A‘es‘ao‘ȧk A‘lelei ‘Ou Ava ‘e Garue Marag ta
Uetnes ‘on Jihova a‘es‘ao‘ȧk aoa‘ 1,945,487,604 ‘e garue marag ta ‘e laloag ne fạu fak garue ne 2014—iạ aier‘ạkiget ne ‘is a‘fūmou‘ȧk la a‘popotoa ‘is ‘e ‘os agaga se Jihova! (Sal. 110:3; 1 Kor. 15:58) ‘E rēko “av ta a‘luạk‘ạkimea,” tei ka ‘is la pō la a‘es‘ao‘ạkia ‘os av pumua ‘e garue marag ta la hạiasoagan famör ma‘oi?—1 Kor. 7:29.
A‘es‘ao‘ȧk a‘lelei ne ‘os ava ‘e garue marag ta ‘is kop la a‘vavhinen la jenea ‘os rērē ne garue ta. Kel‘ạkiạg het, kepoi ka ‘äe garue aoa‘ het ka kat fäeag pạu ra se ta le‘et, ka tei ka ‘äe la pō la rē se ta jen he his la pō la ‘äe la hạifäegag ma famör ma‘oi? Fūfū ne utu kat tatạu ra. Ka, a‘häe he his ‘i la pō la hạiasoagan ‘äe la a‘es‘ao‘ȧk a‘lelei ‘ou ava la pō la garue ne ‘äe rē kal fak ra se ne ‘äe “‘us‘usua lȧg ta.”—1 Kor. 9:26.
Uetnes ‘e Rīit- se-Rīit: ‘E laloag ne fạu hisaghul ne ofiofu, iris ne hoa‘ maraga ‘oris ag het la kamatan terȧn ta ‘e garue marag ta, ‘e la marag ‘e rīit se rīit. Ka, ma‘oit la‘ se garue ‘e rȧn ta, ka tapen se la ȧs‘ȧk la marag ‘e riit se rīit ‘e asoah ta, ‘e avat ne famori ‘e ‘oris hanua? Kop ma la tạu hue lelei la Uetnes ‘e far sala ne ut garueaga ‘e rȧn ta.
Uetnes Ofrạu: Tepeli ma tē nāag puk toktoko la pō la fū ‘e ut popoto ‘e laloag ne utut ne väe se kạurotuạg ta la garue e. (‘Io se ‘Os Garue Marag ne Pure‘aga ne Julai 2013, rp. 5 ‘e fäeag fifis ta.) Kepoi ka ut ta tokana ‘e pō famör Komiti ne Garue ne Kạurotuạg ta la pō la rē puer la tuk tē nāag puk toktoko ne tepel ta se utut ne la pō famör.
Hö‘ Hoi‘ȧk ta ma Rak Puk Ha‘a: Ka tei ka ‘äe la pō la fūfū‘ȧk la ‘ou hö‘ hoi‘ȧk ta ne rak Puk Ha‘a la rē ‘e ta av hoi‘ạkit ka ‘eake av ne garue marag ta? Kel‘ạkiạg het, kepoi ka garue marag ta ‘e rīit se rīit ‘e mijarȧn ne a‘iạt ta hue lelei, ka tei ka ‘äe la pō la a‘sok ‘ou rak Puk Ha‘ heta ‘e asoah ta? ‘E av ne la hö‘ hoi‘ạki, ka tei ka iris ne hoa‘ maraga la pō la väeväe se ta kạugarueag mea‘mea‘ het la pō la a‘sok ta tē rạurạut ‘e garue marag ta?
Iạ aier ne ‘is la pō la hat ‘os ao‘a ‘e avat ma ne ‘is ‘es väeag ‘e garue marag ta, ka ‘e avat ne garue ta la tạu hue lelei ‘os ‘ofa la pō se tē a‘at. Kepoi ka ‘äe räe ne garue marag ta ‘e rīit se rīit kat hue lelei ra ‘e ta av het, ȧs‘ȧk se ta sal hoi‘ạkit. Ro‘ạit se Jihova, “Gagajat ne ‘on‘on vek ta,” ma far ‘on hạiasoaga la pō la ‘äe la ‘es‘ao‘ȧk a‘lelei ‘ou ava ‘e garue marag ta!—Mat. 9:38.