Kuchind

2 Chad Yehova wambamba ni Moses ni Aron, wayilej anch: 2 “In Isarel afanyidin kutekin chibeng pa ndond ya chisak chau cha michid yisatu, muntu ni muntu piswimp ni chijingidij cha chisak cha majuku mau. Akushakam kuns kuns kwa mwinkand wa kukumangen, ni kwawiy kukutala minkand yau.

3 “Chisak cha michid yisatu ya mu chibeng cha Yuda chikutekin chibeng ku mutambu wa kwingangel, kubudikidining muten, kukwatijan ni yisak yau;* Nashon mwan a Aminadab ndiy mukurump wa an a Yuda. 4 Afundau mu chisak chend cha amasalay ad tunan makum sambwad ni tunying ni yitot musamban (74 600). 5 Muchid wa Isakar ukutek chibeng piswimp ni ndiy; Netanel mwan a Zuwar ndiy mukurump wa an a Isakar. 6 Afundau mu chisak chend cha amasalay ad tunan makum matan ni tunying ni yitot yinying (54 400). 7 Kupwa pakwambaken muchid wa Zabulon; Eliyab mwan a Helon ndiy mukurump wa an a Zabulon. 8 Afundau mu chisak chend cha amasalay ad tunan makum matan ni sambwad ni yitot yinying (57 400).

9 “Antu awonsu afundau mu yisak ya amasalay ya mu chibeng cha Yuda ad tunan chitot makum chinan ni musamban ni yitot yinying (186 400). Afanyidin kwikal a kusambish kujip chibeng.

10 “Chisak cha michid yisatu ya mu chibeng cha Riben, kukwatijan ni yisak yau* chikwikal kwindum;* Elizur mwan a Shedewur ndiy mukurump wa an a Riben. 11 Afundau mu chisak chend cha amasalay ad tunan makum manying ni musamban ni yitot yitan (46 500). 12 Muchid wa Simeyon ukutek chibeng piswimp ni ndiy; Shelumiel mwan a Zurishaday ndiy mukurump wa an a Simeyon. 13 Afundau mu chisak chend cha amasalay ad tunan makum matan ni chidivu ni yitot yisatu (59 300). 14 Kupwa pakwambaken muchid wa Gad; Eliyasaf mwan a Reuwel ndiy mukurump wa an a Gad. 15 Afundau mu chisak chend cha amasalay ad tunan makum manying ni tutan ni yitot musamban ni makum matan (45 650).

16 “Antu awonsu afundau mu yisak ya amasalay ya mu chibeng cha Riben ad tunan chitot makum matan ni kamwing ni yitot yinying ni makum matan (151 450). Ni afanyidin kwikal a kaad kujip chibeng.

17 “Anch ashemunin mwinkand wa kukumangen, chibeng cha In Levi chifanyidin kwikal pakach ni pakach pa yibeng yikwau.

“Afanyidin kushemunik pakad kanvundangesh mud muda yibeng yau, muntu ni muntu pa ndond yend, kukwatijan ni yisak yau ya michid yisatu.

18 “Chisak cha michid yisatu ya mu chibeng cha Efrayim, kukwatijan ni yisak yau* chikwikal kurand; Elishama mwan a Amihud ndiy mukurump wa an a Efrayim. 19 Afundau mu chisak chend cha amasalay ad tunan makum manying ni yitot yitan (40 500). 20 Akumwambaken kud muchid wa Manase; Gamaliyel mwan a Pedazur ndiy mukurump wa an a Manase. 21 Afundau mu chisak chend cha amasalay ad tunan makum masatu ni twaad ni yitot yaad (32 200). 22 Kupwa pakulondul muchid wa Benjamin; Abidan mwan a Gideyoni ndiy mukurump wa an a Benjamin. 23 Afundau mu chisak chend cha amasalay ad tunan makum masatu ni tutan ni yitot yinying (35 400).

24 “Antu awonsu afundau mu yisak ya amasalay ya mu chibeng cha Efrayim ad tunan chitot ni chinan ni chitot (108 100), ni afanyidin kwikal a kasatu kujip chibeng.

25 “Chisak cha michid yisatu ya mu chibeng cha Dan, kukwatijan ni yisak yau* chikwikal kwinkaj;* Akiyezer mwan a Amishaday ndiy mukurump wa an a Dan. 26 Afundau mu chisak chend cha amasalay ad tunan makum musamban ni twaad ni yitot sambwad (62 700). 27 Muchid wa Azer ukutek chibeng piswimp ni ndiy; Pagiyel mwan a Okran ndiy mukurump wa an a Azer. 28 Afundau mu chisak chend cha amasalay ad tunan makum manying ni kamwing ni yitot yitan (41 500). 29 Kupwa pakwambaken muchid wa Nefitali; Ayira mwan a Enan ndiy mukurump wa an a Nefitali. 30 Afundau mu chisak chend cha amasalay ad tunan makum matan ni tusatu ni yitot yinying (53 400).

31 Antu awonsu afundau mu chibeng cha Dan ad tunan chitot makum matan ni sambwad ni yitot musamban (157 600). Afanyidin kwikal a nsuden kujip chibeng, kukwatijan ni yisak yau ya michid yisatu.

32 Inay awiy In Isarel afundau kukwatijan ni yisak ya majuku mau; uvud wawonsu wa amakuny ading mu yibeng afundau mu usalay wading tunan yitot musamban ni tusatu ni yitot yitan ni makum matan (603 550). 33 Pakwez In Levi kayifundap pamwing nau In Isarel akwau, mud kamu mwamulejau Moses kud Yehova. 34 In Isarel asala yom yawonsu yamulejau Moses kud Yehova kusal. Winou wawiy mutapu watekangau chibeng kukwatijan ni yisak yau ya michid yisatu ni wawiy mutapu wajipangau chibeng, muntu ni muntu kukwatijan ni dijuku dend ni kukwatijan ni yisak ya majuku mau.