Rut
3 Chad Nawomi wamwela mawenend anch: “Mwanam, nifanyidin kukukimbin dijuku* chakwel wikala ni musangar. 2 Bowaz ud mwanamakwetu. Wasalang mudimu pamwing nau amilomb end. Urel ou ukupep mbut pa ndond ya kubudin mbut. 3 Chawiy owal mem ni ipanaku many ma malash makemp mwamu; kupwa djal masun mawamp ukweta* ni yang kwi ndond ya kubudin mbut. Ukwiyijikish kud ndiy ching anch wapwish kuda ni kuna. 4 Pakuyay kulal, sal usu wa kwijik ndond yikulalay; kupwa yang, wamuburil ku mend ni walal kwinakwa. Ukukulej yom ufanyidina kusal.”
5 Rut wamwakula anch: “Nikusal yom yawonsu wanleja kal.” 6 Chawiy waya kwi ndond ya kubudin mbut ni wasala yom yawonsu yamulejau kusal kud mawenend. 7 Pa chisu chinacha, Bowaz wading ukat kuda ni kuna, ni muchim wend wading usanger. Kupwa waya kulal kwi ndond kwading kuruzukinau mbut. Chad Rut weza pakemp pakemp, wamuburil ku mend ni walal kwinakwa. 8 Kushik mu mapep ma uchuku, Bowaz wasambisha kuzal mashik. Chad walanka, washakam ni wamana mband umwing ulel ku mend mend. 9 Wamwipula anch: “Yey nany?” Ndiy wamwakula anch: “Yam mwilomb wey Rut. Muchidija mwilomb wey,* mulong ey ud mukol.” 10 Chad Bowaz wamwela anch: “Yehova akuyukish, mwanam. Wamekesh kal nakash rukat rishinshamena kapamp kinak kusutamu kapamp ka kusambish, mulong walikang kuyilondul ansand, ikala atuzweny ap ampich. 11 Chawiy katat mwanam, kangal wov wom. Nikukusadin yom yawonsu ukulonda, mulong antu awonsu mu musumb ij* anch ud mband muwamp nakash. 12 Pakwez ap anch nid kamu mukol, kud mukol mukwau uda wa piswimp nakash kwinsutamu am. 13 Lal pinap uchuku winou, ni anch wakukol pamanch, chid chom chiwamp! Akukola kwend. Mulong chiday chakin kamu Yehova mwom, anch kakatinap kwend kukukol, am nikukukol. Lal pinap kushik pamanch.”
14 Chawiy walala ku mend mend djat kamu pamanch ni walanka kurutu kutamuka nawamp chakwel kangal amujingunin kud muntu. Chad Bowaz walonda anch: “Kangal antu ijik anch kud mband wezang pa ndond ya kubudin mbut.” 15 Wamwela kand Rut anch: “Let disun udjita ad ni ditangurila.” Chawiy waditangurila, ni Bowaz wamutekinap yipim musamban* ya orj,* kupwa wamutwika ni Bowaz wachirika mu musumb.
16 Chad Rut wachirika kwa mawenend, ni mawenend wamwipula anch: “Yom yasutang nchik* mwanam?” Ndiy wamuleja yom yawonsu yamusadinau kud Bowaz. 17 Walonda kand anch: “Wanginkishang yipim musamban ya orj ey ni wanlejang anch: ‘Kangal waya kwa maweney makas mamwamu.’” 18 Chad Nawomi walonda anch: “Shakam kwey pinap mwanam, kushik ni piukwijikina mutapu ukusadika yom, mulong ikuny winou ukusal usu wa kupwish mulong winou nlel.”