Kubudik
4 Pakwez Moses wakula anch: “Ing chad mud anch alik kwau kwingitiyij ni alik kwau kwintesh, mulong akulond anch, ‘Yehova kakubudikidinap kwey.’” 2 Chad Yehova wamwipula anch: “Yom ik ukweta mu chikas chey amu?” Ndiy wakula anch: “Mukombu.” 3 Nzamb wamuleja anch: “Udjubula pansh.” Chawiy waudjubula pansh, ni wakarumuka nnak; ni Moses wamuchina. 4 Chad Yehova wamuleja Moses anch: “Onin chikas chey ni mukwata ku mukil.” Chawiy wonina chikas wamukwat, ni wakarumuka kand mukombu mu chikas chend. 5 Kupwa Nzamb walonda anch: “Mwamu akwitiyij anch Yehova Nzamb wa angakiril au, Nzamb wa Abraham, Nzamb wa Izak, ni Nzamb wa Jakobu, wakubudikidin.”
6 Yehova wamuleja kand anch: “Andjik amboku chikas chey mu dibeng da pa ntul da disun dey.” Chawiy wandjika chikas mu dibeng da disun dend. Pachibudishay, kukashimuk, chakwachikang kal musong wa kasu,* chatokang kal to mud nej!* 7 Kupwa wamuleja anch: “Chirish chikas chey mu dibeng da pa ntul da disun dey.” Chawiy wachirisha chikas mu disun dend. Pachibudishay mu disun dend, chachirika kand mud mujimbu wend wawonsu. 8 Nzamb wamuleja anch: “Anch alik kwitiyij ap kubangaku chijingidij cha kusambish, akutwish chakin kamu kwitiyij chijingidij cha kaad. 9 Pakwez, anch kitiyijinap yijingidij yiney yaad ni alik kwau kutesh dizu dey, ukutapul mem mu wit wa Nil, ni kumichil kwimpat, ni mem ukutapula mu wit wa Nil makukarumuk mash kwimpat.”
10 Chad Moses wamuleja Yehova anch: “Nlikishinaku, Yehova, chikala pakur ap kudosh ukata kwisamb ni kashalapol wey, kand kal nitwishangap kulond nawamp, mulong chinswapediningap kulond,* ni rudim rinlimining.” 11 Yehova wamwakula anch: “Nany wasala kan ka muntu, ap nany ukata kumwikadish muntu kamam, kajikamatu, mputames, ap kumwinkish mutapu wa kuman? Ov, kiyamap, Yehova? 12 Chawiy katat yang, nikwikal ney piukulonda,* ni nikukufundish yom yiufanyidina kulond.” 13 Pakwez Moses wakula anch: “Nlikishinaku, Yehova, tum kwey amboku muntu mukwau mwawonsu ukatina kutum.” 14 Chad Moses wamujimesha nakash Yehova, ni Nzamb wamwela anch: “Ing ukwet mwanamakwey Aron Mwin Levi, kimwawiyap? Nij anch ndiy ulondining nawamp. Ni pin tukulonda ap ud mwi njil wezin kukusankan. Pakukumanay muchim wend ukusangar. 15 Ufanyidin kwambamb nend, ni kumulej ya kulond, nikwikal nen, ey ni ndiy piukulondanya, ni nikukulejany* ya kusal. 16 Ndiy ukwambamb nau antu pa ndond yey, ukwikal muruu wey, ni ey ukwikal mud Nzamb kud ndiy.* 17 Ni ukusend mukombu winou mu chikas chey, wawiy ukusala nich yilay.”
18 Chawiy Moses wachirika kwa tatuwenend Jetro ni wamuleja anch: “Nikimbin amboku kuchirik kud anamakwam ada mu Idjibit chakwel nikayital anch achid aom.” Jetro wamwakula Moses anch: “Yang mu chisambu.” 19 Kupwa Yehova wamuleja Moses ku Madian anch: “Yang, chirik mu Idjibit, mulong amakuny awonsu ading akimbina kukujip afil.”
20 Chawiy Moses wamusenda mukajend nau anend, wayikandjika pa chimbur ni wawila mwi njil kuchirik mwi ngand ya Idjibit. Chikwau kand, Moses wasenda mukombu wa Nzamb wakin mu chikas chend. 21 Kupwa Yehova wamuleja Moses anch: “Anch washik mu Idjibit, sal kurutu kwa Farao yilay yawonsu nakwinkishina usu wa kusal. Pakwez nikulik muchim wend uchinchika ni kakuyilikapaku antu. 22 Ukumulej Farao anch: ‘Yehova ulondin anch: “Isarel ud mwanam, mwanam wa kusambish. 23 Nikulejin anch, mulikaku mwanam, chakwel aya akansadin. Pakwez anch walik kumulikaku, nikumujip mwaney, mwaney wa kusambish.”’”
24 Chad padingau mwi njil, pa ndond yapiminau, Yehova wamusankana ni wading ukimbin kumujip. 25 Nsuden Sefora wanona kadiyal kambukina, wamutwala nich mwanend ku mukand* ni wasala chakwel chikit chakatulay chikwat ku yidjatil yend, ni walonda anch: “Chid mulong kud am ud nfumwam ku mash.” 26 Chad Nzamb wamulikaku. Pa chisu chinicha Sefora walonda anch, “nfumwam ku mash,” mulong wa kutwalan ku mukand.
27 Kupwa Yehova wamuleja Aron anch: “Yang umusankan Moses mwi mpay.” Chawiy waya wasankanijan nend ku mukandu wa Nzamb wakin ni wamwinkisha moy kusutil kumubwikat. 28 Ni Moses wamuleja Aron yom yawonsu yamulejau kud Yehova wamutuma, ni yilay yawonsu yamwinkishay mbil ya kusal. 29 Kupwa Moses ni Aron aya ayikumangej amakurump awonsu a In Isarel. 30 Aron wayileja yom yawonsu yamulejau Moses kud Yehova, ni wasala yilay kurutu kwa antu. 31 Ni antu itiyija. Pateshau anch Yehova wayibangidin In Isarel ni anch wamen mar mau, azengama ni abwikama pansh.