Ezra
5 Kupwa muprofet Agay ni muprofet Zakariy mwijukurend wa Ido alejana uprofet kud In Yud adinga mu Yuda ni mu Yerusalem, mu dijin da Nzamb wa Isarel wading uyitakedina. 2 Pawiy pasambishay Zorobabel mwan wa Shelitiyel ni Jeshuwa mwan wa Josadak kutungiril chikumbu cha Nzamb, chadinga mu Yerusalem; ni aprofet a Nzamb ading nau pamwing ni ayikwashang. 3 Pa chisu chinicha, Tatenay guverner wa Ushad wa Wit,* Shetar Bozenay ni ambay nau eza ayipul anch: “Nany wakwinkishanganya mbil ya kutung chikumbu chinech ni kupwish mudimu winou?”* 4 Kupwa ayileja kand anch: “Twinkishany majin ma amakuny atungina chikumbu chinech.” 5 Pakwez Nzamb wading pamwing nau* amakurump a In Yud. Chawiy antu inay kayikangeshap kusal mudimu kurutu kwa kumufundin Darius ni kutambul mukand wend pa mulong winou.
6 Ou wawiy mukand wamutuminau Mwant Darius kud Tatenay guverner wa Ushad wa Wit, Shetar Bozenay ni ambay nend, anyikel a mwinshin a Ushad wa Wit; 7 amutumina mukand ni afundamu anch:
“Kud Mwant Darius:
“Chisambu chikal ney! 8 Mwant ijik anch twayil mu provens wa Yuda, ku chikumbu cha Nzamb mujim. Chikumbu akat kuchitung ni mayal majim amabumburidin pa jindond jau ni mabay akat kumaal pa mbumbu. Mudimu uyil kamu kurutu nakash mulong antu ausadin nich mushiku. 9 Chawiy twayipwil amakurump au anch: ‘Nany wakwinkishanganya mbil ya kutung chikumbu chinech ni kupwish mudimu winou?’* 10 Twayipulang kand majin mau ni kumafund, chakwel uyijika amakuny atakedina mudimu winou.
11 “Ou wawiy mutapu watwakwilau: ‘Tud atushalapol a Nzamb wa diur ni divu. Tutungiril chikumbu chatungau ni kupwish kwasut kal mivu yivud, kud mwant mujim wa Isarel. 12 Chad mulong angakiril etu amujimesha Nzamb wa mwiur, ndiy wayipana mu makas ma Nebukadinezar Mwant wa Babilon, Mwin Kalideya, wabumuna chikumbu chinech ni kuyitwal antu ku usu mu Babilon. 13 Pakwez mu muvu wa kusambish wa kuyikel kwa Sirus Mwant wa Babilon, Mwant Sirus wapana mbil ya kutunguril chikumbu chinech cha Nzamb. 14 Chikwau kand, Mwant Sirus wabudisha mu tempel wa ku Babilon yom ya or ni ya utad wa arjang ya mu chikumbu cha Nzamb, yasenday Nebukadinezar mu tempel wa ku Yerusalem, wayitwal mu tempel wa ku Babilon. Yom yiney amwinkishay ikuny umwing dijin dend Sheshibasar,* wikadishau guverner kud Sirus. 15 Sirus wamuleja anch: “Send yom ey. Yang uyiteka mu tempel uda ku Yerusalem, ni chifanyidin chikumbu cha Nzamb achitungiril pa ndond pachading pasak.” 16 Chad Sheshibasar winou weza, watek fondasion* wa chikumbu cha Nzamb, chida mu Yerusalem; ni kudosh pinapa, chikumbu chinech akat kuchitung, pakwez kand kal chipwa.’
17 “Chawiy katat, anch chimukatishin mwant, akimbijola mu chipau cha mwant chida ku Babilon, mulong wa kwijik anch Mwant Sirus wapana kamu chakin mbil ya kutunguril chikumbu cha Nzamb chida ku Yerusalem; ni atwijikisha mupak wend pa mulong winou.”