Ka tei ka ‘Äe la Rakoa Huạg Fe‘en ‘on Jihova ma Jisu, ‘e Av ne A‘häe‘ạkiạg ta?
1. Ka Uetnes ‘on Jihova kel‘ȧk tapen ‘oris huạg fe‘eni ‘e av ne a‘häe‘ạkiạg ta?
1 Jihova huạg fe‘en la a‘sokoa ‘on ‘amnạki. ‘Ạliạg‘ạkia ạlạlum‘ạkiạg ne Pure‘ag ‘on ‘Ạitu, ‘Ạisea 9:7 ‘ea: “Fe‘en ‘on Jihova, Gagaj ne kạupelu, täla a‘sokoa tē te‘is.” La fak ma ‘e avat ne iạ ‘e rȧn te‘, Le‘ ‘on ‘Ạitu kel‘ạkia ‘on huạg fe‘eni se titi‘ạkiạg ma‘ma‘a ‘e ‘on garue marag ta. (Jone 2:13-17; 4:34) ‘E av ne a‘häe‘ạkiạg ta ‘e te‘ ne fạu, iris miliön hisaghul lelea‘ ne hoa‘kia rog heg ta ‘e rȧn te‘, fe‘en la rakoa huạg fe‘en ‘on Jihova ma Jisu ‘e la ‘ut‘ạkia se muạ ‘oris ‘es väega ‘e garue marag ta. Ka tei ka ‘äe la laloag‘ȧk ‘e iris ‘i?
2. Ka tes ta huạg fe‘eni la rue‘ạkia ‘is la rē ‘e 7 Maji?
2 ‘Ih tē ne A‘häe‘ạkiạg ta: Iris ‘e laloag ne kạurotuga la ‘oaf‘oaf ‘e ‘oris huạg fe‘eni la ‘ih famör ma‘oi pạu se ‘Omoe ‘on Gagaja ‘e 3 ‘Epereli. ‘E kato‘ag ne a‘häe‘ạkiạg ta, iris ne ‘ih la leum täla rakoa hanis ‘on Jihova ma ‘on Le‘ ta, Pure‘ag ta, ma ‘os Rak Puk Ha‘ se tög ta. ‘Ih tē ne fạu te‘ se A‘häe‘ạkiạg ta la kamat ‘e A‘iạt ta, 7 Maji. ‘Os huạg fe‘eni ma kat a‘fạvir ra täla hạiasoagan ‘is la garue ‘atakoan ‘os mäpe ‘e laloag ne av ne fại sio. Tē te‘is täla rue‘ạkia ‘is la ‘ihia ‘os kạugarueaga, kạinaga, kạurakoag ta, iris ne ‘is hö‘ sin, ma tape‘ma se iris ‘os kạumane‘aga.
3. Ka ‘is la pō tapen la a‘ofrạu‘ạkia ‘os garue marag ta ‘e huạl ne Maji ma ‘Epereli?
3 Painia Hạiasoag: Huạg fe‘eni täla rue‘ạkia ‘is la a‘ofrạu‘ạkia ‘os garue marag ta. Kat araruạ‘ȧk ra ne ma‘oit la painia hạiasoag ‘e huạl ne Maji ma ‘Epereli, ‘is la pō la hil la rē aoa 30. Tapen se la häifäegag‘ạkia ‘e ‘ou titi‘ȧk ne kạunohoga ‘e tea‘ hete‘, ne le‘et ‘e kạunohoag ta la pō tapen la a‘ofrạu‘ạkia ‘on la ‘es väeag ‘e garue marag ta. (FEFuạga 15:22) ‘Ou huạg fe‘eni la pō la rue‘ạkia iris ne täe ‘e laloag ne kạurotuga, ta‘ag ‘äe la fäeag‘ạkia se irisa tē ne ‘äe fūfū‘ȧk vạhia la a‘ofrạu‘ạkia ‘ou garue marag ta. ‘Ou huạg fe‘eni la a‘ofrạu‘ạkia ‘ou garue marag ta, ‘äe kel‘ạkia ne ‘äe rakoa huạg fe‘en ‘on Jisu.—Mareko 6:31-34.
4. Ka tes ta ‘is pō ma a‘sok ‘e ‘os rakoag ne huạg fe‘en ‘on Jihova ma Jisu?
4 ‘Os rakoag ne huạg fe‘en ‘on Jihova ma Jisu ‘e av ne A‘häe‘ạkiạg ta ‘is täla agtạu ma ạlạlum‘ạkiạg ma‘oi. ‘Is täla pō la uetnes se famör ma‘oi. ‘Is la pō tape‘ma ‘oaf‘ofa ‘e ‘os agaga se Jihova ma ‘os nā tē. (Garue 20:35) ‘On pumuạ pạu, ‘is täla a‘ofan ‘Ạitu ma ‘on Le‘ ta, iriạ ne huạg fe‘eni.