‘Äe la ‘Inea Tapen Titi‘ạkiạg Aier ta?

1. Teka ma ‘on rot aier ‘eseat?

Jisu rak‘ȧk se ‘on lelea‘ rak te ne ma ‘on rot ‘eseat, ta rot aier ta. Ia fak se salat ne tạkia ‘is se mȧür se ‘es a‘ofige. Jisu ‘eag: ‘Iris heuạ räe’ se sal ta. (Mataio 7:14, NW) ‘Ạitu tạria ma titi‘ạkiget ne la‘oag ‘esea ma aier ta ne täe ‘e ‘on Fäega. Te‘ ne famör ‘atakoa ne titi‘ȧk aire, teag‘esea ‘e ‘oris pilifi.​—Hat Jone 4:23, 24; 14:6; Efeso 4:4, 5.

2. Ka tes tä Jisu ‘ea ‘e reko famör fakKaristo a‘sioksiko?

Jisu fakne‘ne‘ vạhia ne parofiat siok ‘ie la hoa‘ sese la mane‘ȧk mā ‘on famör fakKaristo. ‘Oris kelkelega, iris fakse famör titi‘ȧk aire. ‘Oris rotu ‘ea ne iris famör fakKaristo. Ka ‘is pola ‘inea ne iris kạinag famör tapene. La po tapen? Titi‘ạkiạg aier ta ‘esea ta hue‘ȧk famör fakKaristo aire, ‘e ‘oris aga ma rere.​—Hat Mataio 7:13-23.

3. ‘Äe la pola ‘inea tapen famör ne titi‘ȧk aire?

Sakior se aier‘ạkiạg liạm ‘i:

• Famör ne titi‘ȧk aire ‘e‘ȧk Puk Ha‘ heta la ta‘ag Fäeag ‘on ‘Ạitu. Iris na ‘oris vahia la mȧür‘ȧk ‘e ‘oris mạuri ‘on puer‘ȧk te. Ma rot aier ta tu ‘e rot ne la‘oag ‘esea ma puer‘ȧk te fakfamori. (Mataio 15:7-9) Famör ne titi‘ȧk aire re‘ia teet ne salag ‘esea ma te ne iris marag‘ạkia.​—Hat Jone 17:17; 2 Timoti 3:16, 17.

• Lelea‘ rak te aier ‘on Jisu fakte‘ȧk as ‘on ‘Ạitu, Jihova. Jisu fakte‘ȧk as ‘on ‘Ạitu ‘e ‘on rak‘ạkiạg ne la famori la ‘inea. Ia hạiasoagan famori la ‘inea ‘Ạitu ma rak‘ȧk se irisa la ro‘ạit ma ȧf‘ȧk as ‘on ‘Ạitu la ma‘ma‘. (Mataio 6:9) ‘E utut ne ‘äe noho e, ka rot teset ta fäeạg‘ạkia as ‘on ‘Ạitu?​—Hat Jone 17:26; Roma 10:13, 14.

• Famör fakKaristo aire ta marag‘ạkia Pure‘ag ‘on ‘Ạitu. ‘Ạitu fekạu‘ạkia Jisu la marag‘ạkia rog heg ne Pure‘ag ta. Pure‘ag ‘on ‘Ạitu ‘esea ta famori ‘airöt‘ȧk sin. Jisu fäefäeag‘ạkia ma kikia la hele‘ se avat ne iạ ala e. (Luke 4:43; 8:1; 23:42, 43) Ia ‘ea ne ‘on lelea‘ rak te la marag‘ȧk tape‘ma. Kepoi ka ta famorit hạifäegag ma ‘äe ‘e reko Pure‘ag ‘on ‘Ạitu, ma rot teset tä ‘äe a‘häe ne iạ mou sin?​—Hat Mataio 24:14.

• Lelea‘ rak te ‘on Jisu kat mou ra se rȧnte‘. ‘Äe la pola ‘inea iris ‘e reko iris kat ‘es teet ra la re ‘e te fak politiki ma uạke ne lag hanua. (Jone 17:16; 18:36) Tape‘ma, iris kat taupir ra se ag ne re la mane‘ạkia ta le‘et ma a‘häe ne rȧnte‘.​—Hat Jemesa 4:4.

• Famör fakKaristo aire iris hạihanisiạg aier pạu le‘et se le‘et. ‘E reko Fäeag ‘on ‘Ạitu, ta iris rakoa la iris la ‘e‘ȧk kạinag tutu. Kop ma rot a‘sioksiko gat ma ke av a‘ne‘ne‘ua pel ne hanua ‘e ‘oris teag‘esea, ka famör ne mou se titi‘ạkiạg aier ta kal a‘sok ra te tape‘ ta. (Maika 4:1-3) Ka, famör fakKaristo aire iris na‘ia ‘oris ava ma koroa la hạiasoagan ma a‘ne‘ne‘ạkia iris ‘e ‘on rerege.​—Hat Jone 13:34, 35; 1 Jone 4:20.

4. ‘Äe la ‘inea tapen rot aier ta?

Ka rot teset ta re ‘oris rak‘ạk tē ‘atakoa ‘e Fäeag ‘on ‘Ạitu, fakte‘ạkia as ‘on ‘Ạitu, ma marag‘ạkia Pure‘ag ‘on ‘Ạitu la tä ‘airöt‘ạkiạg ‘esea ‘on famori? Ka kạuạg famör teset ta garue‘ạkia hanisi ma ại‘ȧk iris ‘e pelu? Ka tes tä ‘äe a‘häe?​—Hat 1 Jone 3:10-12.