Disambishil

40 Kupwa kwa yom yiney, mukurump wa anfansey* a mwant wa Idjibit ni mukurump wa in kusal mikat amurumbukina nsalejau, mwant wa Idjibit. 2 Chawiy Farao wayijimena atushalapol end inay aad, mukurump wa anfansey ni mukurump wa in kusal mikat, 3 ni wayidjubwila mu rukan ra mukurump wa atulam end, mwadingay Jozef. 4 Chad mukurump wa atulam wamwinkisha Jozef chisend cha kuyilam ni kuyibangin, ni ashakama mu rukan mu machuku kanang.

5 Chad mu rukan mwinamwa, nfansey ni mwin kusal mikat ya mwant wa Idjibit, awonsu aad alata yilat mu uchuku umwing, chilat ni chilat chading ni kurumburik kwach. 6 Chikwacha pamanch, payay Jozef kuyital, wamana anch ading anenganen. 7 Chawiy wayipula anch: “Mulong wak unenganenany mwamu nlel?” 8 Awiy amwakula anch: “Etu awonsu twalatang yilat, pakwez tumenap mwin kuturumburilay.” Chad Jozef wayileja anch: “Ing Nzamb ndiy ukata kurumburil yilat, kimwawiyap? Nlejanyay bil amboku.”

9 Chawiy mukurump wa anfansey wamuleja Jozef chilat chend anch: “Nalatang mutond wa nviny ud kurutu kwam. 10 Ni ku mutond winou kwading mitiy yisatu, kupwa wasambishang kusapurik ni kubudish yisalamb, ni yizakas ya mabuj ma nviny yasambishang kuswa. 11 Nading nilamin rupas ra Farao mu chikas, chad nakwatang mabuj ma nviny ni nasambish kumakamin mu rupas ra Farao. Kupwa namwinkishang Farao rupas mu chikas chend.” 12 Jozef wamuleja anch: “Oku kwawiy kurumburik kwa chilat chey: Mitiy yisatu yimekeshin machuku masatu. 13 Mu machuku masatu, Farao ukukubudish mu rukan, ukukuchirish pa ndond yey, ni ukumwinkish Farao rupas mu chikas mud muwasalang piwading nfansey wend. 14 Pakwez wanvurikaku amboku anch yom yend nawamp ku mutambu wey. Nmekeshinaku amboku rukat rishinshamena ni nlondinaku kud Farao, chakwel ambudishaku mwi ndond yiney. 15 Mulong andosha mwi ngand ya In Hebereu, ni kwikil chom chiyimp nasadina kunoku mulong wa kwintek mu rukan.*

16 Pamanay mukurump wa in kusal mikat anch Jozef warumburil kal chom chiwamp, wamuleja anch: “Niyam nalatang yimpay yisatu ya mikat yitok yading pa mutu wam, 17 mu chimpay cha piur, mwading yakuda ya mitapu ni mitapu ya kosh ya Farao, ni atujil ading akat kuyidil mu chimpay pa mutu wam.” 18 Jozef wamuleja anch: “Oku kwawiy kurumburik kwa chilat chey: Yimpay yisatu yimekeshin machuku masatu. 19 Mu machuku masatu, Farao ukukukatul mutu ni ukukuzezidik ku mutond, chad atujil akuda mbij jey.”

20 Kupwa kwa machuku masatu, Farao wasala musambu wa dichuku da kuvadik kwend, wayitazuka atushalapol end awonsu, ni wamubudisha mukurump wa anfansey ni mukurump wa in kusal mikat kurutu kwa atushalapol end. 21 Wamuchirisha mukurump wa anfansey pa ndond yend, ni wadandamena kumwinkishang Farao rupas mu chikas. 22 Pakwez wamuzezidika mukurump wa in kusal mikat, mud mwarumburilay Jozef. 23 Pakwez mukurump wa anfansey kamuvurikap Jozef; wamuvuramena.