A‘es‘av‘ạkia “A‘luạk‘ạkiget se Fäeag ‘on ‘Ạitu”—La Kamatan Hạifäegaga
1. Ka tē garueag fo‘ou tese tä ‘is pō se‘ se garue marag ta?
1 ‘E a‘fo‘ou‘ạkiạg ne New World Translation ma ‘on väeag a‘pumuạ‘ạkit ‘e ‘on kamatag heta “An Introduction to God’s Word,” ka ‘e fäeag Rotuạm ta ‘is ‘es ‘e puk het ‘on filo‘ ta, “A‘luạk‘ạkiget se Fäeag ‘on ‘Ạitu.” Ka ‘is la a‘es‘av‘ȧk tapen tē garueag fo‘ou te‘ ‘e ‘os la ösös se garue marag ta? Iạ väea ut ne puku se fȧn ne filo‘ tūtū ne Puk Ha‘a, la fak ma se puk ta Reasoning, iạ ‘es‘ao pạu la kamatan hạifäegaga.
2. Ka ‘is la ‘es‘av‘ȧk tapen “A‘luạk‘ạkiget se Fäeag ‘on ‘Ạitu” ‘e garue marag ta?
2 Kop ma ‘äe la hil la a‘es‘av‘ạkia sạio‘ 8 ma ‘ea: “‘Ạmis ạsim se ‘omus ut te‘ ‘e rēko famör ma‘oi a‘häe ne, ‘Te‘ ka tē a‘rū ne soksok se famori sar ‘on ‘Ạitu?’ [‘E ut ‘on rereag, iạ la ‘es‘ao ti‘ pạu la kel‘ạkia sạio‘ ta se famör ‘es rī ta.] Ka tes tä ‘ou räe? [Nā av la iạ la togia sạio‘ ta.] Tög ne Puk Ha‘a nā se sạio‘ te‘ a‘fürmariạ‘ȧk huạg pạu.” Hat ma hạifäegag‘ạkia ut ne puk het ne ut puk ‘atakoa ‘e Puk Ha‘ heta. Kepoi ka famör ‘es rī ta ‘oaf, ‘äe la pō la kel‘ạkia se iạ sạio‘ 20 ‘e kamatag heta ma nā la iạ la hilia sạio‘ het ne la hạifäegag sin ‘e ȧs te tea‘ hete‘. Ne ‘äe la pō la nā se ia puk ne ‘es‘av‘ȧk se rak Puk Ha‘a ne ma ‘on rogrog hoi‘ȧk se filo‘ het ne ‘ạuạr hạifäegag sin.
3. Ka ‘is la a‘es‘av‘ȧk tapen “A‘luạk‘ạkiget se Fäeag ‘on ‘Ạitu” la kamatan hạifäegaga ‘e ut ne famori kat rot fakKaristo ra?
3 Sạio‘ 4 ma 13 se 17 kop ma la ‘es‘ao ‘e avat ne ‘is la marag ‘e ut ne famori kat rot fakKaristo ra. Kel‘ạkiạg het, ‘äe la pō la ‘es‘av‘ạkia rogrog ne täe ‘e sạio‘ 17 ma ‘ea: “‘Ạmis ạsim la hạifäegag‘ạkia filo‘ het ne la pō la hạiasoag se kạunohoga. Ka tei ka ‘äe kạu‘ȧk ne kạunohoga agtạu ma noanoa ma‘oi ‘e ‘on ‘i‘i? [Nā av la iạ la tög sạio‘ ta.] ‘Inos ma‘oi räe ne fäeag te‘ ‘es‘ao ti‘ pạu: “Hȧn ta kop la fea se ‘on vävän ta.” [‘Äe kat a‘noa ‘ea ra ne fäeag ‘i tekạim ‘e Efeso 5:33. Kepoi ka ‘äe hạifäegag ma ta hạnit, ‘äe la pō la rạu Efeso 5:28.] Ka tei ka ‘äe a‘häe ne garue‘ạkiạg ne muạ‘ạkiạg te‘ la ‘es‘ao se mȧür fak ‘inoso?”
4. Ka tes tä ‘äe la pō la rē ‘e a‘ofiạg ne ‘ou hạifäegag ta ma ta le‘et ne kat rot fakKaristo ra?
4 ‘E vạhiạg ne ‘omuạr hạifäegag ta, fū‘ȧk ta avat la sok hoi‘ạkia ‘omuạr hạifäegaga. Ne fūfū‘ȧk la hạifäegag se ta ut ne puk hoi‘ạkit ‘e sại‘ot ne ‘ạuạr hạifäegag sin. ‘E ta av leleit, kel‘ȧk se famör ‘es rī ta ne fäeag ne ‘äe hạiväeag ma iạ ho‘am ‘e Puk Ha‘a. ‘E ‘ou sạkiroag se ‘omuạr hạifäegag mumue ta ma ‘on räe se Puk Ha‘a, nā se ia puk het ne ‘äe a‘häe iạ la ‘oaf se.—‘Io se peap laloag ne ‘Os Garue Marag ne Pure‘aga ne Tisempa 2013 ‘e fäeag fifis ta.