Kuchind

13 Chad Yehova wamuleja Moses anch: 2 “Tum amakuny aya endish ngand ya Kanaan, niyinkishina In Isarel. Ukutum ikuny umwing pa muchid ni muchid wa atatukwau, muntu ni muntu ufanyidin kwikal mukurump wa antu.”

3 Chawiy Moses wayituma kudokal mwi mpay ya Paran mud mwalejanay Yehova. Amakuny inay awonsu ading antakel a In Isarel. 4 Am mawiy majin mau: Ku muchid wa Riben, Shamuwa mwan a Zakur; 5 ku muchid wa Simeyon, Shafat mwan a Hori; 6 ku muchid wa Yuda, Kaleb mwan a Jefune; 7 ku muchid wa Isakar, Yigal mwan a Jozef; 8 ku muchid wa Efrayim, Osheya mwan a Nun; 9 ku muchid wa Benjamin, Paliti mwan a Rafu; 10 ku muchid wa Zabulon, Gadiel mwan a Sodi; 11 ku muchid wa Jozef, mulong wa muchid wa Manase, Gaddi mwan a Susi; 12 ku muchid wa Dan, Amiyel mwan a Gemali; 13 ku muchid wa Azer, Setur mwan a Mikayel; 14 ku muchid wa Nefitali, Nabi mwan a Vofisi; 15 ku muchid wa Gad, Gewel mwan a Maki. 16 Minam mawiy majin ma amakuny atumay Moses mulong wa kwendish ngand. Ni Moses wamupila Osheya mwan a Nun anch Yoshua.*

17 Payitumay Moses mulong wa kwendish ngand ya Kanaan, wayileja anch: “Kaninikany ku Negeb, ni kupwa kaninikany kwi ndond ya mikandu. 18 Ufanyidinany kushinshikin anch yid ngand ya mutapu ik ni anch antu ashichamu akwet usu ap aziyin, anch ad avud ap akemp, 19 anch ngand yiwapin ap yiyipin, ni anch misumb mushichau yid mwi mpwembu ap bwat. 20 Talany kand anch divu difukin ap bwat,* anch mud mitond ap bwat. Ufanyidinany kutakaman ni kusendaku mabuj makemp ma mwi ngand.” Chad chading chirung cha mabuj maswila ma nviny ma kusambish.

21 Chawiy akaninika ni endisha ngand kudokal kwi mpay ya Zin djat ku Rewob, piswimp ni Lebo-Hamat.* 22 Pakaninikau ku Negeb, ashika ku Heberon, kwading kushichau Ayiman, Sheshay, ni Talmay, In Anak. Musumb wa Heberon ading autungin kal mivu sambwad kurutu kwa kutung musumb wa Sowan wa mu Idjibit. 23 Pashikau mwi nkurubuk ya* Eshikol, akatula mutiy wading ukweta chizakabu chimwing cha mabuj ma nviny, chading chitina kusend ku mukol kud amakuny aad. Apola kand mabuj ma grenad ni mabuj ma fig. 24 Apila nkurubuk yiney* anch Eshikol, mulong wa chizakabu cha mabuj chakatulau In Isarel mwinimwa.

25 Papwa machuku makum manying (40), achirika kwayau mu kwendish ngand. 26 Chawiy achirika kud Moses, Aron, ni chisak chawonsu cha In Isarel mwi mpay ya Paran, ku Kadesh. Alejana rusang ku chisak chawonsu ni ayileja mabuj ma mwi ngand. 27 Ey yawiy yom yamulejau Moses: “Twandamin mwi ngand watutumina, ni chakin kamu mupwekin mayel ni woch; am mawiy mabuj ma mwi ngand. 28 Pakwez, antu ashicha mwi ngand akwet usu, ni misumb yida mwi mpwembu yid yijim nakash. Twamanangamu ni In Anak. 29 In Amalek ashich mwi ngand ya Negeb; In Het, In Jebus, nau In Amor ashich kwi ndond ya mikandu; In Kanaan ashich piswimp ni karung ni kuns kuns kwa Yordan.”

30 Chad Kaleb wapakisha kuyidutish antu ading iminya kurutu kwa Moses, walonda anch: “Tukaninikany pakad kulab, ni chakin kamu tukutambul ngand, mulong chakin kamu tukutwish kuyikwat.” 31 Pakwez amakuny aya nend akula anch: “Tukutwishap kurish nau antu inay, mulong akwet usu nakash kutupandakan.” 32 Ni adandamena kuyilej In Isarel yom yiyimp piur pa ngand yayau kwendish, ayilejang anch: “Mwi ngand twendanganang mulong wa kwendish, yid ngand yikata kuda antu au, ni antu awonsu twamanangamu ad amakuny a chimbu chishimokishena nakash. 33 Ni kwinikwa twamanangaku Anefilim, an a In Anak, adokila kud* Anefilim; mu kwiyilakej nau twad tumeken mud ampasu, niyau mwamu mwada mutumenau.”