Kubudik

8 Kupwa Yehova wamuleja Moses anch: “Yang umanijan ni Farao ni muleja anch, ‘Yehova ulondin anch: “Yilikaku antwam chakwel akansadin. 2 Anch wadandamen kuyikangesh kuya, nikulet chipupu cha amizabu mwi ngand yey yawonsu. 3 Wit wa Nil ukwizul amizabu, ni akubudik ni kwandam mu chikumbu chey, mu kapalakany key ka kulal, pa ulal wey, mu yikumbu ya atushalapol ey ni pad antwey, mu mafur* mey, ni mu malong mey makusampin mutand.* 4 Amizabu akwez pad ey, pad antwey, ni pad atushalapol ey awonsu.”’”

5 Mu kusut kwa chisu Yehova wamuleja Moses anch: “Muleja Aron anch, ‘Non mukombu wey ni wilika pa atuwit, pa mipwambu ya Nil, ni pa masaz, ni yibudisha amizabu chakwel apalangan mwi ngand ya Idjibit.’” 6 Chawiy Aron wilika mukombu wend pa mem ma mu Idjibit, ni amizabu asambisha kutuntuk ni kwizul mwi ngand ya Idjibit. 7 Pakwez, in kupesh asalang maji asala niyau mutapu wawiy umwing nich yom yau ya uchuku, niyau aleta amizabu mwi ngand ya Idjibit. 8 Kupwa Farao wayitazuka Moses ni Aron ni wayileja anch: “Mwilembinany Yehova chakwel adosh amizabu kud am ni kud antwam, mulong nikimbin kuyilikaku antwen chakwel aya akamupesh Yehova yakupesh.” 9 Chad Moses wamwakula Farao anch: “Yey amboku ukwinleja chisu nifanyidina kumwilembin Nzamb chakwel adosh amizabu kud ey, kud atushalapol ey, kud antwey, ni mu yikumbu yey. Akushal kusu ching mu wit wa Nil.” 10 Farao wamwakula anch: “Damashik.” Chawiy Moses wamuleja anch: “Yikusadik mud mwawita kal chakwel wijik anch kwikil muntu mukwau ap umwing uda mud Yehova Nzamb wetu. 11 Amizabu akukudokal, akudokal mu yikumbu yey, kud atushalapol ey, ni kud antwey. Akushal ching mu wit wa Nil.”

12 Chawiy Moses ni Aron adokala kwa Farao, ni Moses wamwilembina Yehova piur pa amizabu aletay pad Farao. 13 Chad Yehova wasala mud mwitay Moses, ni amizabu asambisha kufa mu yikumbu, mu jimpang, ni mu yir. 14 Ayikumangeja miruzu miruzu yakad kutwish kuchind, ni mwi ngand mwanunka. 15 Pamanay Farao anch yom yawap kal, wachinchikisha muchim wend ni walika kuyitesh, mud kamu mwalonday Yehova.

16 Chad Yehova wamuleja Moses anch: “Muleja Aron anch, ‘Onin mukombu wey ni ubula mu rufunfut ra pansh, rikukarumuk atumu mwi ngand yawonsu ya Idjibit.’” 17 Ni mwawiy mwasalau. Aron wonina mukombu wend ni waubula mu rufunfut ra pansh, chad atumu asambisha kuyivuvut antu ni annam. Rufunfut rawonsu ra pansh rakarumuka atumu mwi ngand yawonsu ya Idjibit. 18 In kupesh asalang maji apakisha kusal niyau mwamu, kulet atumu nich yom yau ya uchuku, pakwez katwishap. Atumu adandamena kuyivuvut antu ni annam. 19 Chawiy in kupesh asalang maji amuleja Farao anch: “Chinech chid chikas cha Nzamb!”* Pakwez Farao wadandamena kuchinchikish muchim wend, ni kayiteshap, mud kamu mwalonday Yehova.

20 Chad Yehova wamuleja Moses anch: “Damashik lank pamanch pafe ni yang ukamanijan ni Farao. Ukukurumuk ku mem. Ukumulej anch, ‘Yehova walondang anch: “Yilikaku antwam chakwel akansadin. 21 Pakwez anch uyilikinapaku antwam, nikutum amayand* pad ey, pad atushalapol ey, pad antwey ni mu yikumbu yey; yikumbu ya mu Idjibit yikwizul nich amayand, akwizul djat ni pansh piminyau.* 22 Dichuku dinida yom yiney yikushikenap ku Goshen, kushichau antwam. Kwinikwa kukwikalap amayand, mwamu ukwijik anch am, Yehova, nid mwi ngand mwinomu. 23 Ni nikumekesh kushalijan pakach pa antwam ni antwey. Yom yiney yikusadik damashik.”’”

24 Ni mwawiy mwasalay Yehova. Yisak yijim ya amayand yizula mu chikumbu cha Farao, mu yikumbu ya atushalapol end ni mwi ngand yawonsu ya Idjibit. Amayand ashesha ngand. 25 Nsuden Farao wayitazuka Moses ni Aron ni wayileja anch: “Yang ukamupeshany Nzamb wen yakupesh, pakwez mwi ngand mwinomu.” 26 Pakwez Moses wamwakula anch: “Tukutwishap kusal mwamu, mulong yakupesh tukumupesha Yehova Nzamb wetu yikuyikisish In Idjibit. Chad anch twalambul mu mes ma In Idjibit yakupesh yikisinau, ov, kakutwasap mayal? 27 Tukusal weny wa machuku masatu mwi mpay, ni kwinikwa kwawiy tukumulambwila Yehova Nzamb wetu yakupesh, mud mwatulejinay.”

28 Chad Farao walonda anch: “Nikukulik uyany ukamupeshany Yehova Nzamb wen yakupesh mwi mpay. Pakwez kangal wayany kulemp nakash. Mwilembinany mulong wamam.” 29 Moses wamwakula anch: “Nikimbin kuya, ni nikumwilembin Yehova. Damashik amayand akumudokal Farao, atushalapol end, ni antwend. Pakwez Farao ufanyidin kulik kutudimb* kusutin kuyikangesh antu kuya kumupesh Yehova yakupesh.” 30 Kupwa Moses wadokala kwa Farao ni wamwilembina Yehova. 31 Chawiy Yehova wasala mud mwamwitau kud Moses, ni amayand amudokala Farao, atushalapol end, ni antwend. Kwashalap ap umwing. 32 Pakwez, Farao wachinchikisha kand muchim ni kayilikishapaku antu.