 Pashinshikinay Moses mudimu wau wawonsu, wamana anch ausala mud kamu mwalejanay Yehova kusal; ni Moses wayiyukisha.