Kuvurik

3 “Kupwa twafumba, twayil mwi njil ya Bashan. Chad Og, mwant wa Bashan weza ni antwend awonsu mulong wakuturishikish ku Ederey. 2 Chawiy Yehova wanleja anch: ‘Kangal kwey wamov wom, mulong nikumupan mu makas mey, pamwing nau antwend awonsu ni ngand yend, ni ukumusal mud mwawamusalang Sihon mwant wa In Amor, wada ushicha ku Heshibon.’ 3 Chawiy Yehova Nzamb wetu wamupana kand Og, Mwant wa Bashan mu makas metu, pamwing ni antwend awonsu, ni twadandamena kuyijip djat kamu papwilau awonsu. 4 Chad twakwata misumb yend yawonsu. Kwikil musumb ap umwing twakanganya kuyitambul. Yawonsu yading makum musamban (60), yida mu chikunku chawonsu cha Arigob, charumburik anch want wa Og, mu Bashan. 5 Misumb yiney yawonsu yading yikwet jimpwembu jilemp, yis ni tuyand.* Twakwata kand misumb yikwau yivud yakad kwikal ni jimpwembu. 6 Pakwez mud mwatwamusala Sihon Mwant wa Heshibon, twayishesha yawonsu. Twashesha misumb yawonsu pamwing ni amakuny, amband ni an. 7 Ni twabuwa annam awonsu ni yom yawonsu ya mu misumb.

8 “Pa chisu chinicha, twakwata ngand ya ant aad In Amor ading ashicha mu chikunku cha Yordan, kusambishin kwi Nkurubuk ya Arnon kushik ku Mukandu wa Hermon 9 (mukandu winou autazukang kud In Sidon anch Siriyon, ni kud In Amor anch Senir), 10 pamwing ni misumb yawonsu ya ndond yalalela, misumb yawonsu ya Galad, ni misumb yawonsu ya Bashan kushik ku Salika ni ku Ederey, misumb yawonsu ya want wa Og, mu Bashan. 11 Og Mwant wa Bashan ndiy kusu wada washadina kal mwom pakach pa In Refayim. Mushet wend ausala nich utad ujal. Wading ukwet kulep kwa akude* chidivu ni kujimb kwa akude anying, kukwatijan ni kude wa kupim nich wijikena kud antu awonsu. Mushet wend uchid ni katat ku Raba kwa In Amon. 12 Pa chisu chinicha, twakwata ngand yinaya: yisambishidin ku Aroyer, uda piswimp ni Nkurubuk ya Arnon, ni yisendin chikunku cha ndond ya mikandu ya Galad. Misumb yidamu nayipana kud In Riben ni kud In Gad. 13 Chad chibar cha Galad chashalaku ni Bashan mwawonsu, charumburik anch want wa Og, nayipana ku chikunku cha muchid wa Manase. Chikunku chawonsu cha Arigob chida mu Bashan achitazukang anch ngand ya In Refayim.

14 “Jayir mwan wa Manase, wasenda chikunku chawonsu cha Arigob kushik ku mwimbu wa In Geshur ni In Maakat, mu Bashan, ni mal mawonsu madingamu wamapila dijin dend anch Havot-jayir,* ni mwawiy mumatazukinau kand kushik ni nlel unou. 15 Ni Galad namupana kud Makir. 16 Chad In Riben ni In Gad, nayinkisha chikunku chidokila ku Galad kushik kwi Nkurubuk ya Arnon, mwimbu wau wading usambishidin pakach ni pakach pa nkurubuk kushik ku Jabok, nkurubuk yitekidinau mwimbu nau In Amon, 17 nayinkinsha kand Araba, Yordan ni chikum chend, kudokal ku Kineret kushik ku karung wa Araba, charumburik anch Karung wa Mung, djat kamu kwinshin kwa Pisiga, mutambu wa kwingangel.

18 “Kupwa nakulejanya anch: ‘Yehova Nzamb wen wakwinkishinany ngand yiney chakwel uyiswanany. Amakuny awonsu akad wom pakach pen akez kipakat yom ya njit ni kwauk Yordan kurutu kwa anamakwen, In Isarel. 19 Ching kusu akajen, anen ni yivam yen (nij kamu nawamp anch ukwetany yivam yivud nakash) yawiy yikudandamena kushakam mu misumb nakwinkishinanya, 20 kushik ni pakuyikwashinau anamakwen kwiswedish kud Yehova, mud mutapu mwakukwashinanyay en, ni chakwel niyau aswan ngand yida ushad wa Yordan yayinkishinau kud Yehova Nzamb wen. Kupwa, muntu ni muntu ukuchirik chad mwi ngand yend ya uswan namwinkishina.’

21 “Pa chisu chinicha, namuleja Yoshua anch: ‘Ey amwiney wimenap kal nich mes mey yom yayisalau kal ant inay aad kud Yehova. Mwawiy kand mukumasalau mant mawonsu mada ushad wa Yordan kud Yehova. 22 Ufanyidinanyap kuyov wom, mulong Yehova Nzamb wen ndiy ukurishidinanya.’

23 “Pa chisu chinacha, namwilembina Yehova anch: 24 ‘A! Mukaleng Mwant Yehova, wasambish kal kumumekeshin kashalapol wey kujimb kwey ni chikas chey cha dikand, mulong nzamb ik kand uda mwiur ap pansh ukutwisha kusal yisalijok ya dikand mud ey? 25 Nilemb amboku, nlika naukaku Yordan, chakwel nimanaku ngand yida ushad, chikunku chinech chiwamp cha mikandu ni Liban.’ 26 Pakwez Yehova wad udandamedin kwinjimen mulong wenen, ni kanteshap. Chad Yehova wanleja anch: ‘Kwapwa kal! Kangal kand wanlej mulong winou kapamp kakwau. 27 Kandam pa musong wa mukandu wa Pisiga, utala kurand, kwinkaj, kwindum* ni kwingangel chakwel umana ngand yiney nich mes mey, mulong ukwaukap Yordan. 28 Mwikadisha Yoshua ntakel, mukasikesha ni kumwinkish usu, mulong ndiy ukwauka kurutu kwa antu inay, ni ndiy muntu ukuyikwasha kuswan ngand yiukumana.’ 29 Yom yiney yawonsu yasadika patwading tushicha mwi nkurubuk yitalijadina ni Bet-pewor.