Yoshua
24 Kupwa Yoshua wakumangeja michid yawonsu ya Isarel ku Sikem ni wayitumesha amakurump a Isarel, antakel, anzuj, ni atulal; ni imana kurutu kwa Nzamb wakin. 2 Yoshua wayileja antu awonsu anch: “Yehova Nzamb wa Isarel ulondin anch, ‘Pakur angakiril en ading ashich ushad wa Wit* ni ifukwilang anzamb indj. Pakach pau pading Tera tatukwend a Abraham ni Nahor.
3 “‘Mu kusut kwa chisu, namusenda ngakiril wen Abraham ushad wa Wit* ni namwendisha mwi ngand yawonsu ya Kanaan ni kuvudish anend.* Namwinkishay Izak; 4 kupwa Izak namwinkishau Jakobu ni Esau. Mu kusut kwa chisu, Esau namwinkisha Mukandu wa Seyir kwikal ndond yend; Jakobu ni anend awiy akurumuka mu Idjibit. 5 Mu kusut kwa chisu, nayituma Moses ni Aron, namwasa Idjibit yipupu, ni nakubudishanyamu. 6 Panayibudisha atatukwen mu Idjibit ni pashikau ku karung, In Idjibit ayilondula atatukwen nich matemb ma njit ni in kukandam pa atubar djat ni ku Karung Musunz. 7 Asambisha kwindidin am Yehova, chawiy nateka mididim pakach pen nau In Idjibit, nachirisha mem ma karung pad In Idjibit ni mayibwika; wimenanyap ayinen yom nasala mu Idjibit. Kupwa washakamanya mivu yivud* mwi mpay.
8 “‘Nakutwalanya mwi ngand ya In Amor ading ashicha ushad* wa Yordan, ni akurishikishanya. Pakwez nayiteka mu makas men chakwel uswanany ngand yau, ni nayijiyisha kurutu kwen. 9 Chad Balak mwan a Zipor, mwant wa Mowab, watumbuka ni wamurishikisha Isarel. Chawiy wamutumesha Balam mwan a Beyor chakwel akushingany. 10 Pakwez nakatap kumutesh Balam. Chawiy wakuyukishanya tupamp tuvud, ni nakupandishanya ku chikas chend.
11 “‘Kupwa waukanya Yordan ni washikanya ku Yeriko. Chad antakel* a Yeriko, In Amor, In Periz, In Kanaan, In Het, In Girgash, In Hivi, ni In Jebus akurishikishanya, pakwez nayiteka mu makas men. 12 Chawiy natakeja kurutu kwen kuziy,* ni kwayopata kurutu kwen mud mutapu yasadika piur pa ant aad a In Amor. Yasadikap kusutin mpak yen ya musamun ap kusutin nseu yen. 13 Mwamu nakwinkishanya ngand walikanya kumen mar ni misumb walikanya kutung ushichanya. Udilany mu yir ya nviny ni ya mitond ya oliv walikanya kukun.’
14 “Chawiy, mwovany Yehova wom ni musadinany nich muchim wa zwang* ni nich kushinshaman.* Doshany anzamb asadinangau angaken ushad wa Wit* ni mu Idjibit, ni musadinany Yehova. 15 Katat anch chikusangareshinanyap kumusadin Yehova, tondany ayinen nlel nany ukusadinanya, chikala anzamb asadinau angaken ushad wa Wit,* ap kand anzamb a In Amor in ngand muushichanya. Pakwez am ni dijuku dam tukumusadin Yehova.”
16 Chad antu akula anch: “Tukutwishap kutongin ap pakemp kumulik Yehova ni kuyisadin anzamb akwau. 17 Yehova Nzamb wetu ndiy watubudisha etu nau atatukwetu mwi ngand ya Idjibit mutwading asuk, ndiy wasadina yilay yiney yijim mu mes metu, ni ndiy watuchidijina mu weny wawonsu twasadina ni pakach pa antu awonsu twasutina. 18 Yehova wayopatin antu awonsu ada ashicha mwi ngand yiney kurutu etu tweza, kuwejaku In Amor. Chawiy, etu niyetu tukumusadin Yehova, mulong ndiy Nzamb wetu.”
19 Chad Yoshua wayakula antu anch: “Ukutwishanyap kumusadin Yehova, mulong ud Nzamb utumbila; ud Nzamb witina kulamat ching kud ndiy. Kakulikishinap kurumbuk kwen ni yitil yen. 20 Anch wamudjubulany Yehova ni wayisadinany anzamb a wingendj, niyend ukukukarumukinany ni ukukunongishany kupwa kwa kukusadinany yom yiwamp.”
21 Pakwez antu amwakula Yoshua anch: “Bwat, tukumusadin Yehova!” 22 Chad Yoshua wayela antu anch: “En ayinen udany atuman anch watondany kal ayinen kwa kwisotin kumusadin Yehova.” Antu amwakula anch: “Inge, tud atuman.”
23 “Pa chinech, doshany anzamb a wingendj ada pakach pen, ni lamatany kud Yehova Nzamb wa Isarel nich muchim wen wawonsu.” 24 Antu amwakula Yoshua anch: “Tukumusadin Yehova Nzamb wetu, ni tukuziyin ku dizu dend!”
25 Pa dichuku dinida, Yoshua wasuka mansuk ni antu ku Sikem ni wayitekina mbil ni chijil. 26 Kupwa Yoshua wafunda mazu minam mu buku wa Chijil cha Nzamb, ni wanona diyal dijim waditek kwinshin kwa mutond ujim uda piswimp ni ndond yitumbila ya Yehova.
27 Yoshua wayileja kand antu anch: “Teshany! Diyal dined dikwikal uman kud etu, mulong dateshang yom yawonsu yatulejangay Yehova. Dikwikal uman kud en, chakwel kangal wamwitunany Nzamb wen.” 28 Kupwa Yoshua wayileja antu kuya, muntu ni muntu ku uswan wend.
29 Kupwa kwa yom yiney, Yoshua mwan a Nun, kashalapol wa Yehova, wafa ni mivu chitot ni dikum (110). 30 Ni amujika mwi ndond ya uswan wend ku Timinat-sera, uda mwi ndond ya mikandu ya Efrayim, kwinkaj* kwa mukandu wa Gaash. 31 In Isarel adandamena kumusadin Yehova mu machuku mawonsu ma mwom wa Yoshua ni ma mwom wa amakurump ashala aom kupwa kwa rufu ra Yoshua, ni amana yom yawonsu yasalay Yehova mulong wa Isarel.
32 Mafup ma Jozef masendau In Isarel pabudikau mu Idjibit, amajika ku Sikem mwi ndond ya chir chalanday Jakobu kud an a Hamor, tatukwend a Sikem, kwi nfalang chitot (100); ni yikala uswan wa an a Jozef.
33 Eliyazar mwan a Aron niyend wafa. Ni amujika ku kamukandu ka mwanend Fineyas, kamwinkishau mwi ndond ya mikandu ya Efrayim.