Ezekiel

37 Yehova wading* niyamam, ni kusutin spiritu wend, Yehova wanzambula wantwal mukach ni mukach mwa nkurubuk, ni mwading mwizwil mafup too. 2 Wanyingumwisha mukach mwa mafup minam mawonsu ni namana anch mwi nkurubuk mwading mafup mavud nakash, ni mading mawumin chalakas. 3 Chad wangipula anch: “Mwan a muntu, ov, mafup minam makutwish kand kwikal ni mwom?” Namwakula anch: “Mukaleng Mwant Yehova, yey wija.” 4 Chawiy wanleja anch: “Lejan uprofet piur pa mafup minam ni maleja anch: ‘En mafup mawumina kal, teshany dizu da Yehova:

5 “‘Mukaleng Mwant Yehova umedin mafup minam anch: “Nikukupepinany rinkind ni ukwikalany kand aom. 6 Nikukutekany mijir, mbij, yikit ni kukupepinany rinkind, chad ukwikalany kand aom, ni ukwijikany kamu anch yama Yehova.”’”

7 Kupwa nalejana kamu yom yawonsu yanlejay. Panasambisha kamu kulejan yom yiney mwamu, natesha masok ma mafup mading mabubijadina ni kwinung. 8 Kupwa namana mijir, mbij ni yikit yez yibwikaku. Pakwez mading kand kal mikal ni rinkind.

9 Chad wanleja anch: “Mwan a muntu muleja rinkind anch: ‘Mukaleng Mwant Yehova ulondin anch: “Rinkind, dokal ku makonk mawonsu manying ni ez wandam mu mijimbu ya antu inay ajipau chakwel ikal kand aom.”’”

10 Chawiy nalejana kamu yom yawonsu yanlejay, chad rinkind wandama mu mafup minam ni mikala kand ni mwom. Matumbuka piur ni mikala amasalay avud nakash.

11 Kupwa wanleja anch: “Mwan a muntu, mafup minam awiy In Isarel awonsu. Awiy ad kulondang anch: ‘Mafup metu mawumin kal ni tukwetap kwetu ruchingej. Kwatupwil kal kwetu.’ 12 Chawiy yileja anch: ‘Mukaleng Mwant Yehova ulondin anch: “En antwam, nikufungul jinzay jen ni kukuvumbulany, ni nikukuchirishany kand mwi ngand ya Isarel. 13 En antwam, panikufungula jinzay jen ni kukuvumbulany, ukwijikany kamu anch yama Yehova.”’ 14 ‘Nikukwinkishany spiritu wam ni ukwikalany kand aom, kupwa nikukuchirishany mwi ngand yen. Chad ukwijikany kamu anch yama Yehova nalonda kal ni kusal yom yiney.’ Mwawiy mulondinay Yehova.”

15 Yehova wanleja kand anch: 16 “Ey mwan a muntu, non chikunku cha mutond ni fundap anch: ‘Cha Yuda ni In Isarel awonsu aday nend.’ Kupwa non chikunku cha mutond chikwau ni fundap anch: ‘Cha Jozef, chida chikunku cha mutond cha Efrayim ni In Isarel awonsu aday nend.’ 17 Kupwa yikwatikesha yawonsu chakwel yikal kwau mud mutond umwing mu chikas chey. 18 Anch anamakwey akwipul anch: ‘Yom yiney wasala kal yirumburikin ik?’ 19 Ufanyidin kuyakul anch: ‘Mukaleng Mwant Yehova ulondin anch: “Nikunon chikunku cha mutond cha Jozef chida mu chikas cha Efrayim, ni michid ya Isarel yiday nend, nachikwatikesh ni chikunku cha mutond cha Yuda, chakwel wikal mutond umwing ni ukwikal kamu mutond umwing mu chikas cham.”’ 20 Yikunku ya mitond ukufunda, yifanyidin kwikal mu chikas chey chakwel awiy ayiman nawamp.

21 “Kupwa yileja anch: ‘Mukaleng Mwant Yehova ulondin anch: “Nikuyidosh In Isarel awonsu mu jingand jayilau kal, nikuyidosh kwawonsu kudau nayikumangej pamwing ni nayichirish mwi ngand yau. 22 Panikuyichirisha mwi ngand yau, pa mikandu ya Isarel, nikuyikadish muchid umwing. Awonsu akuyitakel kwau kud mwant umwing, kakwikalap kand michid yaad ap kwaurik mu mant maad. 23 Kakwijondishap kand kusutin atupwany au atakanena,* yisal yau yitakanena ni yitil yau yawonsu. Nikuyikwash kwiyep yisal yau yawonsu yiyimp yayisadikisha yitil ni nikuyishitwish. Akwikal antwam ni am nikwikal Nzamb wau.

24 “‘“Kashalapol wam David ndiy ukwikala mwant wau, ni awonsu akwikal kwau ni kafung umwing. Akulimish mipak yam ni kuziyin kamu nawamp kwi mbil jam. 25 Akushakam mwi ngand namwinkisha kashalapol wam Jakobu, mwashakamau angakiril en, awiy pamwing nau anau* ni ijukurau akushakam mwinamwa chikupu ni chikupu, ni kashalapol wam David ukwikal ntakel wau rawonsu.

26 “‘“Nikusuk nau mansuk ma chisambu ni makwikal mansuk ma chikupu. Nikuyishichik mwi ngand ni nikuyivudish nakash, ni nikutek tempel wam mukach mwau chikupu ni chikupu. 27 Mwinkand wam ukwikal* pakach pau, am nikwikal Nzamb wau ni awiy akwikal antwam. 28 Antu a michid akwijik kamu anch am Yehova, niyishitwishin In Isarel panikuteka tempel wam mukach mwau chikupu ni chikupu.”’”