Hün se Tese tä ‘Ạitu Va‘ön‘ạki e te Mam‘asa ma te A‘ru?

1. Te mam‘asa kamat tapene?

Te mam‘asa kamat ‘e rȧnte‘ ‘e avat ne Satan ta fäeag siok mumua e. ‘E ‘on kamataga Satan ta iạ ‘ager ag nonojot, ka “ia kat fū ra ‘e aier ta.” (Jone 8:44) Iạ hea‘hea‘ ‘e ‘on huga se titi‘ạkiget ne nonoj la re se ‘Ạitu ‘esea. Satan ta fäeag siok se hȧn mumue ta Ive, ma has‘ia iạ, la a‘fại se iag, ka ‘eake se ‘Ạitu. Atama teag‘esea ma Ive ma iriạ toa‘noa se ‘Ạitu. ‘E ‘on re pure, Atama ho‘im ke te a‘ru ma ala.​—Hat Kamataga 3:1-6, 19.

‘E avat ne Satan ta ‘ea e se Ive la toa‘noa se ‘Ạitu, ia kamat la agại se puer nonoj ‘on ‘Ạitu, ne fuạg fakpuer ‘on iạ ne Puer Purere. Ti‘ pạu famör ne te ag‘esea ma Satan ta ne rou vạhia ‘Ạitu, la ‘oris Pure. Ma tä, Satan ta iạ hele‘uen la “gagaj puer ne rȧn te‘.”​—Hat Jone 14:30; 1 Jone 5:19.

2. Teka fup‘ȧk te ‘on ‘Ạitu kat ‘atakoa ra?

Te‘ ne garue ‘on ‘Ạitu ‘atakoa. Famori ma ‘agero ne ‘Ạitu fup‘ȧk vạhiạ, ‘oris tovavhina se ‘Ạitu po pạu la ‘atakoa. (Nā Hoi‘ạkiag Ne Foho 32:4, 5) ‘Ạitu fup‘ȧk vạhiạ ma na vạhiạ se ‘isa, ‘os noh sại la re pure, la ‘is la hilia teet ne lelei ‘e te mam‘asa. Ma sại la re puer ta‘ag, na‘ia se ‘isa salat la kel‘ạkia ‘os hanisi se ‘Ạitu.​—Hat Jemesa 1:13-15; 1 Jone 5:3.

3. Hün se tese tä ‘Ạitu va‘ön‘ạki e te a‘ru la hele‘ se ‘on ‘i‘i?

Kamat ‘e avat ne agại ta soko e, Jihova va‘ön‘ȧk la agại la re se ‘on puer nonojo. Ka po ‘e tese? La kel‘ạkia ne kat ‘es puret ra la ‘es‘av se famori kepoi ka ‘Ạitu kat puạ ra. (Le Marag Ta 7:29; 8:9) ‘E vạhiạg ne fạu 6,000 ne rogrog ne ava ne mou se famori, aier‘ạkiạg ta taf pạu. Puer fakfamori kal pora la ‘ut‘ạkia pelu, ag ne‘ne‘i, puer se nonojo, ne masȧ‘ raksa‘a.​—Hat Jeremaia 10:23; Roma 9:17.

‘On tutu ne puer fakfamori, puer ‘on ‘Ạitu ‘esea ta pola ‘es‘av se te‘ ne famör ne tạria. (Aisea 48:17, 18) Jihova ‘el‘ia la a‘ofia te‘ ne matantu fakfamori. Ka famör ne hilia ‘Ạitu ‘esea la puer se irisa täla huạ‘ia rȧnte‘.​—Aisea 11:9.​—Hat Taniela 2:44.

4. Tes ta huạg lal ‘on ‘Ạitu va‘ön‘ȧk ‘is la re?

Satan ta ‘ea ne kat ‘es le‘et ra la pola agag se Jihova ‘e hanis airet ne täe ‘e ‘on huga. Teka ‘äe la ‘oaf la kel‘ȧk ne te ne iạ ‘ea kat aier ra? ‘Äe la po sema! Huạg lal ‘on ‘Ạitu va‘ön‘ȧk ‘is ‘atakoa la kel‘ạkia ne ‘is ‘oaf se puer ‘on ‘Ạitu ‘e puer fakfamori. Is kel‘ạkia ‘os hil te ‘e mạurit ne ‘is mȧür‘ạki.​—Hat Jope 1:8-12; Fäeag ‘Es Fuạga 27:11.

5. ‘Is la hil tapen ‘Ạitu la ‘os Puret?

‘Is la pola hilia ‘Ạitu la ‘os Puret ‘e ‘os rakoag ma a‘sokoạg ne titi‘ạkiạg aire ne salag ‘esea ma Fäeag ‘on ‘Ạitu, ‘e Puk Ha‘ heta. (Jone 4:23) ‘Is la pola rou puer ‘on Satan ta ‘e ‘os hȧ‘ạkiạg ne ‘is ‘e te fak politiki ma pelu, la fak se te ne Jisu re.​—Hat Jone 17:14.

Satan ta a‘esav‘ạkia ‘on ne‘ne‘i la re‘ia ag se ma‘ma‘a, ma ag ne la mane‘ạkia ta le‘et la fak se te ‘i te lelei. ‘E avat ne ‘is rou e ag tape‘ ta, kạumane‘ag ‘e ‘on rerege ma kạinaga re kaha‘ȧk ne agạia ‘is. (1 Pita 4:3, 4) Ma ‘is kop la re ta hil teet. Teka ‘is la tete ag‘esea ma famör ne hanis ‘e ‘Ạitu? Teka ‘is la po la tovavhian se ‘on muạ‘ȧk te ‘atmại ka mäeav hanisi? Kepoi ka ‘is re la fak ma sin, ma ‘is aier‘ȧk ne Satan ta siok ‘e avat ne iạ ‘ea e ne ‘is kat pora la fumou se ‘Ạitu ‘e avat ne ‘is agtạu ma te noanoa.​—Hat 1 Korinita 6:9, 10; 15:33.

Hanis ‘on ‘Ạitu se famori iạ a‘fumou‘ȧk vạhia ‘on fäega, ne te mam‘asa ma te a‘ru täla a‘öf pạu. Iris ne mā se te te‘is, täla noh ‘oaf‘oaf ‘e rȧnte‘ se av se ‘es tohiget ne tore.​—Hat Jone 3:16.