Yoshua
18 Chad chisak chawonsu cha In Isarel chakumangana ku Shilo, ni kwawiy kwakunau mwinkand wa kukumangen, mulong ngand ading ayikwat kal. 2 Pakwez kwading kuchid kal michid sambwad ya In Isarel yading yakad kal kutambul ndond yau ya uswan. 3 Chawiy Yoshua wayela In Isarel anch: “Ukuchingelany kushik ni chisu ik mulong wa kuya kukwat ngand yakwinkishanyay Yehova Nzamb wa angakiril en? 4 Tondany amakuny asatu pa muchid ni muchid atukutuma; akuya kwendish ngand yawonsu ni kufund mutapu yida kukwatijan ni ndond yikuswana muchid ni muchid. Kupwa akwez kwinman. 5 Akwiyangenay mu yikunku sambwad. Yuda ukushal pa ndond yend kwindum,* ni in kwa Jozef akushal pa ndond yau kwinkaj.* 6 Ukufundany mutapu uda ngand ni kuyangan mu yikunku sambwad, kupwa ukwinletinanyay. Ni nikukutilany ubal kunoku, kurutu kwa Yehova Nzamb wetu. 7 Pakwez In Levi kakutambulap ndond pakach pen, mulong win kupesh wa Yehova wawiy uswan wau. Gad, Riben, ni chikunku cha muchid wa Manase awiy atambwil kal uswan wau mutambu wa kwingangel kwa Yordan, wayinkishau kud Moses kashalapol wa Yehova.”
8 Amakuny atondau irijeka mulong wa kuya, ni Yoshua wapana mbil ey kud ading ni chisend cha kufund mutapu uda ngand: “Yang wendishany ngand ni ufundany mutapu yida, kupwa weza winmanany; nikukutilany ubal kurutu kwa Yehova kunoku ku Shilo.” 9 Chad amakuny inay aya, endisha ngand, afund mutapu yida kukwatijan ni misumb ni kuyangan mu yikunku sambwad. Ayifunda mu buku. Kupwa achirika kuday Yoshua mu chibeng ku Shilo. 10 Chad Yoshua wayitila ubal ku Shilo kurutu kwa Yehova. Kwawiy kwinikwa Yoshua kwayangenay In Isarel ngand, muchid ni muchid ni chikunku chau.
11 Chikunku cha kusambish cha ubal chawila pa muchid wa Benjamin kukwatijan ni majuku mau, ni ndond yatambulau kusutin kuta ubal yading pakach pa ndond ya in kwa Yuda ni ya in kwa Jozef. 12 Ku mutambu wa kwinkaj, mwimbu wau wading usambishidin ku Yordan, wakaninik ku kamukandu ka Yeriko kwinkaj, kupwa wakaninik ku mukandu mutambu wa kurand waya djat mwi mpay ya Bet-aven. 13 Ni mwimbu wadokala kwinikwa wadandamen kuya ku Luz, ku kamukandu ka kwindum kwa Luz, charumburik anch Betel; wakurumuka ku Atarot-adar pa mukandu uda kwindum kwa Bet-oron wa Kwiyand. 14 Ni mwimbu autekina mutambu wa kurand; wafumba watadish kwindum kudokal ku mukandu uda pantaliken ni Bet-oron kwindum; wasudekina ku Kiriyat-baal, charumburik anch Kiriyat-jearim, musumb umwing wa Yuda. Winou wawiy mutambu wa kurand.
15 Ku mutambu wa kwindum, mwimbu wading udokil ku ris ra Kiriyat-jearim watadish kurand; wading uyil djat ku musul wa mem ma Nefitowa. 16 Mwimbu wading ukurumukin ku ris ra mukandu uda pantaliken ni nkurubuk ya Mwan a Hinom, uda mwi nkurubuk ya Refayim kwinkaj, ni wakurumuka mwi nkurubuk ya Hinom, waya ku kamukandu ka Mwin Jebus kwindum, wadandamen djat ku En-rogel. 17 Mwimbu autekina mutambu wa kwinkaj, ni wading uyil ku En-shemesh, kupwa waya ku Gelilot, uda pantaliken ni kamukandu ka Adumim, ni wakurumuka ku diyal da Bohan mwan a Riben. 18 Mwimbu wadandamena kuya ku kamukandu ka kwinkaj pantaliken ni Araba, ni wakurumuka ku Araba. 19 Ni mwimbu wadandamena kuya ku kamukandu ka kwinkaj kwa Bet-ogla, ni wasudekina ku mupwambu wa kwinkaj kwa Karung wa Mung mwi nsang ya Yordan kwindum. Winou wawiy wading mwimbu wa kwindum. 20 Ni Yordan wawiy wading mwimbu wa mutambu wa kwingangel. Yawiy yiney yading mimbu ya mitambu yawonsu ya ndond yatambulau in kwa Benjamin mud uswan kukwatijan ni majuku mau.
21 Ni misumb ya muchid wa Benjamin kukwatijan ni majuku mau yading: Yeriko, Bet-ogla, Emek-keziz, 22 Bet-araba, Zemarayim, Betel, 23 Avim, Para, Ofra, 24 Kefar-amoni, Ofini, ni Geba: Misumb dikum ni yaad (12) ni mal mau ma kuns kuns.
25 Gabayon, Rama, Berot, 26 Misipa, Kefira, Mozah, 27 Rekem, Iripel, Tarala, 28 Zela, Aelef, Jebus, kwawiy kulond anch Yerusalem, Gibeya, ni Kiriyat: Misumb dikum ni yinying (14) ni mal mau ma kuns kuns.
Winou wawiy wading uswan wa in kwa Benjamin kukwatijan ni majuku mau.