Nehemiy

13 Dichuku dinada, ayitangina antu buku wa Moses, ni ajingunina anch mu buku winou ading afundinamu anch In Amon nau In Mowab kafanyidinap kwandam mu chikumangen cha Nzamb wakin, 2 mulong pasankanijanau nau In Isarel, kayinkishap yakuda* ni mem, pakwez amufuta Balam chakwel ayishinga. Chaying Nzamb wetu wakarumuna mashing kwikal chiyukish. 3 Pateshau kamu antu mazu ma Chijil mwamu, asambisha kuyauril In Isarel nau antu awonsu ading akweta mash ma kabil kindj.

4 Chad kurutu kwa yom yiney, mwin kupesh wading ulamina tupalakany twa kulamin yom twa* chikumbu cha* Nzamb wetu wading Eliyashib, mwanamakwend a Tobiya. 5 Eliyashib wamwinkisha kapalakany kajim ka kulamin yom, mwatekangau mulambu wa yakuda,* diseng da malash ditok, malong ma mu tempel, chadikum* cha yakuda, maar ma nviny masu, many ni milambu ya in kupesh. Yawiy yiney yom yayinkishangau In Levi, in kuwang ni in kulam yis.

6 Pa chisu chinacha chawonsu, nadingap mu Yerusalem, mulong nachirika kwa Aritaserisis Mwant wa Babilon, mu muvu wa makum masatu ni yaad (32) wa kuyikel kwend, ni kupwa kwa chisu chikemp, namwita mwant mbil ya kuchirik ku Yerusalem. 7 Kupwa nashika ku Yerusalem ni namana yom yiyimp yasalay Eliyashib: wamwinkisha Tobiya kapalakany ka kulamin yom mu rupang ra chikumbu cha Nzamb wakin. 8 Yom yiney yanjimesha nakash, chawiy nadjubola yom yawonsu ya Tobiya pol. 9 Kupwa nalejana kushitwish tupalakany twa kulamin yom,* ni nachirishamu yom ya mu chikumbu cha Nzamb wakin, mulambu wa yakuda ni diseng da malash ditok.

10 Najingunina kand anch kayinkishangap kwau In Levi milambu yading yifanyidinau kutambul, chawiy In Levi nau in kuwang asalang mudimu ku tempel, ayawola kwau kusal mudimu mu yir yau. 11 Chawiy nayibarokina anyikel a mwinshin ni nayipula anch: “Mulong wak chikumbu cha Nzamb wakin achiduwil mwamu?” Kupwa nayikumangeja antu ayawola ni nayichirisha awonsu pa jindond jau. 12 Chad antu awonsu a mu Yuda asambisha kulet mu tupalakany twa kulamin yom chadikum cha yakuda, maar ma nviny masu ni many. 13 Kupwa nateka tupalakany twa kulamin yom mu makas ma mwin kupesh Shelemiya, mwin kukopiril* Zadok ni Pedaya wading Mwin Levi, ni afanyina kuyikwashang kud Hanan, mwan wa Zakur, mwijukurend a Mataniya, mulong antu inay ading ijiken anch ad amakuny a kuchingejin. Awiy ikala ni chisend cha kuyangenang anamakwau yom.

14 A! Nzamb wam, nvurikap amboku mulong wa yom yiney, ni kangal wavuramen rukat rishinshamena namekeshina mulong wa chikumbu chey ni mulong wa midimu yikatau kusal mulong wa kuchilam.

15 Pa chirung chinacha, namana kand anch mu Yuda mwading antu amwing akamang mabuj ma nviny pa dichuku da Sabat, akwau akasang mafund ma mbut ni amazukang pa ayimbur au, ni akwau kand aletang maar ma nviny, mabuj ma nviny, mabuj ma fig ni mafund ma mitapu yawonsu mu Yerusalem pa dichuku da Sabat. Chawiy nayikangesha kulandish yakuda pa dichuku dinada.* 16 Chikwau kand, In Tir ading ashicha mu musumb winawa aletang ansh ni yom ya mitapu yawonsu, mulong wa kuyilandish mu Yerusalem kud antu a mu Yuda pa dichuku da Sabat. 17 Chawiy nayibarokina ayilol a mu Yuda ni nayipula anch: “Mulong wak usadinany yom yiyimp mwamu? Ulimishinanyap dichuku da Sabat. 18 Ngam yawiy yom yasalau angakiril en, yamubachika Nzamb wetu kutumesh mar minam mawonsu pamwing ni musumb wetu! Pinap Nzamb ukuyijimen chad In Isarel nakash, mulong ulimishinanyap dichuku da Sabat.”

19 Pikwazweka kamu mwamu, kurutu kwa dichuku da Sabat, napana mbil ya kupat yis ya Yerusalem ni kuyazuril ching anch Sabat wapwa. Natekaku kand atushalapol am amwing chakwel kangal difund ap dimwing dandam mu musumb pa dichuku da Sabat. 20 Chawiy antu isakang ni kulandish yom ya mitapu yawonsu alala pol pa Yerusalem kapamp kamwing ap tupamp twaad. 21 Kupwa nayibabesha ni nayipula anch: “Mulong wak ud kulalangany pol kurutu kwa rubumbu? Anch wachirikinanyap kand, nikukopatany.” Kudosh kamu pinapa, kezap kand pa dichuku da Sabat.

22 Ni nayileja In Levi anch afanyidin kwishitwishang chisu chawonsu ni kwez kulam yis chakwel dichuku da Sabat didandamen kwikal ditumbila. A! Nzamb wam, nvurikap kand mulong wa chom chinech ni ngovilap riy mulong wa rukat rey rijim rishinshamena.

23 Pa chisu chinacha, namana kand In Yud atijana nau amband In Ashidod, In Amon ni In Mowab. 24 Anau amwing alondang dizu da In Ashidod ni akwau alondang mazu ma michid kushalijan, pakwez kwikil ap umwing wa pakach pau wading wija dizu da In Yud. 25 Chawiy nayibarokina ni nayishinga; nabulap amakuny amwing, nayibwita nsuk ni nayichipisha mu dijin da Nzamb anch: “Kangal wayatishany anen amband kud anau amakuny ni en nau anen amakuny ufanyidinanyap kuyat anau amband. 26 Ov, kadap amband aeny amubachika Mwant Salomon kusal chitil? Mu michid yivud mwadingap mwant mud ndiy, ni Nzamb wamukata, chawiy wamwinkisha want wa Isarel mwawonsu. Pakwez amband aeny, amubachika niyend kusal chitil. 27 Mutapu ik wasadinanya yom yiyimp mwamu kusutin kulik kumushinshamen Nzamb wetu pawayatinanya amband aeny?”

28 Mwan umwing wa Joyada, mwan wa mwin kupesh mujim Eliyashib, wikala tatuwenend wa Sambalat Mwin Oron. Chawiy namopata kulemp niyamam.

29 A! Nzamb wam, yivurika mulong ayipishin kal win kupesh, mansuk ma win kupesh ni ayiyipishin kal kand In Levi.

30 Nayikangesha In Isarel kusal yom yiyimp yasalangau antu a mu jingand jikwau, kupwa nayinkisha in kupesh nau In Levi yom ya kusal, muntu ni muntu kukwatijan ni mudimu wend. 31 Natenchika yom chakwel aletang nkuny pa chisu chiwanyidina ni kulet yom yikwangulau ya kusambish.

Nvurikap, A! Nzamb wam, ni nyukishap.