Disambishil
28 Chawiy Izak wamutazuka Jakobu, wamuyukish ni wamuleja anch: “Ufanyidinap kwat mband pakach pa ayangadim In Kanaan. 2 Yang ku Padan-aram ku chikumbu cha Betuwel, tatukwend a makwey, ni at mband kwinakwa pakach pa ayangadim a Laban, mpanyend a makwey. 3 Nzamb Mwin Dikand Dawonsu ukukuyukish ni ukukwinkish an avud nakash, ni ukwikal chakin kamu chikumangen cha antu avud. 4 Ni ukukwinkish ey ni aney* chiyukish cha Abraham, chakwel utwisha kuswan ngand yiwashakama mud ngendj, ngand yamwinkishau Abraham kud Nzamb.”
5 Chawiy Izak wamutuma Jakobu, ni waya ku Padan-aram kwa Laban mwan wa Betuwel Mwin Aram, mpanyend a Rebeka, makwend a Jakobu ni Esau.
6 Esau wamana anch Izak wamuyukisha Jakobu ni wamutuma ku Padan-aram mulong wa kwat mband kwinakwa, ni anch pamuyukishay, Izak wamuleja anch: “Kangal wat mband pakach pa ayangadim In Kanaan,” 7 wamana kand anch Jakobu wamuziyina tatukwend ni makwend ni waya ku Padan-aram. 8 Chad Esau wajingunina anch tatukwend Izak wading uyikisin ayangadim In Kanaan, 9 chawiy kudoshaku amband akwau ading atay kal, Esau waya kwa Ismayel ni wamwat Mahalat, mwan wa Ismayel, mwan wa Abraham, mpanyend* a Nebayot.
10 Jakobu wadokala ku Ber-sheba ni waya ku mutambu wa Haran. 11 Kupwa kwa chisu kanang, washika pa ndond yimwing mwamu ni wirijeka mulong wa kulal pinapa mulong muten wading wandamang kal. Chad wanona diyal dimwing, waditek mulong wa kwazukap mutu, ni walala pinapa. 12 Chad wasambisha kulat, wamana chikandamin chidokila pansh ni chiyil djat mwiur; chad angel a Nzamb ading akat kukandam ni kushirik pa chikandamin chinech. 13 Ni Yehova wading wiminy piur pa chikandamin chinech, chad wamuleja anch:
“Am yam Yehova Nzamb wa tatukwey Abraham ni Nzamb wa Izak. Ngand ulela ey, nikukwinkishay ey ni aney.* 14 Chakin kamu, aney* akwikal avud nakash mud rufunfut ra pansh, akupalangan kurand ni kwingangel, kwinkaj ni kwindum, ni kusutin ey ni aney,* majuku mawonsu ma pa divu makez kuyuk chakin kamu. 15 Am nid ney, nikukuchidij kwawonsu kuukuya, ni nikukuchirish kand mwi ngand yiney. Nikukulikap djat ni panikuwanyishina yom nakukana kal.”
16 Kupwa Jakobu wakashimuka pa tul ni walonda anch: “Chakin kamu Yehova ud pa ndond yiney, ni am nadap kwam nija.” 17 Chad wova wom ni wawejinaku anch: “Ndond yiney yishimokishen kamu nakash! Yikutwish kamu kwikal chikumbu cha Nzamb, ni pawiy pinap pada chis cha mwiur.” 18 Chawiy Jakobu walanka pamanch nakash, wanon diyal dazukay mutu, wadimik mud dinguj ni wichilap many. 19 Chad wapila ndond yinaya anch Betel, pakwez musumb winou autazukang pakur anch Luz.
20 Kupwa Jakobu wachipa anch: “Anch Nzamb wadandamen kwikal niyam ni wanchidij mu weny wam, ni anch wanginkish yakuda* ni masun ma kudjal 21 ni nachirik mu chisambu ku chikumbu cha tatukwam, Yehova ukumekesh chakin kamu anch ud Nzamb wam. 22 Ni diyal dined nimika kal mud dinguj dikwikal chikumbu cha Nzamb, ni chakin kamu nikumwinkish Nzamb chadikum cha yom yawonsu yikwinginkishay.”