Disambishil

1 Kwinsambishil, Nzamb watanga diur ni divu.

2 Chad divu dading damwamu, dakad chom; kwading mididim piur pa mem* ni spiritu wa Nzamb* wading ukat kutambitamb piur pa mem.

3 Chad Nzamb walonda anch: “Chifanyidin kwikala chitokish.” Chawiy kwikala chitokish. 4 Kupwa Nzamb wamana anch chitokish chading chiwamp, ni wasambisha kwauril chitokish ni mididim. 5 Nzamb watazuka chitokish anch Muten,* pakwez mididim anch Uchuku. Kwikala urel ni kwikala pamanch, dichuku da kusambish.

6 Kupwa Nzamb walonda anch: “Chifanyidin kwikala dipway dijim pakach pa mem, chakwel mem maurika mu yikunku yaad.” 7 Chad Nzamb wasambisha kusal dipway dijim ni kwauril mem mading piur pa dipway dijim ni mem mading mwinshin mwa dipway dijim. Ni mwawiy chasadika. 8 Nzamb watazuka dipway dijim anch Diur. Kwikala urel ni kwikala pamanch, dichuku da kaad.

9 Kupwa Nzamb walonda anch: “Chifanyidin mem mada mwinshin mwa diur mikunga pa ndond yimwing, ni chifanyidin ngand yiumina yimekan.” Ni mwawiy chasadika. 10 Nzamb watazuka ngand yiumina anch Divu, pakwez mem mikunga anch Aturung. Ni Nzamb wamana anch chading chiwamp. 11 Kupwa Nzamb walonda anch: “Chifanyidin divu diminyisha masuku, mitond yikata kubudish ntit, mitond yawonsu ya mitapu kushalijan yikata kusong mabuj ni mitond yikata kusong mabuj makweta ntit.” Ni mwawiy chasadika. 12 Chad divu dasambisha kuminyish masuku, mitond yikata kubudish ntit ni mitond yikata kusong mabuj makweta ntit, yawonsu kukwatijan ni mitapu yau. Kupwa Nzamb wamana anch chading chiwamp. 13 Kwikala urel ni kwikala pamanch, dichuku da kasatu.

14 Kupwa Nzamb walonda anch: “Chifanyidin kwikala yimunyik* mu dipway dijim da mwiur mulong wa kwauril uchuku ni muten; chakwel yikala yijingidij ya yirung, machuku ni mivu. 15 Yikumunyikang mu dipway dijim da mwiur mulong wa kutokish pa divu.” Ni mwawiy chasadika. 16 Chad Nzamb wasambisha kutang yimunyik yijim yaad, chimunyik chijim chakwel chimunyikang muten ni chimunyik chikemp chakwel chimunyikang uchuku. Ni watanga kand atutumbu. 17 Chad Nzamb wayiteka mu dipway dijim da mwiur mulong wa kutokish pa divu, 18 mulong wa kumunyikang muten ni uchuku ni mulong wa kwauril chitokish ni mididim. Kupwa Nzamb wamana anch chading chiwamp. 19 Kwikala urel ni kwikala pamanch, dichuku da kanying.

20 Kupwa Nzamb walonda anch: “Chifanyidin mu mem mwizul yitang* yikweta mwom, ni chifanyidin yitang yikweta mapur yitwika piur pa divu, mu dipway dijim da mwiur.” 21 Chad Nzamb wasambisha kutang yitang yijim ya mu karung ni yitang yawonsu yikweta mwom* yikata kwend ni yikata kwisay mu mem kukwatijan ni mitapu yau, ni yitang yawonsu yikweta mapur kukwatijan ni mitapu yau. Ni Nzamb wamana anch chading chiwamp. 22 Kupwa Nzamb wayiyukisha ni wayileja anch: “Valijanany, vulijanany ni izulany mu mem ma mu karung, ni chifanyidin yitang yikweta mapur yivulijan pa divu.” 23 Kwikala urel ni kwikala pamanch, dichuku da katan.

24 Kupwa Nzamb walonda anch: “Chifanyidin divu dibudish yitang yikweta mwom* kukwatijan ni mitapu yau, annam a pol, annam akata kwikak pansh ni annam a mu masuku kukwatijan ni mitapu yau.” Ni mwawiy chasadika. 25 Chad Nzamb wasambisha kutang annam a mu masuku kukwatijan ni mitapu yau, annam a pol kukwatijan ni mitapu yau ni annam awonsu akata kwikak pansh kukwatijan ni mitapu yau. Ni Nzamb wamana anch chading chiwamp.

26 Kupwa Nzamb walonda anch: “El tumutang muntu mu chifu chetu, ukufanakana ni yetwetu, ni chifanyidin ayikel ansh a mu karung, yitang yikweta mapur ya mwiur, annam a pol, divu dawonsu ni annam awonsu a pa divu akata kwikak pansh.” 27 Chad Nzamb wasambisha kumutang muntu mu chifu chend, wamutanga mu chifu cha Nzamb; ndiy wamutanga ikuny ni mband. 28 Kupwa Nzamb wayiyukisha ni wayileja anch: “Valijanany, vulijanany, izwishany divu ni kudiyikel, yikelany ansh a mu karung, yitang yikweta mapur ya mwiur ni yitang yawonsu yikweta mwom yikata kwend pa divu.”

29 Kupwa Nzamb walonda anch: “Katat nakwinkishany kal mitond yawonsu yikata kubudish ntit pa divu da kabuj ni mitond yawonsu yikata kusong mabuj makweta ntit. Yikala yakuda yen. 30 Ni annam awonsu a mu masuku a pa divu, yitang yawonsu yikweta mapur ya mwiur, ni yitang* yawonsu yikweta mwom yikata kwend pa divu, nayinkish kal masuku mawonsu matalel chakwel yikal yakuda yau.” Ni mwawiy chasadika.

31 Kupwa, Nzamb watala yom yawonsu yatangay ni wamana anch yading yiwamp nakash. Kwikala urel ni kwikala pamanch, dichuku da musamban.