In Levi
6 Yehova wamuleja kand Moses anch: 2 “Anch muntu wasal chitil ni walik kumushinshamen Yehova kusutin kumudimb mukwau piur pa chom chamwinkishau kulam, ap chom chamwinkishau mu chizu, wiy ap watambul chom cha mukwau mu kusadin makasu, 3 ap anch watan chom chashadikina ni wadimban piur pa chom chinech ni ap anch wachip ya makasu piur pa chitil chimwing pakach pa yitil yiney, ufanyidin kusal mwamu: 4 Anch wasalang chitil ni ufil nich, ufanyidin kuchirish chom chiyangay, chatambulangay ku usu, chatambulangay mu kusadin makasu, chamwinkishau kulam, chatanangay, 5 ap chom chasadinangay machip ma makasu. Ufanyidin kuchifutin difut diwanyidina ni kuwejaku ku difut dined chikunku chimwing pa yitan. Ukuyipan kud mwin chom pa dichuku dikwijikana chitil chend. 6 Ukumwinkish mwin kupesh chakupesh cha kwifish nich kurutu kwa Yehova, ikwal a mukoku wakad ulim ukweta usey uwanyidina. 7 Mwin kupesh ukwit kurutu kwa Yehova chakwel amulikishin ni akumulikishin mulong wa chom chin chawonsu chasalangay.”
8 Yehova wamuleja kand Moses anch: 9 “Muleja Aron ni anend anch: ‘Ech chawiy chijil piur pa chakupesh cha kosh: Chakupesh cha kosh chifanyidin kuchitek pa kasu kada pa chintamb uchuku wawonsu kushik pamanch, ni kasu kafanyidinap kujim pa chintamb. 10 Mwin kupesh ukudjal disun dend da mudimu da ndand wa leng ni ukudjal kaputul wend wa mukach wa ndand wa leng. Kupwa ukudosh mawut ma chakupesh cha kosh chatemang pa chintamb, wamatek kuns kwa chintamb. 11 Kupwa ukudjol masun madjalangay ni wadjal mindj, chad ukusend mawut, wamaya nich pol pa chibeng, pa ndond pinangina. 12 Kasu kafanyidinap kujim pa chintamb. Mwin kupesh ufanyidin kuwejap nkuny pamanch pawonsu ni koshinap chakupesh cha kosh ni many ma chakupesh cha chisambu chakwel mafind mish. 13 Kasu kafanyidinap kujim pa chintamb.
14 “‘Katat, ech chawiy chijil piur pa mulambu wa yakuda:* An a Aron awiy akuupana kud Yehova kurutu kwa chintamb. 15 Umwing wa pakach pau, ukutapulap chikas chimwing cha wung uwamp wa mulambu wa yakuda, ni ukusend many makemp ni diseng da malash ditok dawonsu, chad ukuyoshin pa chintamb chakwel yifind mish mud chakupesh cha pa kasu chikweta res ruwamp rimusangareshina* Yehova. Mwamu Nzamb ukutwish kuvurik mulambu wawonsu. 16 Yikushalap akuyida kud Aron ni anend. Akusal mikat yakad chivish ni akuyidil pa ndond yitumbila, mu chipang cha mwinkand wa kukumangen. 17 Chifanyidinap kusal mikat yiney nich chivish, chinech chawiy chikunku chau nayinkisha kal cha yakupesh yam ya pa kasu. Chid chom chitumbila nakash, mud chakupesh cha chitil ni chakupesh cha kwifish nich. 18 Akuyida kud mwan ikuny mwawonsu wa Aron. Chawiy chikunku chau cha rawonsu cha yakupesh ya pa kasu ya Yehova mu majuku mau mawonsu. Mwawonsu ukuyikwataku* ukwikal utumbila.’”
19 Yehova wamuleja kand Moses anch: 20 “Ou wawiy mulambu ukulambulay Aron ni anend kud Yehova pa dichuku dikumuzizinau many: chikunku chimwing pa dikum cha efa* cha wung uwamp mud mulambu wa yakuda wa chisu chawonsu, akulambul chikunku chimwing pamanch ni chikunku chikwau urel. 21 Akuukang pa mpany ni many. Chad ey ukuusamp nawamp nich many ni kuukatwol yikunku yikunku, kupwa ukuupan kud Nzamb mud mulambu wa yakuda wa kukang ukweta res ruwamp rimusangareshina* Yehova. 22 Mwin kupesh ukuzizinau many pakach pa anend mulong wa kumuswinkan, niyend ukusal mwamu. Mulambu wawonsu akez kamoshinau Yehova chakwel ufind mish, chinech chid chijil cha chikupu. 23 Mulambu wawonsu wa yakuda wa mwin kupesh ufanyidin kwikal mulambu wa kabuj. Chifanyidinap kuuda.”
24 Yehova wamuleja kand Moses anch: 25 “Muleja Aron nau anend anch: ‘Ech chawiy chijil piur pa chakupesh cha chitil: Pa ndond pakatau kujipin nnam wa chakupesh cha kosh, pawiy pakujipinau kand nnam wa chakupesh cha chitil, kurutu kwa Yehova. Chid chom chitumbila nakash. 26 Mwin kupesh ukuchipana mulong wa chitil, ndiy ukuchida. Ukuchidil pa ndond yitumbila, mu chipang cha mwinkand wa kukumangen.
27 “‘Chom chawonsu chikukwata kwi mbij ja chakupesh chikwikal chitumbila, ni anch muntu waminin mash makemp ma chakupesh chinech ku masun mend, ufanyidinany kututin masun minam pa ndond yitumbila. 28 Nnung yawonsu ya kam yikwisukinau chakupesh chinech chifanyidin kuyibaril, pakwez anch achisukin mwi nnung ya kwivre, nnung yiney chifanyidin kuyichak ni kuyowish mem.
29 “‘Ikuny mwawonsu uda mwin kupesh, ukutwish kuchida. Chid chom chitumbila nakash. 30 Pakwez chifanyidinap kuda mbij ja chakupesh cha chitil anch mash maj mamwing amatwalang mu mwinkand wa kukumangen, mwi ndond yitumbila mulong wa kubwik nich yitil. Chifanyidin kujosh kasu.