Kubudik

7 Kupwa Yehova wamuleja Moses anch: “Tesh, nakusadin kwikal Nzamb kud Farao, ni mwanamakwey Aron ukwikal muprofet wey. 2 Ukuchirikin yom yawonsu nikukuleja, ni mwanamakwey Aron ukumulej Farao, ni Farao ukuyilik In Isarel chakwel abudik mwi ngand yend. 3 Am, nikumulik Farao achinchikish muchim, ni nikuvudish yijingidij ni yilay mwi ngand ya Idjibit. 4 Pakwez Farao kakukuteshanyap. Ni nikwazuk chikas cham pa Idjibit ni kuyibudish miril yam,* antwam, In Isarel, mwi ngand ya Idjibit nich dipup dikash.* 5 Ni In Idjibit akwijik chakin kamu anch yam Yehova panikonina chikas cham pa Idjibit ni kuyibudish In Isarel pakach pau.” 6 Moses ni Aron asala yom yayilejau kud Yehova; mwawiy kamu mwasalau. 7 Moses wading ni mivu makum chinan (80) ni Aron wading ni mivu makum chinan ni yisatu (83) pambambau ni Farao.

8 Chad Yehova wayileja Moses ni Aron anch: 9 “Anch Farao wakulejany anch, ‘Salany chilay,’ Ey Moses ukumulej Aron anch, ‘Non mukombu wey ni udjubula pansh kurutu kwa Farao.’ Mukombu ukukarumuk nnak mujim.” 10 Chawiy Moses ni Aron aya kumanijan ni Farao ni asala kamu mud mwayilejau kud Yehova. Aron wadjubula mukombu wend pansh kurutu kwa Farao ni atushalapol end, ni mukombu wakarumuka nnak mujim. 11 Pakwez, Farao watazuka amakuny in manang ni alaj, ni in kupesh asalang maji a mu Idjibit asala niyau yom yawiy yimwing nich maji mau. 12 Muntu ni muntu wadjubula mukombu wend pansh, ni yakarumuka annak ajim; pakwez mukombu wa Aron waminya mikombu yau. 13 Ap mwamu, Farao wachinchikisha muchim, ni kayiteshap, mud kamu mwalonday Yehova.

14 Kupwa Yehova wamuleja Moses anch: “Farao ukwet muchim ukash. Kakatinap kuyilikaku antwam. 15 Damashik pamanch yang ukamuman Farao. Ukukurumuk ku mem. Ufanyidin kumwimen ku chikum cha wit wa Nil mulong wa kumanijan nend; ni ukusend mu chikas chey mukombu wakarumukina nnak. 16 Ni ufanyidin kumulej anch, ‘Yehova Nzamb wa In Hebereu wantum kal kud ey, ni ulondin anch: “Yilika antwam chakwel aya akansadin mwi mpay,” pakwez kushik ni katat uziyidinap mazu mam. 17 Chawiy chilondinay Yehova anch: “Ou wawiy mutapu ukwijika anch yam Yehova. Nikimbin kubul pa mem ma wit wa Nil nich mukombu uda mu chikas cham, ni mem makukarumuk mash. 18 Ansh ada mu Nil akufa, ni wit wa Nil ukununk nakash, ni In Idjibit kakutwishap kuna mem ma mu wit wa Nil.”’”

19 Kupwa Yehova wamuleja Moses anch: “Muleja Aron anch, ‘Non mukombu wey ni wisika pa mem ma Idjibit, pa atuwit au, pa mipwambu yau,* pa masaz mau, ni pa yitend yau yawonsu,* chakwel yikarumuk mash.’ Mwi ngand yawonsu ya Idjibit mukwikal mash, ap mu yom ya mitond ni ya mayal ya kulamin mem.” 20 Kapamp kamwing Moses ni Aron asala mud mwayilejau kud Yehova. Aron wazambula mukombu ni waubula pa mem ma wit wa Nil kurutu kwa Farao ni kwa atushalapol end, ni mem mawonsu ma wit makarumuka mash. 21 Ansh ading mu wit afa, ni wit wasambisha kununk. In Idjibit katwishap kuna mem ma mu Nil, ni mwi ngand yawonsu ya Idjibit mwading mash.

22 Ap mwamu, in kupesh asalang maji a mu Idjibit asala niyau yom yawiy yimwing nich yom yau ya uchuku. Chawiy Farao wadandamena kuchinchikish muchim, ni kayiteshap, mud kamu mwalonday Yehova. 23 Farao wachirika ku chikumbu chend, ni kabangapaku yom yiney. 24 Chawiy In Idjibit awonsu apundang ku chikum cha Nil mulong wa kuman mem ma kuna, mulong kadingap ni mutapu wa kuna mem ma mu Nil. 25 Mwasuta machuku sambwad ma kabuj kupwa kwa Yehova kubul pa wit wa Nil.