Ka Pō ‘E Tese ta ‘Ạmis Pạnia New World Translation?

‘E fạu his ne ofiofu, famör Uetnes ‘on Jihova a‘es‘ao‘ȧk, pȧn ma fuạp‘ȧk kạinag Puk Ha‘ ma‘oi. Ma tä ‘ạmis räe ne ‘ạmis kop la pạnia Puk Ha‘ het ne vavhiạn ‘on höl‘ȧk ta, la hạiasoagan famori la rak la “‘inea nonojoa   aier ta,” ne te‘is ‘amnȧk ‘on ‘Ạitu se famori. (1 Timoti 2:3, 4) ‘E fạu 1950, ‘ạmis kamat la hot‘ạkia väeag mumuạ ne New World Translation ne höl‘ȧk se kạinag fäeag ne ‘es‘ao‘ȧk ‘e av te‘. Puk Ha‘ te‘ tạupir a‘nonoj se höl‘ȧk mumuạ pạu ne Puk Ha‘a ma höl‘ȧk vạhia se kạinag fäeag 120 ma fumā.

Pa ‘Es ‘e Puk Ha‘ het ne taf ka vavhiạn la hat. Fäega jen ‘e fürfür ne ava, ma höl‘ȧk ne Puk Ha‘ ma‘oi a‘es‘ao‘ȧk fäeag ne a‘noa ka kat taf ra. Tape‘ma, Puk takại‘ȧk ne roa ne räe vạhia, ne nonoj ka tạupir a‘el se fȧ‘ a‘mumuạ pạu ne Puk Ha‘a, pō ma a‘tafan puk Ha‘a ‘e fäeag Hiperiu, Aramea ma Kiris ta.

Pa ‘es ‘e höl‘ȧk het ne aier se Fäeag ‘on ‘Ạitu. Iris ne höl‘ạkia Puk Ha‘a kat noj ra la jen fäeag ne fȧ‘ ‘e ui rȧg ‘on ‘Ạitu, ka iris kop la tạupir a‘el se fäeagat ne Puk Ha‘a fȧ‘ ‘e ‘on mumuạ pạu. ‘E Puk Ha‘ ma‘oi ne höl‘ạki, as ‘on Jihova, kat af‘ȧk ra.

Pa ‘Es ‘e Puk Ha‘ het ne voi‘voi‘ạkia iạ ne ‘On‘on. (2 Samuela 23:2) New World Translation, hö‘ȧk hoi‘ạkia as ‘on Jihova ne fȧ‘ a‘ 7,000 ‘e puk takại‘ȧk ne roa, se Puk Ha‘a la fak ma ne kel‘ȧk ‘e mạl het ne täe ‘e lopo. (Salamo 83:18) ‘E rēko sạkior tē a‘fe‘en ne a‘sok ‘e laloag ne fạu hisaghul, täe hele‘ue la pȧn Puk Ha‘ he te‘is ne a‘värvär la hat ‘e rēko iạ kel‘ȧk a‘tafan räe ‘on ‘Ạitu. Kepoi ka New World Translation höl‘ȧk vȧh ne kat seminte höl‘ȧk ra se ‘ou fäeag ta, ‘ạmis a‘ne‘ne‘ȧk ‘äe la hat se Puk Ha‘a ‘e te‘ ne terạni.​—Josua 1:8; Salamo 1:2, 3.

• Ka ‘e rēko tese ta ‘ạmis rē puer la rē‘ia ta höl‘ȧk fo‘ou ne Puk Ha‘a?

• Ka tes ta iạ ne pa rakoa fiongar ‘on ‘Ạitu la rē ‘e te‘ ne terạni?