Kuvurik

24 “Anch ikuny wat mband, pakwez kamusangareshinap mulong wamen chom chiyimp ku mutambu wend, ufanyidin kumufundin mukand wa kujip nich uruw, wamwinkishau ni wamopat kol kwend. 2 Anch wadokal kol kwend, akutwish kand kwend kumwat kud ikuny mukwau. 3 Anch ikuny wa kaad niyend wamukis, wamufundin mukand wa kujip nich uruw, wamwinkishau ni wamopat kol kwend, ap anch ikuny winou wafa, 4 nfumwend wa kusambish wamopata, kafanyidinap kand kumuchirish ku uruw mulong wijondin kal. Chinech chid chom chitakanena kud Yehova. Ufanyidinap kutwal chitil mwi ngand yikwinkishinay Yehova Nzamb wey kuswan.

5 “Anch ikuny udokidinap pa kwatan, kafanyidinap kwandam mu usalay ap kumwinkish midimu yikwau. Kakusalap chom ap chimwing mu muvu wa kabuj, ukushakam kol kwend mulong wa kumusangaresh mukajend.

6 “Kwikil muntu ufanyidina kutambul mu chizu diyal da kutwa nich ap diyal dijim diding piur pa diyal dined, mulong mwamu chid mud watambul kal mwom* wa mukwau mu chizu.

7 “Anch muntu wamukwat mwanamakwend Mwin Isarel ku usu, wamumesh mar ni wamulandish, muntu winou ufanyidin kufa. Ufanyidinany kudosh uyimp pakach pen.

8 “Anch kwikal musong wa kasu,* sal usu wa kulimish yom yawonsu yikukulejau kud In Levi ada in kupesh. Sal kamu usu wa kulimish yom nayilejina. 9 Vurik yom yamusalau Miriam kud Yehova Nzamb wey, pawading udokilanya mu Idjibit.

10 “Anch wamusondjik mukwen chom, kangal waya wandam mu chikumbu chend mulong wa kunon chom chalonday kukwinkish mu chizu. 11 Ufanyidin kwimen pol, ni muntu wawasondjika ukwez wakwinkishin chizu chinech pol. 12 Anch muntu winou ud mu maswir, kangal waya walal ni chom chinech. 13 Ufanyidin kamu kumuchirishinach pakwandama muten, ni ndiy ukuya kulal ni masun mend ni ukukuyukish; mwamu ukwikal muntu utentamina kurutu kwa Yehova Nzamb wey.

14 “Kangal wamudimb* nsalamudimu kazweny uda mu maswir, ikala mwanamakwey ap ngez ushicha mwi ngand yen, mu misumb yen. 15 Ufanyidin kamu kumwinkish difut dend pa dichuku dinada, kurutu kwa muten kwandam, mulong difut dined dawiy dimukwashina kwikal mwom. Chamwamu anch wamudidin Yehova mulong weyey, chikwikal chitil kud ey.

16 “Chifanyidinap kuyijip atatuku mulong wa yom yikusalau anau, ni chifanyidinap kuyijip an mulong wa yom yikusalau atatukwau. Muntu ni muntu akumujip mulong wa chitil chend amwinend.

17 “Ufanyidinap kumurumburish ngez ap mwan anshon* mu mutapu uyimp, ni ufanyidinap kusend disun da mwadamufu mu chizu. 18 Vurik anch niyey wikala musuk mu Idjibit ni anch Yehova Nzamb wey ndiy wakukola. Chawiy nikulejidina kusal mwamu.

19 “Piukwangula mbut mu chir chey, anch wavuramenamu mubombu umwing wa mbut, ufanyidinap kuchirik mulong wa kuusend. Ukushal wa ngez, mwan anshon ni mwadamufu, chakwel Yehova Nzamb wey ayukish yom yawonsu usadina.

20 “Paukuturila mabuj mey ma oliv, ufanyidinap kand kwez kunyikesh kwi ntiy kapamp ka kaad. Mabuj makushalaku makwikal ma ngez, mwan anshon ni mwadamufu.

21 “Anch wapol mabuj ma nviny mu chir chey, ufanyidinap kand kuchirik mulong wa kupol mabuj makushala. Makushal ma ngez, mwan anshon ni mwadamufu. 22 Vurik anch niyey wikala musuk mwi ngand ya Idjibit. Chawiy nikulejidina kusal mwamu.