Kuvurik

27 Chad Moses pamwing nau amakurump a In Isarel, wayileja antu anch: “Limishany yijil yawonsu nakulejanya kal nlel unou. 2 Dichuku ukwaukanya Yordan mulong wa kwandam mwi ngand yikwinkishinanyay Yehova Nzamb wen, ufanyidinany kulongij mayal majim ni wamashingunany. 3 Anch waukany ushad, fundany mazu mawonsu ma Chijil chinech pa mayal minam, chakwel wandamany mwi ngand yikwinkishinanyay Yehova Nzamb wen, ngand yipwekina mayel ni woch, mud mwakukananyay Yehova Nzamb wa angakiril en. 4 Anch waukany Yordan, ufanyidinany kulongij mayal minam pa mukandu wa Ebal ni kumashingun, mud kamu nikulejinanya nlel unou. 5 Ufanyidinany kand kumutungin Yehova Nzamb wen chintamb cha mayal pinapa. Ufanyidinanyap kubaril mayal minam nich yikung. 6 Ufanyidinany kumutungin Yehova Nzamb wen chintamb cha mayal ma kabuj kabuj ni kumulambwilap Yehova Nzamb wen yakupesh ya kosh. 7 Ufanyidinany kulambwilap yakupesh ya chisambu ni kuyidil pinapa, ni ukusangarany kurutu kwa Yehova Nzamb wen. 8 Ufanyidinany kand kufund nawamp mazu mawonsu ma Chijil chinech pa mayal minam.”

9 Chad Moses nau In Levi ada in kupesh ayileja In Isarel awonsu anch: “A! En In Isarel, ninetany ni teshany. Nlel wikalany kal antu a Yehova Nzamb wen. 10 Ufanyidinany kutesh dizu da Yehova Nzamb wen ni kulimish yijil yend ni mbil jend nikulejinanya nlel unou.”

11 Pa dichuku dinida, Moses wayileja antu anch: 12 “Paukwaukanya Yordan, michid ey yawiy yikwimana ku Mukandu wa Garizim mulong wa kuyiyukish antu: Muchid wa Simeyon, muchid wa Levi, muchid wa Yuda, muchid wa Isakar, muchid wa Jozef ni muchid wa Benjamin. 13 Ni michid yilondwilaku ey yawiy yikwimana ku Mukandu wa Ebal mulong wa kuyindamishan: Muchid wa Riben, muchid wa Gad, muchid wa Azer, muchid wa Zabulon, muchid wa Dan ni muchid wa Nefitali. 14 Ni In Levi akuyilej In Isarel awonsu nich dizu dikash anch:

15 “‘Riyind kud muntu mwawonsu ukwisongina ap kwichidil* chirumbidij ni wachijindjik, mulong chid chom chitakanena kud Yehova, chom chasalau kud in kusal midimu ya makas.’ (Chad antu awonsu akwakul anch: ‘Amen!’*)

16 “‘Riyind kud muntu mwawonsu ukumupipeja tatukwend ap makwend.’ (Chad antu awonsu akwakul anch: ‘Amen!’)

17 “‘Riyind kud muntu ukushemunina mwimbu wa mukwau.’ (Chad antu awonsu akwakul anch: ‘Amen!’)

18 “‘Riyind kud muntu ukumupumbula mputames mwi njil.’ (Chad antu awonsu akwakul anch: ‘Amen!’)

19 “‘Riyind kud muntu ukumurumburisha ngez, mwan anshon* ap mwadamufu mu mutapu uyimp.’ (Chad antu awonsu akwakul anch: ‘Amen!’)

20 “‘Riyind kud muntu ukulalijana ni mband a tatukwend, mulong ukumukwatish tatukwend usany.’ (Chad antu awonsu akwakul anch: ‘Amen!’)

21 “‘Riyind kud muntu ukulalijana ni nnam win mwawonsu.’ (Chad antu awonsu akwakul anch: ‘Amen!’)

22 “‘Riyind kud muntu ukulalijana ni mpanyend, ikal mwan mband wa tatukwend ap mwan mband wa makwend.’ (Chad antu awonsu akwakul anch: ‘Amen!’)

23 “‘Riyind kud muntu ukulalijana ni mawenend.’* (Chad antu awonsu akwakul anch: ‘Amen!’)

24 “‘Riyind kud muntu ukumutila mukwau mupit ni wamujip.’ (Chad antu awonsu akwakul anch: ‘Amen!’)

25 “‘Riyind kud muntu ukwitiya kumukatul milamu mulong wa kumujip* muntu wakad mulong.’ (Chad antu awonsu akwakul anch: ‘Amen!’)

26 “‘Riyind kud muntu ukulika kulimish mazu ma Chijil chinech ni kumasadin.’ (Chad antu awonsu akwakul anch: ‘Amen!’)