Ankalansambu
16 Dichuku dimwing Samson waya ku Gaza. Kwinakwa, wamana mband umwing ndumb ni wandama mu chikumbu chend. 2 Ayileja antu a ku Gaza anch: “Samson wezang kal kunoku.” Chad awiy amunyingumuka ni amujingamin ku chis cha musumb uchuku wa kabuj. Ashakama zoong uchuku wa kabuj, mulong alondang anch: “Anch kwacha, tukumujip.”
3 Pakwez, Samson walala kwinakwa kushik mukach mwa uchuku. Kupwa walanka mukach mwa uchuku, waya wazakul chis cha musumb ni manguj mach maad ni kayand.* Wayiteka pa makij ni wayiya nich pa musong wa mukandu utalijadina ni Heberon.
4 Kupwa kwa yom yiney, Samson wamukata nakash mband umwing wading ushicha mwi nkurubuk ya Sorek, dijin dend Delila. 5 Chawiy antakel a In Filistin aya kumutal mband winou, amulej anch: “Mudimba Samson chakwel akulej kudokila usu wend ukash mwamu ni mutapu tukutwisha kumudutish, kumukas moj ni kumupandakan. Anch wasal mwamu, muntu ni muntu wa pakach petu ukukwinkish nfalang kanan ni chitot (1 100) ja utad wa arjang.”
6 Mu kusut kwa chisu, Delila wamwela Samson anch: “Nlejaku amboku kudokila usu wey ukash mwamu ni yom yikutwishau kukukas nich mulong wa kukudutish.” 7 Samson wamwakula anch: “Anch ankas nich moj yitalel sambwad ya jinseu, nikupipal kwam mud muntu win mwawonsu.” 8 Chawiy antakel a In Filistin amuletina Delila moj yitalel sambwad ya jinseu ni wamukasay Samson. 9 Chad kwading antu ading amujingaminang kal mu kapalakany ka mukach ni Delila watoya anch: “Samson, In Filistin ay kamu ay!” Chawiy wakatula swa moj ya jinseu yamukasau mud moj ya len* yoshau kal kasu. Kwikil muntu wajingunina kwading kudokila usu wend.
10 Kupwa Delila wamwela Samson anch: “Tesh! Wansengen kal, wandimb kal kwey. Katat, Nlejaku amboku yom yikutwishau kukukas nich.” 11 Samson wamwakula anch: “Anch ankas nich moj yisu yakadawap kal kusadin, nikupipal kwam mud muntu win mwawonsu.” 12 Chawiy Delila wanona moj yisu wamukasay ni watoy anch: “Samson, In Filistin ay kamu ay!” (Pa chisu chinacha, kwading antu ading amujingaminang kal mu kapalakany ka mukach.) Pakwez wakatula moj yading yamukasangau kal ku makas mud ndand.
13 Kupwa Delila wamwela Samson anch: “Kushik ni katat, uchid kwey kwinsengen ni kwindimb. Nleja yom yikutwishau kukukas nich.” Ndiy wamwakula anch: “Chitin kuwung midjany sambwad yida ku mutu wam ey nich ndand.” 14 Chawiy wamuwunga midjany nich rubau ra kukas nich ndand ni watoya anch: “Samson, In Filistin ay kamu ay!” Chad walanka wadosh rubau ni ndand wamukasu nich.
15 Delila wamwela Samson anch: “Mutapu ik ukutwisha kwinlej anch winkatin anch winlejinap yom yida ku muchim wey? Wansengen kal tupamp tusatu ni winlejinap kudokila usu wey ukash mwamu.” 16 Mulong wadandamena kumuswidosh ni kumushindin dichuku dawonsu, Samson wasula ku muchim mu chilik cha kov ja kufa. 17 Chawiy disuden, wamufungwila muchim wend, wamulej anch: “Diyemb kand kal disutangap ku mutu wam, mulong nid Mwin Nazir* wa Nzamb kudosh kamu navadikina. Anch ankil nsuk jam jawonsu, usu wam ukwindokal, nikupipal ni nikwikal kwam mud antu in awonsu.”
18 Pamanay Delila anch Samson wamufungwil kal muchim wend, kapamp kamwing wayitumesha antakel a In Filistin ni wayileja anch: “Pinap ezany chad, mulong wanfungwil kal muchim wend.” Chawiy antakel a In Filistin eza kol kwend nich nfalang jamukanau. 19 Delila wamuladika pa manungun mend, kupwa wamutazuka ikuny umwing wez wamukatul midjany ya nsuk sambwad yading ku mutu wend. Kupwa Delila wasambisha kumudutish mulong usu wading ukat kumupwa. 20 Chad Delila watoya anch: “Samson, In Filistin ay kamu ay!” Samson walanka pa tul ni walonda mu muchim wend anch anch: “Nikutwish kand mud tupamp tukwau ni kukusinik.” Pakwez kadingap kija anch Yehova kadingap kand nend. 21 Chad In Filistin amukwata, amubuzol mes. Kupwa amukurumwisha ku Gaza ni amukas miyolal yaad ya kwivre, ni mu rukan mwadingay watwangang mbut. 22 Pakwez mu kusut kwa chisu, nsuk ja ku mutu wend jasambisha kand kuminy.
23 Ant a In Filistin akumangana pamwing mulong wa kupan chakupesh chijim kud nzamb wau Dagon ni kusal musambu, mulong alondang anch: “Nzamb wetu wamupanin mukankuny netu Samson mu makas metu!” 24 In Filistin pamanau chirumbidij, amutumbisha nzamb wau ni alonda anch: “Nzamb wetu wamupanin mukankuny netu mu makas metu, ndiy washeshina ngand yetu ni kujip anamakwetu avud.”
25 Mulong ading akwet musangar nakash, alonda anch: “Mutazukany Samson chakwel atusangareshaku.” Chawiy amubudisha Samson mu rukan chakwel ayipuwangejaku; amwimika pakach ni pakach pa manguj. 26 Chad Samson wamuleja nsand wading umukwatina ku chikas anch: “Nkwatishaku bil ku manguj ma tempel,* chakwel nikamenaku.” 27 (Chad mu tempel mwading mwizwil too amakuny nau amband. Antakel awonsu a In Filistin ading mwinamwa, ni piur pa tempel pading amakuny nau amband tunan tusatu [3 000] ading atadina pading payipuwangejinay Samson.)
28 Chad Samson wamwilembina Yehova anch: “Mukaleng Mwant Yehova, nvurikaku amboku ni nginkishaku amboku usu, kapamp kinak kwau, A! Nzamb. El niyifundakeshin In Filistin mulong wa dis dam dimwing kusu.”
29 Kupwa Samson wikamena ku manguj maad mading pakach pa tempel. Wakwata chikas chend cha katatuku ku dinguj dimwing ni cha kamaku ku dikwau. 30 Samson watoya anch: “Chifanyidin nifa* nau In Filistin!” Kupwa wabachika manguj nich usu wend wawonsu, ni tempel wayiwila antakel ni antu in awonsu ading mwinamwa. Chawiy wajipa antu avud nakash pa chisu chafay kusutamu padingay mwom.
31 Mu kusut kwa chisu, anamakwend ni antu awonsu a mu dijuku da tatukwend eza mulong wa kusend mujimbu wend. Ausenda aya aujik pakach pa Zora ni Eshitayol, mwi nzay ya tatukwend Manowa. Samson wayirumburisha In Isarel mu mivu makum maad (20).