Kujingunik kud Yohan
4 Kupwa kwa yom yiney, namana chis cha kwazuril mwiur, ni dizu da kusambish natesha dikat kwinlondish dading doviken mud chidjimin cha mpuny,* danleja anch: “Kandam kunoku, chakwel nikulej yom yifanyidina kusadik.” 2 Kupwa kwa yom yiney, kapamp kamwing spiritu utumbila wasambisha kusal mukach mwam, ni namana nkwas ya want mwiur, ni muntu umwing wading ushichap. 3 Muntu wading ushicha wading umeken mud diyal da jasp ni diyal da sardwan,* ni nkwas yiney ading ayinyingumukin kud nkongal wading ufanakena ni diyal da emerod.
4 Nkwas yiney ading ayinyingumukin kud jinkwas ja want makum maad ni jinying (24), ni namana pa jinkwas jinej pading pashich amakurump makum maad ni anying (24) adjita masun matok ni yibangul ya or ku mitu. 5 Kwi nkwas ya want kwading kubudikin milayilay, mazu ni yidjimin ya nzaj; kwading kand malamp sambwad makat kulabuk mizuzu ya kasu kurutu kwa nkwas yiney, ni malamp minam mamekeshin aspiritu sambwad a Nzamb. 6 Kurutu kwa nkwas ya want, kwading chom chimwing chadinga mud karung wa dikalash, chizazina ni cha zwang.*
Pakach ni pakach pa nkwas ya want* ni kuns kwa nkwas yiney kwading yitang yinying yikweta mwom yading yizwila nich mes too kurutu ni kwinyim. 7 Chitang cha kusambish chikweta mwom chading chifanaken ni ntambu, ni chitang cha kaad chikweta mwom chading chifanaken ni musamb a ngomb ikwal, chitang cha kasatu chikweta mwom chading chikwet chifu mud cha muntu, ni chitang cha kanying chikweta mwom chading chifanaken ni mbur utwikina. 8 Yitang yinying yikweta mwom yiney, chitang ni chitang chading chikwet mapur musamban; yading yizwil nich mes too mujimbu wa kabuj ni mukach. Ni uchuku ni muten, yadandamenang kulond anch: “Utumbila, utumbila, utumbila ud Yehova* Nzamb, Mwin Dikand Dawonsu, wadingaku, udaku, ni wezina.”
9 Chisu chawonsu chiyapanang yitang yikweta mwom uyaj, kalimish ni kujikitish kud Muntu wading ushicha pa nkwas ya want, Ndiy ushicha chikupu ni chikupu, 10 amakurump makum maad ni anying (24) asang manungun kurutu kwa Muntu wading ushicha pa nkwas ya want ni amwifukwilang Muntu ushicha chikupu ni chikupu, ni adjubulang yibangul yau kurutu kwa nkwas ya want, oku akat kulond anch: 11 “Yehova* Nzamb wetu, ey uwanyidin kutambul uyaj, kalimish, ni ukash, mulong yey watanga yom yawonsu, ni mulong wa rusot rey yikalaku ni ayitanga.”