Rut

2 Elimelek, nfumwend a Nawomi, wading ukwet mwanamakwend wading mpich nakash; dijin dend Bowaz.

2 Dichuku dimwing, Rut Mwin Mowab wamuleja Nawomi anch: “Nlika amboku niya kuboburol orj* mu yir, kwinyim kwa muntu ukwingovila riy.” Chad Nawomi wamwakula anch: “Yang kwey mwanam.” 3 Chawiy Rut waya ni wasambish kuboburol mu yir, kwinyim kwa in kwangul. Pakad kwijik, washika mu chir cha Bowaz wading mwanamakwend a Elimelek. 4 Pawiy pashikay Bowaz wading udokila ku Betlehem, ni wayela in kwangul anch: “Yehova ikal nen.” Niyau amwakula anch: “Yehova akuyukish.”

5 Kupwa Bowaz wamwipula nsand wading uyitakedina in kwangul anch: “Changadim winou ud wa mu dijuku da nany?” 6 Nsand wading uyitakedina in kwangul wamwakula anch: “Ud Mwin Mowab wadokila mwi ngand ya Mowab pamwing ni Nawomi. 7 Wangipulang anch: ‘Ov, nikutwish amboku kuboburol ni kukumangej mitu* ya orj yishilau in kwangul kwinyim?’ Kudosh kwashikinangay pamanch, udandamedin kwend kusal mudimu, washakam kal kamu katat ak mu urel mulong wa kwiswedishaku pakemp mwamu.”

8 Kupwa Bowaz wamuleja Rut anch: “Tesh, mwanam. Kangal waya kuboburol mu chir chikwau, ni kangal waya ndond yikwau; shal piswimp nau amilomb am. 9 Tal nawamp ndond yangwilau mu chir ni yang nau pamwing. Nayilejang kal atushalapol am anch kangal akukwataku.* Anch wov impu, yang una mem mada mu ansab mavitangau kal kud atushalapol am.”

10 Chawiy Rut wasa manungun, wazengam ni wamwipul anch: “Mulong wak wangovil kal riy, ni mulong wak wambangin kal ap anch nid kwam ngez?” 11 Bowaz wamwakula anch: “Anlejin yom yivud nakash wamusadidina maweney kupwa kwa rufu ra nfumwey. Wamushil tatukwey, makwey ni washil ngand yey ya chivadik mulong wa kuya kud antu wakad kwijik. 12 El Yehova akuyukish mulong wa yom wasadina, ni Yehova Nzamb wa Isarel akwinkish difut diwanyidina, mulong wezang kukimb diking mu mapur mend.” 13 Chad Rut walonda anch: “Nsalejam, wajikit kal mulong wa ranaken rey, mulong wangongoj kal, ni yom walonda kal yankasikesh kal, ap anch nidap mwilomb wey.”

14 Pa chisu cha kuda, Bowaz wamuleja anch: “Ez kunoku udap mukat ni utantap chikunku mwi nviny usasina.”* Chawiy Rut washakama pamwing nau in kwangul. Bowaz wamwinkisha orj wa kukang, ndiy wada, wikut ni washalap kand ni yikwau. 15 Patumbukay mulong wa kuboburol kand, Bowaz wayileja atushalapol end anch: “Mulikany aboburola kand mitu ya orj yakatulangau kal, ni kangal wamusalany chom chiyimp. 16 Piukatwilanya mitu ya orj, pwitanyap yimwing ni wamushilanyay kwinyim chakwel ayiboburola, ni kangal wamulondany chom ap chimwing mulong wa kumukangesh.”

17 Chawiy wadandamena kuboburol mu chir djat kamu urel. Pabulay mbut janonay, jizwila piswimp efa* umwing wa orj. 18 Kupwa wajinona, wajiya nich mu musumb, ni wamulejaj mawenend. Rut wabudisha kand yakuda yaday yashalaku ni wamwinkishay mawenend.

19 Chad mawenend wamwipula anch: “Kwisu waboburolang nlel? Kwisu wasalang mudimu? Ayuka kwend muntu wakubanginang.”* Chawiy Rut wamurumburila mawenend kwa muntu kwasalangay mudimu ni kumulej anch: “Nasalang mudimu mu chir cha ikuny umwing mwamu dijin dend Bowaz.” 20 Chad Nawomi wamuleja anch: “Ikuny winou amuyukish kud Yehova, udandamedina kumekesh rukat rend rishinshamena kud aom ni afu.” Nawomi wadandamena kand kulond anch: “Ikuny winou uding mwanamakwetu. Ud pakach pa anamakwetu akutwisha kutukol.”* 21 Chad Rut Mwin Mowab walonda anch: “Wanlejang kand anch: ‘Ikal piswimp nau atushalapol am kushik ni pakupwishinau kwangul mbut jam.’” 22 Nawomi wamuleja mawenend Rut anch: “Chiwapin kuya pamwing nau amilomb a Bowaz pa ndond pa kukumesh mar mu yir yikwau.”

23 Chawiy washala piswimp nau amilomb a Bowaz, ni waboburola kushik ni kwinsuden kwa chirung cha kwangul orj ni tidiku. Ni wadandamena kushakam pamwing ni mawenend.