Yoshua

6 Chad yis ya Yeriko ayifunga kwa kushit mulong wa In Isarel; kwikil muntu wading ubudikinamu ni kwikil muntu wading wandaminamu.

2 Yehova wamuleja Yoshua anch: “Tesh, Yeriko, mwant wend, ni amuranjit end akweta usu, nayitek kal mu chikas chey. 3 Amasalay, en awonsu ufanyidinany kunyingumuk musumb, ukuunyingumukany kapamp kamwing. Ufanyidinany kusal mwamu mu machuku musamban. 4 Ukuyilej in kupesh sambwad kusend miseng ya amikoku amakwal sambwad kurutu kwa Mushet. Pakwez pa dichuku da sambwad, ufanyidinany kunyingumuk musumb tupamp sambwad ni in kupesh akubul miseng. 5 Pakubulau museng wa mukoku ikwal, paukuteshanya kamu chidjimin cha museng, antu awonsu afanyidin kutoy dizu dikash da njit. Chad mbumbu ja musumb jikuwa, ni antu afanyidin kwandam mu musumb, muntu ni muntu patalikedinay.”

6 Chawiy Yoshua mwan a Nun wayikumangeja in kupesh ni wayileja anch: “Sendany mushet wa mansuk, ni in kupesh sambwad afanyidin kusend miseng sambwad ya amikoku amakwal kurutu kwa Mushet wa Yehova.” 7 Kupwa wayileja antu anch: “Wilany mwi njil ni nyingumukany musumb, ni amasalay akweta yom ya njit akusut kurutu kwa Mushet wa Yehova.” 8 Yoshua papwishay kamu kuyilej antu, in kupesh sambwad ading asendina miseng sambwad ya amikoku amakwal kurutu kwa Yehova asuta kurutu ni abula miseng, ni mushet wa mansuk ma Yehova wading ukat kuyilondul. 9 Ni amasalay ading asendina yom ya njit asuta kurutu kwa in kupesh ading abudina miseng, ni antu ading alamina kwinyim alondula mushet pading padandamedinau kubul miseng.

10 Chad Yoshua wayileja antu anch: “Kangal watoyany ap kulond dizu. Kangal walondany dizu ap dimwing mu kan mwen kushik ni pa dichuku nikukulejanya anch, ‘Toyany!’ Chad en watoyany.” 11 Yoshua wasala anch mushet wa mansuk ma Yehova unyingumuk musumb kapamp kamwing, kupwa antu achirika mu chibeng ni asutishina uchuku mwinimwa.

12 Dichuku dambakenap Yoshua walanka pamanch nakash, ni in kupesh asenda Mushet wa Yehova. 13 In kupesh sambwad ading asendina miseng sambwad ya amikoku amakwal ading endin kurutu kwa Mushet wa Yehova ni adandamena kubul miseng. Amasalay ading asendina yom ya njit ading endin kurutu kwau ni antu ading alamina kwinyim ading alondwil Mushet wa Yehova pading padandamedinau kubul miseng. 14 Dichuku da kaad, anyingumuka musumb kapamp kamwing, kupwa achirika mu chibeng. Asala mwamu mu machuku musamban.

15 Pa dichuku da sambwad, alanka pamanch, pamanch nakash, ni anyingumuka musumb mutapu wawiy umwing, pakwez tupamp sambwad. Ching kusu dichuku dined dawiy danyingumukau musumb tupamp sambwad. 16 Ni kapamp ka sambwad, in kupesh abula miseng, ni Yoshua wayileja antu anch: “Toyany, mulong Yehova wakwinkishany kal musumb! 17 Musumb ni yawonsu yidamu chifanyidin kuyishesh; yawonsu yidamu yid ya Yehova. Ching kusu Rahab ndumb ndiy ukushala mwom, ndiy ni awonsu ada mu chikumbu chend, mulong wayijindjika antu twatuma kwendish ngand. 18 Pakwez kangal washany chom ap chimwing chifanyidina kushesh, chakwel kangal wovany ris ra chom chifanyidina kushesh ni kuchisend. Chamwamu ukuletishany riyind* mu chibeng cha In Isarel ni chibeng chin chikwikal chom chifanyidina kushesh. 19 Pakwez utad wa arjang mwawonsu, or, yom ya kwivre, ni ya utad ujal yid yitumbila ni ya Yehova. Chifanyidin kuyitek mu chipau cha Yehova.”

20 Chad pabulau miseng, antu atoya. Pateshau kamu antu chidjimin cha miseng ni kutoy dizu dikash da njit, rubumbu rawa. Kupwa antu andama mu musumb, muntu ni muntu patalikedinay, ni akwata musumb. 21 Ajipa yom yawonsu yading mu musumb nich mpak ya musamun, amakuny ni amband, ansand ni amapal, angomb, amikoku, ni ayimbur.

22 Yoshua wayileja amakuny aad endisha ngand anch: “Andamany mu chikumbu cha ndumb ni mubudishany mband winou pol ni antwend awonsu, mud kamu mutapu wamuchipinanya.” 23 Chawiy ansand aya kwendish ngand andama ni amubudisha Rahab pol, pamwing ni tatukwend, makwend, anamakwend, ni antwend awonsu; inge, abudisha dijuku dend dawonsu, ni ayichidija ayitwal pa ndond kanang pol pa chibeng cha Isarel.

24 Kupwa osha musumb ni yom yawonsu yadingamu nich kasu. Pakwez utad wa arjang, or, ni yom ya kwivre ni utad ujal, ayipana mulong wa kuyitek mu chipau cha chikumbu cha Yehova. 25 Ching kusu Rahab mband ndumb ni antu a mu chikumbu cha tatukwend ni antwend awonsu awiy apandishau kud Yoshua; ni ushich mu Isarel kushik ni nlel, mulong wayijindjika antu atumay Yoshua kwendish Yeriko.

26 Pa chisu chinicha, Yoshua wachipa machip manam:* “Ayindam kurutu kwa Yehova muntu ukusambisha kutungiril musumb wa Yeriko. Mwanend wa kusambish ukufa anch watung mufulandal wa musumb, ni mwanend wa nsuden ukufa anch watek yis ya musumb.”

27 Chawiy Yehova wading pamwing ni Yoshua, ni waya katumb pa divu da kabuj.