Kubudik

5 Kupwa Moses ni Aron aya kwa Farao ni amuleja anch: “Yehova Nzamb wa Isarel ulondin anch, ‘Yilikaku antwam chakwel aya ansadin musambu mwi mpay.’” 2 Pakwez Farao wakula anch: “Yehova ud nany, chakwel niziyin dizu dend ni kuyilikaku In Isarel? Nimwijap Yehova ap pakemp, ni nikuyilikapaku In Isarel.” 3 Pakwez amwakula anch: “Nzamb wa In Hebereu wisambang netu. Tukimbin amboku tusal weny wa machuku masatu mwi mpay chakwel tukapesh yakupesh kud Yehova Nzamb wetu; chamwamu ukutwas mayej ap kutujip nich mpak ya musamun.” 4 Mwant wa Idjibit wayakula anch: “Moses ni Aron, mulong wak uyikangeshinanya antu kusal midimu yau? Chirikany ku mudimu!”* 5 Ni Farao wawejinaku anch: “Umenany mutapu uvudinau antu inay mwi ngand, ni ukimbinany iswedish ku midimu yau?”

6 Dichuku dinida, Farao wapana mbil kud antakel in kuyisadish antu midimu ni kud ankwash au anch: 7 “Kangal kand wayinkishany antu masuku ma kusal nich matafad. Yilikany aya kumakimb ayinau. 8 Pakwez ufanyidinany kuyisadish uvud wa matafad mud wadau kusal. Kangal wayikepishinany uvud, mulong asengen.* Yawiy yilondodinau anch, ‘Tukimbin kuya, tukimbin kumupesh Nzamb wetu yakupesh!’ 9 Yidikitishany midimu nakash, ni salany anch akwatikan nakash chakwel kangal ata matu ku makasu mayidimbinau.”

10 Chawiy antakel in kuyisadish antu midimu nau ankwash au aya ayilej antu anch: “Farao walond kal anch, ‘Nikukwinkanyap kand masuku. 11 Yang ukikimbinanyap ayinen masuku kuukutwisha kumatanany, pakwez uvud wa matafad kakuukepishap ap pakemp.’” 12 Chawiy antu apalangana mwi ngand yawonsu ya Idjibit mulong wa kukimb yishoshot yishadining kupwa kwa kwangul, ya kusadin pa ndond ya masuku. 13 Ni antakel in kuyisadish antu midimu ayiswidoshang anch: “Dichuku dawonsu muntu ni muntu ufanyidin kusal uvud wawiy umwing mud waday kusal pada kukwinkanyau masuku.” 14 Chikwau kand, antakel in kuyisadish antu midimu ayibula ankwash au atekau mulong wa kuyishinshikin In Isarel. Ayipula anch: “Mulong wak wawanyishanganap uvud wa matafad usadininganya? Yom yiney yashikenang nangalonsh, yashiken kal kand nlel.”

15 Chawiy ankwash atekau kuyishinshikin In Isarel aya kumudidin Farao anch: “Mulong wak uyisadina atushalapol ey mwamu? 16 Katwinkishinap masuku, pakwez atulejin anch, ‘Bulany matafad!’ Atubudin, pakwez antwey awiy afila nich.” 17 Pakwez Farao wayakula anch: “Usengenany,* usengenany* nakash! Yawiy ulondodinanya anch, ‘Tukimbin kuya, tukimbin kumupesh Yehova yakupesh.’ 18 Katat chirikany ku mudimu! Kakukwinkishanyap masuku, pakwez ukudandamenany kusal uvud wa matafad wawiy umwing.”

19 Chad ankwash atekau mulong wa kuyishinshikin In Isarel amana anch ad mu chaak mulong wa mbil yayinkishau anch: “Ufanyidinanyap kukepish ap pakemp uvud wa matafad ma kusal pa dichuku.” 20 Padokalau kwa Farao, atanijana ni Moses ni Aron, ading ayichingedina. 21 Ayela kapamp kamwing anch: “El Yehova aman yom wasadinanya ni akurumburishany, mulong Farao ni atushalapol end atukisin* mulong wenen ni watekinany mpak ya musamun mu chikas chau chakwel atujip.” 22 Chad Moses watala mes mwiur kud Yehova ni walonda anch: “Yehova, mulong wak wayimesha kal antu inay mar? Mulong wak wantumina? 23 Kudosh kamu dichuku naya kumanijan ni Farao mulong wa kwambamb nend mu dijin dey, ndiy uyimeshin antu inay mar chipandikena, ni uyikamunidinap ap pakemp antwey.”