Ester
6 Dichuku dinada uchuku, mwant katwishap kulal.* Chawiy walejana kumuletin buku wa jinsang, ni amutanginay. 2 Mu buku winou ading afundinamu yom yalejanay Mardoshe piur pa Bigitan ni Teresh, atushalapol aad a mwant, adinga in kulam yis, akwata mpung ya kumujip Mwant Asuwerus. 3 Mwant wipula anch: “Katumb ik ni difut ik damwinkishinau Mardoshe mulong wa yom yasalay?” Chad atushalapol a pakampwil a mwant akula anch: “Kwikil kwau chom chamusadidinau.”
4 Mu kusut kwa chisu, mwant wipula anch: “Nany uda mu rupang awa?” Chad Aman wading wezang kal mwi ndond yimwing yida pol pa chikumbu cha mwant mulong wa kwambamb ni mwant piur pa kumuzezidik Mardoshe ku mutond wamurijekinay. 5 Atushalapol end amwakula anch: “Aman ndiy udamu.” Chawiy mwant wayela anch: “Mwandjikany.”
6 Pandamay Aman, mwant wamwipula anch: “Yom ik yifanyidina kumusadin muntu ukimbinay mwant kutumbish?” Aman watonga mu muchim wend anch: “Natong yama muntu winou ukimbinay mwant kutumbish!” 7 Chawiy Aman wamuleja mwant anch: “Muntu ukimbinay mwant kutumbish, 8 chifanyidin kumuletin disun didjitingay mwant ni kabar ukatay mwant kukandam. Kabar winou chifanyidin kumudjik chibangul ku mutu. 9 Chifanyidin kupan disun dined ni kabar winou kud chilol mujim wa mwant. Chifanyidin kumudjikad muntu ukimbinay mwant kutumbish, kumukandjik pa kabar ni kumunyingumwish pa dibur da musumb. Ni chifanyidin kutoy kurutu kwend anch: ‘Yawiy yiney yom yifanyidina kumusadin muntu ukimbinay mwant kutumbish!’” 10 Kapamp kamwing mwant wamuleja Aman anch: “Swakal! Send disun ni kabar, yang umusadina Mardoshe Mwin Yud ushicha ku chis cha chipang cha mwant yom yiney walonda kal. Kangal widimb kuswimpap chom ap chimwing.”
11 Chawiy Aman wasenda disun ni kabar. Wamudjika Mardoshe disun dined, wamukandjika pa kabar ni wamunyingumwish pa dibur da musumb oku ukat kutoy kurutu kwend anch: “Yawiy yiney yom yifanyidina kumusadin muntu ukimbinay mwant kutumbish!” 12 Kupwa Mardoshe wachirika ku chis cha chipang cha mwant, pakwez Aman waya kapur mutay kol kwend, waziyang kal nayimp ni wibwikang kal ku mutu. 13 Palejanay Aman yom yawonsu yamushikena kud mukajend Zeresh ni arunend awonsu, in manang end ni mukajend Zeresh amuleja anch: “Mardoshe ukudjatidin kamu pansh pakemp pakemp. Anch ndiy ud Mwin Yud, ukumutwishap ata; disuden ukuwa kurutu kwend.”
14 Pading pachidau kwambamb nend, atushalapol a mwant ashika pinapa, ni kapamp kamwing amusenda Aman aya nend ku musambu warijekay Ester.