Ezra
3 Pashikau mwi ngond wa sambwad ni padingau an a Isarel mu misumb yau, ovijana mulong wa kukumangan pamwing mu Yerusalem. 2 Jeshuwa mwan wa Josadak ni in kupesh asalangay nend, pamwing ni Zorobabel mwan wa Shelitiyel, asambisha kutung chintamb cha Nzamb wa Isarel, mulong wa kulambwilap yakupesh ya kosh, mud mufundinau mu Chijil cha Moses, muntu wa Nzamb wakin.
3 Chawiy atunga chintamb pa ndond pachading pasak, ap anch ading ovil wom wa antu a mu jingand ja piswimp, ni asambisha kumulambwilap Yehova yakupesh ya kosh, ya pamanch ni ya urel. 4 Kupwa asala Musambu wa Yisambu,* mud mulejenau mu Chijil, ni dichuku dawonsu, alambulang yakupesh ya kosh yading yitinau kulambul dichuku ni dichuku. 5 Kupwa alambula chakupesh cha kosh cha chisu chawonsu, yakupesh ya kwarik kwa ngond ni yakupesh ya yirung yawonsu ya misambu ya Yehova, yida yirung yitumbila, pamwing ni yakupesh ya antu awonsu ading akatina kumulambul Yehova mulambu wa kwisotin. 6 Pa dichuku da kusambish da ngond wa sambwad, asambisha kumulambul Yehova yakupesh ya kosh, ap anch ading kand kal atek fondasion* wa tempel wa Yehova.
7 Apana nfalang kud in kubaril mayal ni kud antu ija kusal nawamp mudimu wa makas. Apana kand yakuda, maar ni many kud In Sidon nau In Tir, chakwel ezina pa karung mulong wa kulet ku Yopa mabay ma sedre ma ku Liban, kukwatijan ni mbil yayinkishau kud Sirus, Mwant wa Peris.
8 Mu muvu wa kaad, mwi ngond wa kaad, kudosh kwashikinau ku chikumbu cha Nzamb wakin mu Yerusalem, Zorobabel mwan wa Shelitiyel, Jeshuwa mwan wa Josadak pamwing nau anamakwau akwau, in kupesh nau In Levi, ni antu awonsu eza ku Yerusalem kupwa kwa kudokal mu Babilon, asambisha kusal mudimu. Atonda In Levi akweta mivu makum maad (20) ni kusut mulong wa kutakel mudimu wa kutungiril chikumbu cha Yehova. 9 Chawiy Jeshuwa, anend ni anamakwend, pamwing ni Kadimiel nau anend, awonsu a mu dijuku da Yuda, ibomba pamwing mulong wa kuyitakel antu ading asadina mudimu ku chikumbu cha Nzamb wakin. An a Enadad ni anau, pamwing ni anamakwau In Levi, niyau ibomba nau.
10 Patekau in kutung fondasion wa tempel wa Yehova, in kupesh ading adjita masun ma mudimu, ading akwet jimpel, ni In Levi, awiy kamu an a Asaf, ading akwet masembal, chad atumbuka mulong wa kumushiman Yehova, mud mwalejenay David Mwant wa Isarel. 11 Chawiy asambisha kuwang mulong wa kumushiman ni kumujikitish Yehova, chad amwing atumang ni akwau akulang anch: “Mulong ud muwamp, rukat rend rishinshamena kud Isarel rid ra chikupu.” Kupwa antu awonsu awanga nich dizu da piur mulong wa kumushiman Yehova, mulong ateka fondasion wa chikumbu cha Yehova. 12 In kupesh avud, In Levi ni antakel a yisak ya majuku, awiy kamu amapal amana chikumbu cha Nzamb chikur, asambisha kudil nich dizu da piur pamanau akat kutek fondasion wa chikumbu, oku antu akwau avud akat kutoy mazu ma musangar nich usu wau wawonsu. 13 Chawiy chading chikasiken kwauril masok ma musangar ni madil, mulong antu atoya nakash ni masok mau movikana kulemp nakash.