Ankalansambu

7 Chad Jerubal, ndiy kamu Jedeyon, walanka pamanch pafe pamwing nau antu awonsu adingay nend, ni wateka chibeng chend piswimp ni Musul wa mem wa Harod. Pakwez chibeng cha In Madian chading kwinkaj,* mwi nkurubuk, piswimp ni kamukandu ka More. 2 Yehova wamuleja Jedeyon anch: “Amasalay uda nau avudin nakash mulong wa kuyinkishau In Madian. Chamwamu In Isarel akwibaz ni kwinlej anch: ‘Twipandish kal ku usu wetu ayinetu.’ 3 Chawiy katat amboku yileja amakuny uda nau anch: ‘Muntu mwawonsu wovila wom ni uzadina, achirika kol kwend.’” Jedeyon wayileja mwamu mulong wa kuyipak. Chawiy antu tunan makum maad ni twaad (22 000) achirika kol kwau ni kwashala antu tunan dikum (10 000).

4 Pakwez Yehova wamuleja kand Jedeyon anch: “Antu achivudin nakash. Kurumuk uya nau ku mem chakwel nikukwasha kuyipak kwinakwa. Anch nakulej anch: ‘Ou ukuya ney,’ ukuya ney, pakwez anch nakulej anch: ‘Ou kakuyap ney,’ kakuyap ney.” 5 Chawiy Jedeyon waya nau amasalay ku mem.

Chad Yehova wamwela anch: “Awonsu alapina mem nich rudim mud mukatau atubu kulap, yaurila ni asina manungun mulong wa kuna.” 6 Uvud wa antu alapa mem, kusutin kulet chikas ku kan wading wa antu yitot yisatu (300). Pakwez akwau awonsu ashalaku asa manungun mulong wa kuna.

7 Chad Yehova wamuleja Jedeyon anch: “Nikukupandishany kusutin amakuny inay yitot yisatu (300) alapang mem, ni nikuyipan In Madian mu makas mey. Pakwez akwau awonsu, chifanyidin achirika ku yikumbu yau.” 8 Chawiy kupwa kwa kutambul yakuda ni miseng yading kud amasalay akwau, Jedeyon washala kwend nau amasalay yitot yisatu (300), ni wayileja amasalay akwau In Isarel kuchirik ku yikumbu yau. Chibeng cha In Madian chading kwinkaj, mwi nkurubuk.

9 Uchuku winawa, Yehova wamuleja Jedeyon anch: “Tumbuk, rishikish chibeng chau, mulong nachipan kal mu makas mey. 10 Pakwez anch wovil wom wa kuyirishikish, kurumuk mu chibeng chau pamwing ni kashalapol wey Pura. 11 Tesh yom yilondinau, ni mwamu ukwikal ni kutakaman* kwa kurishikish chibeng chau.” Chawiy Jedeyon ni kashalapol wend Pura akurumuka, ashik kuns kwa chibeng cha amasalay.

12 Chad In Madian, In Amalek nau antu awonsu a Kwingangel ading izwil too mwi nkurubuk mud yisak ya atubol, ni atumel au ading avud nakash, avud kamu mud usukuril wa ku chikum cha karung. 13 Pashikay Jedeyon, wamutesha isalay umwing ukat kumurumburil mukwau chilat chend anch: “Ech chawiy chilat nalatang: Namanang mukat wa orj* wa chinkatang ukat kwez mu kubumburok mu chibeng cha In Madian. Wezang wibub ku mwinkand umwing nich usu nakash ni mwinkand wawang. Mukat wabumonang mwinkand, ni mwinkand wapalanganang.” 14 Chad mukwau wamwakula anch: “Yikutwish kwikal mpak ya musamun ya Jedeyon, mwan wa Jowash, ikuny wa mu Isarel. Nzamb wayipan kal In Madian ni chibeng chau chawonsu mu makas mend.”

15 Pateshay Jedeyon chilat chinech ni kurumburik kwach, wazengama mulong wa kwifukwil. Kupwa wachirika mu chibeng cha In Isarel ni walonda anch: “Tumbukany, mulong Yehova wapan kal chibeng cha In Madian mu makas men.” 16 Kupwa wayaurila amakuny yitot yisatu (300) mu yisak yisatu, ni wayinkisha awonsu miseng ni ansab ajim akad chom mukach, pamwing ni yimbundj ya kasu mukach mwa ansab. 17 Kupwa wayileja anch: “Ntalany ni salany kamu mud munisadina am. Panikushika kuns kwa chibeng, ufanyidinany kusal mud munikusala am. 18 Panikubula museng, am pamwing ni antu awonsu ada niyam, niyen ufanyidinany kubul miseng yen ku mitambu yawonsu ya chibeng ni kutoy anch: ‘Njit jid ja Yehova ni ja Jedeyon!’”

19 Kupwa kwa kuyitek atulam, Jedeyon pamwing nau antu chitot (100) adingay nend ashika kuns kwa chibeng kurutu kwa mapep ma uchuku.* Abula miseng ni abarola ansab ajim adingau nich. 20 Chawiy yisak yisatu niyau yabula miseng ni kubarol ansab ajim. Alama yimbundj ya kasu ku makas mau ma kamaku ni abula miseng ni makas mau ma katatuku kupwa atoya anch: “Njit jid ja Yehova ni ja Jedeyon!” 21 Pa chisu chinacha, muntu mwawonsu wading wiminy pa ndond yend ku mitambu yawonsu ya chibeng, chad amasalay awonsu a In Madian achina mau oku akat kutoy. 22 Amasalay yitot yisatu (300) adandamena kubul miseng ni Yehova wasala anch In Madian asambish kujipijan ayinau mu chibeng; ni achina aya kushik ku Bet-shita, ku Zerera, kushik kuns kwa Abel-mehola, piswimp ni Tabat.

23 Ni amakuny a mu Isarel ayikumangeja pamwing kusambishin ku muchid wa Nefitali, wa Azer ni muchid wawonsu wa Manase ni ayilondula In Madian. 24 Jedeyon watuma aruu kulejan mwi ndond yawonsu ya mikandu ya Efrayim anch: “Kurumukany mulong wa kuyirishikish In Madian ni jikany njil yiyila ku mem kushik ku Bet-bara ni ku Yordan.” Chawiy amakuny awonsu a muchid wa Efrayim akumangana pamwing ni ajika njil yitwadila ku mem kushik ku Bet-bara ni ku Yordan. 25 Ayikwata kand ayilol aad a In Madian, Oreb ni Zeb; amujipina Oreb pa diyal da Oreb ni amujipina Zeb mu dibuku da kukamin maar ma nviny da Zeb. Adandamena kuyilondul In Madian ni amuletina Jedeyon mutu wa Oreb ni wa Zeb mu chikunku cha Yordan.