Ester
3 Kupwa kwa yom yiney, Mwant Asuwerus wamwinkisha Aman, mwan wa Amedata Mwin Agag, ndond ya piur ni wamuteka piur pa ayilol end awonsu. 2 Atushalapol awonsu a mwant ading ku chis cha chipang chend, amwasinang Aman manungun ni kumuzengamin, mulong mwawiy mwayilejau kusal kud mwant mulong wa kumulimish Aman. Pakwez Mardoshe ndiy walikang kumwasin manungun ap kumuzengamin. 3 Atushalapol a mwant ading ku chis cha chipang chend, amwipula Mardoshe anch: “Mulong wak ubwambwidin kwi mbil ya mwant?” 4 Amwipulang chipul chinech dichuku dawonsu, pakwez ndiy kayiteshangap. Payilejay anch ud Mwin Yud, niyau aya amulejamu Aman mulong wa kuman anch ukuduul yom yading yisadinay Mardoshe.
5 Chad pamanay Aman anch Mardoshe wading ulikin kumwasin manungun ni kumuzengamin, wajimana nakash. 6 Chawiy wova ja kumujip Mardoshe. Pakwez kasotap kwend kwimen pinapa, mulong amulejamu piur pa anamakwend a Mardoshe. Chawiy Aman wasambisha kukimb mutapu wa kuyijiyish anamakwend awonsu a Mardoshe, charumburik anch In Yud awonsu ading ashicha mwi ngand yawonsu yading yiyikedinay Asuwerus.
7 Mwi ngond wa kusambish, ndiy kamu ngond wa Nisan,* mu muvu wa dikum ni yaad (12) wa kuyikel kwa Mwant Asuwerus, ata ubal* kurutu kwa Aman mulong wa kwijik ngond ni dichuku dikutwishau kusal mwamu, ni ubal wawila mwi ngond wa dikum ni yaad (12), ndiy kamu ngond wa Adar.* 8 Kupwa Aman wamuleja Mwant Asuwerus anch: “Kud antu amwing apalangena pakach pa michid yawonsu ya mu maprovens uyikedina, yijil yau yishalijangen kamu ni ya antu akwau awonsu, ni kakatap kuziyin kwi mbil ya mwant. Komb mwant kakutaninapamu kwend chom anch wayilik adandamen kwikal aom. 9 Anch chimukatishin mwant, afundikish mbil ya kuyijiyish antu inay. Am nikupan atalant* tunan dikum (10 000) a utad wa arjang kud atushalapol a mwant chakwel ayiteka mu chipau cha mwant.*
10 Chad mwant wadjola rupet rend ra kubul nich kashe, wamwinkishar Aman, mwan wa Amedata Mwin Agag, wadinga mukankuny wa In Yud. 11 Mwant wamuleja Aman anch: “Nakwinkish kal utad wa arjang ni antu. Ukutwish kuyisal nich yom ukatina.” 12 Pa dichuku da dikum ni yisatu (13) da ngond wa kusambish, ayitazuka in kufund a mwant. Afunda yom yawonsu yalonday Aman kud atubung* a mwant, aguverner ading ayikedina mu maprovens, ni kud ayilol a michid kushalijan. Ayituma mu maprovens mawonsu ni ayifunda kukwatijan ni mutapu ukatau kufund antu a mu provens ni provens ni mu dizu da antu ashichamu. Yom yiney ayifunda mu dijin da Mwant Asuwerus ni ayibula kashe wend.
13 Mikand yiney ayipalangesha mu maprovens mawonsu kusutin aruu a mwant ni yading yipanin mbil ya kuyijip In Yud, kuyishesh ni kuyinongish awonsu, ikal ansand, amapal, an akemp ap amband, mu dichuku dimwing, dichuku da dikum ni yisatu (13) da ngond wa dikum ni yaad (12), ndiy kamu ngond wa Adar, ni kuyitambul yom yau yawonsu. 14 Mu provens ni provens afanyina kupanamu mukand wading ulondina yom yiney ni wafanyina kwikal mbil. Afanyina kulejan mbil yiney kud antu awonsu chakwel irijeka kusal yom yading yilondinawamu pa dichuku dinada. 15 Aruu a mwant aya mau mud mwalonday mwant ni mbil yiney ayilejana kand mu chipang cha mwant mu musumb wa Suz. Chad mwant ni Aman ashakama mulong wa kuna, pakwez mu musumb wa Suz mwikala kanrumbangesh nakash.