Kuchind

9 Yehova wambamba ni Moses mwi mpay ya Sinay, ngond wa kusambish wa muvu wa kaad kupwa kwa kubudik mwi ngand ya Idjibit. Wamuleja anch: 2 “In Isarel afanyidin kurijek chakupesh cha Pasak pa chisu natenchika. 3 Ufanyidinany kuchirijek pa chisu natenchika pa dichuku da dikum ni kanying (14) da ngond winou kupwa kwa kwandam kwa muten.* Ufanyidinany kuchirijek kukwatijan ni mbil jawonsu ja Pasak ni mutapu wa kumusal.”

4 Chawiy Moses wayileja In Isarel kurijek chakupesh cha Pasak. 5 Chad arijeka chakupesh cha pasak pa dichuku da dikum ni kanying (14) da ngond wa kusambish, kupwa kwa kwandam kwa muten,* mwi mpay ya Sinay. In Isarel asala kukwatijan ni yom yawonsu yamulejau Moses kud Yehova.

6 Pakwez kwading amakuny ading ijondishang kal kusutin kukwat mujimbu wa muntu wading wafang kal,* ni kadingap kakweta mutapu wa kurijek chakupesh cha Pasak dichuku dinida. Chawiy aya kuyiman Moses ni Aron dichuku dinida 7 ni amuleja Moses anch: “Twijondin mulong twakwatang mujimbu wa muntu wafang kal.* Ov, tukanganya kamu kumwinkish Yehova mulambu pamwing nau In Isarel akwau pa chisu chatenchikay?” 8 Moses wayileja anch: “Chingelany pinap, nitesha bil yikulonday Yehova piur pen.”

9 Chad Yehova wamuleja Moses anch: 10 “Yileja In Isarel anch, ‘Ap anch muntu pakach pen ap anen akuvadika wijondish kusutin kukwat mujimbu wa muntu wafang kal* ap ud mu weny kulemp, ufanyidin kamu kurijek chakupesh cha Pasak cha Yehova. 11 Afanyidin kuchirijek pa dichuku da dikum ni kanying (14) da ngond wa kaad kupwa kwa kwandam kwa muten.* Afanyidin kuchida nich mikat yakad chivish ni ya mayij yiridina. 12 Kafanyidinap kushaku chom ap chimwing kushik pamanch, ni kafanyidinap kumubukun difup ap dimwing. Afanyidin kuchirijek kukwatijan ni chijil chawonsu cha Pasak. 13 Pakwez anch muntu wad wishitwil ni kadap kwend mu weny, chad walik kwend kurijek chakupesh cha Pasak, muntu winou chifanyidin kumujiyish* pakach pa antwend, mulong kamwinkishangap Yehova mulambu pa chisu chatenchikay. Yibudikin ya chitil chend yikwikal pa mutu wend.

14 “‘Ni anch kud ngez ushichanya nend, niyend ufanyidin kumurijekin Yehova chakupesh cha Pasak. Ufanyidin kusal mwamu kukwatijan ni chijil cha Pasak ni kukwatijan ni mutapu wa kumusal. Chijil chikwikal chimwing kud en awonsu, kud ngez ni kud mwiningand.’”

15 Chad dichuku dimikau dizang, didj dabwika dizang, mwinkand wa Uman. Pakwez urel, chom chifanakena ni kasu chashala pa dizang kushik pamanch. 16 Wawiy mutapu yadandamena kusadik: Muten, didj dabwikang pa dizang, ni uchuku, pading chom chifanakena ni kasu. 17 Anch kamu didj datumbuk pa mwinkand, In Isarel ayangang kapamp kamwing, ni pa ndond pimanyinang didj, pawiy patekinangau In Isarel chibeng. 18 In Isarel ayangang kusutin mbil ya Yehova, ni atekang chibeng kusutin mbil ya Yehova. Anch didj ditumbukinap pa dizang, niyau adandamenang kushakam. 19 Anch didj dashakam pa dizang machuku mavud, In Isarel amuziyinang Yehova ni kayangangap. 20 Yisu yimwing, didj dasalang machuku makemp pa dizang. Kusutin mbil ya Yehova atekang chibeng, ni kusutin mbil ya Yehova ayangang. 21 Yisu yimwing didj dashakamang kusu kwau kudokal urel kushik pamanch, ni anch datumbuk pamanch, niyau ayangang. Didj ditumbuka muten ap uchuku, niyau ayangang. 22 Didj disala machuku maad, ngond umwing, ap ni kusut, anch ditumbukinap pa dizang, In Isarel adandamenang kushakam ni kayangangap. Pakwez anch datumbuk, niyau ayangang. 23 Kusutin mbil ya Yehova atekang chibeng, ni kusutin mbil ya Yehova ayangang. Awanyishang chisend chadingau nich kurutu kwa Yehova kukwatijan ni mbil yamwinkishau Moses kud Yehova.