Kuvurik

5 Chad Moses wayikumangeja In Isarel awonsu, wayilej anch: “A! En In Isarel, teshany mbil ni mipak nikulejinanya nlel unou. Ufanyidinany kuyilej ni kuyiziyil nawamp. 2 Yehova Nzamb wetu wasuka netu mansuk ku Horeb. 3 Yehova kasukap mansuk minam nau angakiril etu, pakwez wamasuka ni etu awonsu tudanya pinap aom nlel unou. 4 Yehova wambamba nen mu kasu, ku mukandu, mes ni mes. 5 Pa chisu chinacha, nading niminy pakach pa Yehova niyenen chakwel nikulejany dizu da Yehova. Mulong en walikanya kukandam ku mukandu, mulong wading wovilany wom wa kasu. Walonda anch:

6 “‘Yam Yehova Nzamb wey, wakubudisha mwi ngand ya Idjibit, wakudoshina mwi ngand wading musuk.* 7 Kwindoshaku am, ufanyidinap kwikal ni anzamb akwau.

8 “‘Ufanyidinap kwisongin chirumbidij ap kwisadin chom chifanikena ni chom chin chawonsu chida mwiur, pansh ap mu mem. 9 Ufanyidinap kuyizengamin ap kwitiy kukubachik kuyisadin, mulong am, Yehova Nzamb wey, nid Nzamb witina kulamat ching kusu kud am. Nikat kuyipup antu ankisina: an, ijukur ni ijukuril mulong wa kurumbuk kwa atatuku, 10 pakwez nikat kumekesh rukat rishinshamena ku majuku kanan (1 000) ma antu ankatina ni aziyidina ku yijidik yam.

11 “‘Ufanyidinap kukwat dijin da Yehova Nzamb wey nich kapipej, mulong Yehova kakulikap kumupup muntu mwawonsu ukwatina dijin dend nich kapipej.

12 “‘Limish dichuku da sabat, chakwel dishal ditumbila, mud mwakulejay Yehova Nzamb wey. 13 Ukusal mudimu ni yawonsu ukweta ya kusal mu machuku musamban, 14 pakwez dichuku da sambwad did da sabat mulong wa Yehova Nzamb wey. Ufanyidinap kusal mudimu ap umwing, ey ap mwaney ikuny, ap mwaney mband, ap musuk wey (ikuny ap mband), ap ngomb wey, ap chimbur wey, ap nnam wey win mwawonsu wa pol, ap ngez uda mu misumb yey, chakwel musuk wey (ikuny ap mband) iswedish mud ey. 15 Vurik anch niyey wikala musuk mwi ngand ya Idjibit, pakwez Yehova Nzamb wey ndiy wakubudishamu kusutin chikas cha dikand ni chikas cha usu. Chawiy chakulejinay Yehova Nzamb wey kulimish dichiku da Sabat.

16 “‘Mulimisha tatukwey ni makwey, mud mwakulejinay Yehova Nzamb wey, chakwel ulal machuku mavud ni chakwel yom yenda nawamp mu mwom wey* mwi ngand yikwinkishinay Yehova Nzamb wey.

17 “‘Kangal wajipan.

18 “‘Kangal walalijan ni mband wayen ap ikuny wayen.

19 “‘Kangal wiy.

20 “‘Kangal wamupanin mukwen uman wa makasu.

21 “‘Kangal wamovil mband a mukwen ris. Kangal wovil chikumbu cha mukwen ris, ap chir chend, ap musuk wend (ikuny ap mband), ap ikwal a ngomb wend, ap chimbur wend, ap chom chin chawonsu cha mukwen.’

22 “Yiney yawiy yijil yalejanay* Yehova ku chikumangen chen chawonsu pa mukandu, mu kasu, mu didj, mu mididim yikurikina, nich dizu dikash, ni kawejapaku chom chikwau; kupwa wayifunda pa masalet maad ma mayal ni wanginkisham.

23 “Pakwez pawateshanya kamu dizu mu mididim, pading pazutina kasu ku mukandu, antakel awonsu a michid yen ni amakurump ansejina. 24 Kupwa walondanya anch: ‘Yehova Nzamb wetu watulej kal uyaj ni kujimb kwend, ni twatesh kal dizu dend mu kasu. Nlel twaman kal anch Nzamb ukutwish kulond ni muntu, chad muntu winou walik kufa. 25 Chad mulong wak tufanyidin kufa? Kasu kinak kavud kakutwish kutwosh kamu shitit. Anch twadandamen kutesh dizu da Yehova Nzamb wetu, tukufa chakin kamu. 26 Mulong muntu ik wateshap kal dizu da Nzamb mwom dikat kulondin mu kasu mud mutwatesha kal etu ni walik kufa? 27 Ey yang piswimp chakwel utesha yom yawonsu yikulonday Yehova Nzamb wetu, ni yey ukutuleja yom yawonsu yikukulejay Yehova Nzamb wetu, chad etu tukutesh ni kuyisadin.

28 “Yehova watesha yom yawonsu wanlejanya, chawiy Yehova wanleja anch: ‘Natesh kal yom yawonsu yakulejau kal antu inay. Yom yawonsu yalondau kal yiwapin kwau. 29 Anch adandamen kwingov wom mu michim yau ni alimish yijil yam yawonsu, yom yikwend nawamp mu mwom yau ni ya anau chikupu ni chikupu! 30 Yang uyilej anch: “Chirikany mu minkand yen.” 31 Pakwez ey ukushal niyamam pinap, chakwel nikulej yijil, mbil ni mipak yawonsu ufanyidina kuyifundish ni yifanyidinau kulimish mwi ngand niyinkishina.’ 32 Chawiy, ufanyidinany kusal usu wa kusadin kamu yom yakulejanyay Yehova Nzamb wen. Ufanyidinanyap kupumbukin ku katatuku ap ku kamaku. 33 Ufanyidinany kamu kwendin mwi njil yakulejanyay Yehova Nzamb wen kwendin, chakwel kangal wafany, chakwel yom yenda nawamp mu mwom yen ni ushakamany machuku mavud mwi ngand ukuswananya.