Disambishil

11 Chad antu awonsu a pa divu alondang kwau dizu dimwing. 2 Payau ku mutambu wa kwingangel, ajingunina mpat mwi nkurubuk, mwi ngand ya Shinar, ni ashakama mwinamwa. 3 Chad alejijana anch: “Ez tubulany matafad ni tumoshany.” Chawiy atunga ni matafad pa ndond pa kutung ni mayal, ni atunga nich pwat pwat wa kaudimbu. 4 Alejijana kand anch: “Ez tutungany musumb ni rubumbu rilemp rikweta musong ukushika mwiur, ni twikalany ni dijin dijikena nakash, chakwel kangal twapalangan pa divu da kabuj.”

5 Chad Yehova washirika mulong wa kutal musumb ni rubumbu ratungau an a antu. 6 Chawiy Yehova walonda anch: “Antu inay ad antu amwing ni alondin dizu dimwing, chad tal yom yasambishau kal kusal. Katat kwikil chom ap chimwing chitonginau chikukanganyau kusal. 7 Ez tushirikany ni turumbangeshany dizu dau chakwel kangal ovijana umwing ni mukwau.” 8 Chawiy Yehova wayaurola pinapa ni wayipalangeshina pa divu da kabuj, pakemp pakemp, alikap kutung musumb. 9 Chawiy chaupilau musumb winou anch Babel, mulong kwinikwa kwawiy kwarumbangeshinay Yehova dizu da antu awonsu a pa divu, ni kwawiy kwayipalangeshinay Yehova pa divu da kabuj.

10 Er rawiy rusang ra Sem:

Sem wading ni mivu chitot (100) pamuvalay Aripakishad, mivu yaad kupwa kwa Mabeb. 11 Kupwa kwa kumuval Aripakishad, Sem wasala kand mivu yitot yitan (500). Ni wavala an amakuny ni amband.

12 Aripakishad wasala mivu makum masatu ni yitan (35), kupwa wamuvala Shela. 13 Kupwa kwa kumuval Shela, Aripakishad wasala kand mivu yitot yinying ni yisatu (403). Ni wavala an amakuny ni amband.

14 Shela wasala mivu makum masatu (30), kupwa wamuvala Eber. 15 Kupwa kwa kumuval Eber, Shela wasala kand mivu yitot yinying ni yisatu (403). Ni wavala an amakuny ni amband.

16 Eber wasala mivu makum masatu ni yinying (34), kupwa wamuvala Pelek. 17 Kupwa kwa kumuval Pelek, Eber wasala kand mivu yitot yinying ni makum masatu (430). Ni wavala an amakuny ni amband.

18 Pelek wasala mivu makum masatu (30), kupwa wamuvala Reu. 19 Kupwa kwa kumuval Reu, Pelek wasala kand mivu yitot yaad ni chidivu (209). Ni wavala an amakuny ni amband.

20 Reu wasala mivu makum masatu ni yaad (32), kupwa wamuvala Seruk. 21 Kupwa kwa kumuval Seruk, Reu wasala kand mivu yitot yaad ni sambwad (207). Ni wavala an amakuny ni amband.

22 Seruk wasala mivu makum masatu (30), kupwa wamuvala Nahor. 23 Kupwa kwa kumuval Nahor, Seruk wasala kand mivu yitot yaad (200). Ni wavala an amakuny ni amband.

24 Nahor wasala mivu makum maad ni chidivu (29), kupwa wamuvala Tera. 25 Kupwa kwa kumuval Tera, Nahor wasala kand mivu chitot dikum ni chidivu (119). Ni wavala an amakuny ni amband.

26 Tera wasala mivu makum sambwad (70), kupwa wamuvala Abram, Nahor ni Haran.

27 Er rawiy rusang ra Tera:

Tera wamuvala Abram, Nahor ni Haran; chad Haran wamuvala Lot. 28 Haran wafila mwi ngand yend ya chivadik, mu Ur wa In Kalideya, pachadingay tatukwend Tera mwom. 29 Abram ni Nahor atana. Mband a Abram dijin dend Saray ni mband a Nahor dijin dend Milka, mwan mband a Haran, tatukwend a Milka ni Yisika. 30 Pakwez Saray kadingap ni mwan mulong wading mumb.

31 Kupwa Tera wamusenda mwanend Abram ni mwijukurend Lot, mwan wa Haran, ni mawenend Saray, mband a mwanend Abram, chad wadokala nau mu Ur wa In Kalideya mulong wa kuya mwi ngand ya Kanaan. Pakwez pashikau mu Haran, ashakama kwinakwa. 32 Tera wasala mivu yitot yaad ni yitan (205). Kupwa wafila mu Haran.