Tē ne la A‘häe‘ȧk ‘e Rēko Kato‘ag ne Väeag Hanua

◼ Av ne Prokräm ta: Utut ne kato‘ag ta la a‘soko la säe ‘e 8:00 a.m. Tōag ne mak mumue ta la kamat ‘e 9:20 a.m. ‘e terȧn he rua ‘atama. ‘E av heta‘ag, ‘is ‘atakoa tạu la päe se ‘os päega la pō la prokräm ta la kamat ‘e av het ne nonoj la kamata. Mak fakmür ta ma ro‘ạit ta la ‘e 4:55 p.m. ‘e ‘A‘iạt ta ma ‘e Sapatō ta 3:45 p.m.

◼ Voivoi‘ạkia Jihova ‘e Maka’: Famör ‘on ‘Ạitu ‘e ‘on mumua voivoi‘ạkia Jihova ‘e maka, ma maka hele‘ la väeag a‘pumuạ‘ạkit ‘e titi‘ạkiạg aire ‘e ‘on ‘i‘i. (Sal. 28:7) Prokräm ne mijarȧn ta ma asoah ta ne ‘os kato‘ag ne väeag hanua la kamat ‘e tōag ne maka. Iạ ‘eake mak la‘ma ka iạ ös la pō la ‘is la rakoa Jihova ma la titi‘ȧk tape‘ma se ia. ‘E avat ne jämän ta ‘ea ne tōag ne mak ta täla kamatan, ta‘ag av het la ‘äe la päe se ‘ou päeag ta ma la a‘fại ‘e huạg a‘pumuạ‘ạki tōag ne mak ta. ‘Os a‘sokoag ne tē ‘i kel‘ȧk ne ‘is a‘pumuạ‘ȧk garue fe‘en ne kạu jạuag tē ne Watchtower orchestra. A‘ ruạ fạut hensạsiạg ‘i tög ‘oris sala ma la‘ se Patterson, New York, la osia tōag ne mak helav ‘i la ‘is la a‘pumuạ‘ȧk ‘e av tape‘i. ‘E vạhiạg ne ‘os a‘fạiag se tōag ne maka, ‘is ‘atakoa la tēag‘esea la voivoi‘ạkia Jihova ‘e la suạ ag‘esea ne ‘os mak ne Pure‘aga.

◼ Fūạg motokā ta: ‘E ut ‘atakoa ne kato‘ag ne väeag hanua la a‘soko ma ‘on fūạg ne motokā. Iris ne ma ‘oris motokā ma‘oi, iạ la lelei kepoi ka la ‘es‘ao‘ȧk ma motokā ‘eseat, ‘e rēko ut fūạg motokā ta kat ti‘ ra. Ma ‘on ut fūạg motokā se iris ne fup ‘af‘afa.

◼ A‘pā‘ȧk ne Päega: ‘E avat ne nu‘sura la säe ‘e te‘ ne mijarȧn ‘i, figalelei ma la se ‘öf‘ȧk se utut ne ‘is ‘oaf la päe la fak se ‘is hạirereag ma ‘os hensạsiga. ‘Is la ‘es ‘e huạg kokon‘ạki, ma nā‘ia tē ne ‘is ‘oaf la pō se ‘os hensạsiga, ma ‘inea‘ia ne ‘is famör rot fakKaristo aier ma la rue‘ạkia iris ne tore la a‘kölör‘ạkia ‘Ạitu. (Jone 13:34, 35; 1 Kor. 13:5; 1 Pita 2:12) A‘pā‘ȧk ne päega la rē ke se iris ne höt ag‘eseam ma ‘äe ‘e motokā ta, iris ne noh ag‘esea ma ‘äe, ne iris ne rak Puk Ha‘ ma ‘äe. Figalelei ma se hehe‘ȧk ta tē se päeag ne ‘äe kat apā‘ạki. Kepoi ka ‘äe la a‘sok tē te‘is ma iạ la pō la vavhiạn se iris ne tore la ‘inea ne päeag ‘i taf. Ma ‘on utut a‘pā‘ȧk se iris ne mamfua ma iris ne ‘af‘afa. ‘E rēko utut ne a‘pā‘ȧk se iris ‘i kat ti‘ ra, kop ma la pō se ke le‘ het ne le‘ ruạ la päe ma hạiasoag se irisa.

◼ ‘Os Hạ‘hạ‘u la Fakag: ‘Os hạ‘hạ‘u ‘e av ne kato‘ag ta kop la fakag ka fakeanean, ka ‘eake la kel‘ạkia ag ma hạ‘hạ‘ ne rȧn te‘. (1 Tim. 2:9) ‘Is la matạ‘ la ‘os hạ‘hạ‘u ma kelkelega la fakag ka ma‘ma‘ ‘e avat ne ‘is la‘ ne rou hotel ta. ‘Is la fakman‘iạ‘ȧk la hạ‘ȧk ‘os badge ne kato‘ag ta, ma la se masrag la uetnes ‘e avat ne ‘is pō. ‘Os kelkelega ma ag lelei ‘e kato‘ag ne väeag hanua ne kankanam ‘eake la rue‘ạkia iris ne huạg vạivại la a‘fại se rogrog a‘mȧür‘ȧk tē ne Puk Ha‘a ma tä‘mä‘ie, ka iạ la a‘oaf tape‘ma huạg ‘on Jihova.​—Sef. 3:17.

◼ Huạg ‘Atmại ‘e ‘Es‘ao‘ȧk ne Tē La‘ Mere: ‘Is kel‘ạkia huạg ‘atmại ‘e av ne prokräm ta, ‘e ‘os la a‘potsusun ne ‘os telefono ma tē la‘ mere la se ‘ifaliạg ne la mane‘ạkia a‘fại tē ‘on iris ne tore. Kepoi ka la ‘es‘av‘ȧk tē la sik mạl het, tablet, ne ta tē la‘ mer hoi‘ȧk het, matạ‘ la se ‘oroia iris ne täe ‘e fạ‘ heta. Ma tape‘ma ‘is kal nā rogrog ra ‘e telefon ta ne tablet ‘e av ne prokräm ta la‘la‘o e.

◼ Iạniạn ta: Figalelei ma ho‘am ‘eu ‘ātē iạniạn ta ka la se roua ut ne kato‘ag ta la ao tē la ‘ā. Lelei la ‘es‘ao‘ȧk ta tē plȧstik nāag tē mea‘mea‘ het ne la pō la tuk se fȧn ne päeag heta. Kat aier‘ȧk ra la ho‘am tē lasa ma tē nāag tē la ‘ā titi‘ ne ‘es‘ao‘ȧk se pikniki.

◼ Nā Tē: ‘Is la pō la kel‘ạkia ‘os a‘pumuạ‘ȧk ne fūfū‘ȧk ne kato‘aga ‘e ‘os la nā tē ‘e ‘oaf ne ‘os huga la hạiasoag se garue ofrạu ta ‘e rȧn te‘ ‘atakoa. Kepoi ka la nā tē ‘e jeke, ‘äe la fȧ‘ se “Christian Congregation of Jehovah’s Witnesses.” ‘Äe la pō la ‘es‘ao‘ȧk tape‘ma ‘ou debit ne credit card.

◼ Vại: Kepoi ka ‘äe ‘af‘af figalelei ma ho‘af ‘ou hue ‘e rēko kal ‘es hue ra la nā ‘e kato‘ag te‘. Se iris ne ‘es‘ao‘ȧk sui ne masȧ‘ ne suạk ta, nonoj la iris la ȧf‘ȧk a‘lelei, ka la se nā se tē nāag moaf ta ‘e kato‘ag ta ne ‘e hotel ta.

◼ Matạ‘: Figalelei ma matạ‘ la se safei ne la jar. Kạinag säkänäv ne a‘mou hạisarag‘ȧk tē ta säkänäv lamlama. Iạ la lelei kepoi la kop‘ȧk säkänäv ne la tạu lelei ka la vavhiạn ‘ou la jor ‘e molmoliạg ta ne ta ut hoi‘ȧk ‘e kato‘ag ta.

◼ Tē Toktok ‘on Lä‘riri‘ ma Päega: Tē toktok ‘on lä‘riri‘i ma päeag ne ‘es‘ao‘ȧk se sisi la se ho‘am se kato‘ag ta. Ka la pō la ho‘am päeag ‘on lä‘riri‘i ne safety seat la tuk ‘el se päeag ne ö‘rua.

◼ Tē A‘pene‘isi: Kato‘ag ne väeag hanuạ ma‘oi la a‘sok ‘e rī pā kạlu ka la ‘es‘ao‘ȧk lȧg la‘ mere. Ka iạ la tē mäeavhanisit kepoi ka ‘is la ‘es‘ao‘ȧk a‘tạu sạni ma tē a‘pene‘isi pō ‘e ne‘ne‘ ne ‘on poa‘ heta la pō la hö‘ ‘af‘af se iris ne hununuka.​—1 Kor. 10:24.

◼ Please Follow Up (S-43) Fom: Please Follow Up fom la ‘es‘ao‘ȧk ‘e avat ne ‘äe uetnes ofrạu se ta le‘et ‘e kato‘ag ta. A‘vȧh fom ta ma nā se Maj ne Puku ne la nā se sạsig fāat ne matạ‘ se puk ne ‘ou kạurotuạg ta.

◼ Rī ‘ātēaga: Faktē‘ȧk as ‘on Jihova ‘e ‘ou la kel‘ȧk ne ag lelei ‘e rī ‘ātēaga. ‘Ou hạ‘hạ‘u la kel‘ȧk ne ‘äe fekạu fakKaristo het.

◼ Hotel ta:

(1) Tög (book) ma rum ne ‘äe la ‘es‘ao‘ạki, ma noh‘ȧk ma famör ne hạitạuạg la noh ‘e rum ta.

(2) Hö‘ȧk rum ta ‘e av het ne ta tē pöpör het soko, ma rak‘ȧk mij se hotel ta, la pō la nā se iris hoi‘ȧk ne pa ‘es la ‘es‘ao‘ȧk rum ta. (Mat. 5:37) ‘Äe kal pō hoi‘ȧk ra ‘ou selene (deposit) kepoi ka ‘äe la hö‘ȧk rum ta terȧn ruạ mumuạ la kato‘ag ta la a‘soko.

(3) A‘häe‘ȧk ‘e avat ne ‘äe la ‘es‘ao‘ȧk ‘ou debit ne credit card la sur se hotel ta, ‘oris ag het la sasap se ‘ou selene ‘e card ta la tög ‘atakoan rum ta, ma tē ne ‘äe la mane‘ȧk ‘e ‘ou noh ta ‘e hotel ta. ‘Äe kal pō ra la ‘es‘ao‘ȧk selene se av het ne ‘äe tög ma vȧh ‘ou tē ne ‘äe ‘es‘av‘ạki ‘e vạhiạg ne terȧn he his ne ‘ou noh ta.

(4) Hoa‘ ta tē toktok het la höt‘ạkia ‘ou ‘afa ‘e avat ne ‘äe iạtiạt la ‘es‘ao‘ạki, ma hö‘ȧk mij pạu ‘e avat ne ‘äe vạhi la pō la iris ne tore la ‘es‘ao‘ȧk.

(5) Kepoi ka ag ne ‘ou hanua, nā ta selen la ‘uạ‘uạ‘ạkia iris ne garue ‘e hotel ta ne hạiasoag se hoa‘hoa‘ ne ‘ou tē hạ‘uga ma se iris ne a‘ma‘ma‘an rum ne ‘ạus noho.

(6) Fun tē ‘e rum ta kepoi ka aier‘ȧk.

(7) Kepoi ka ‘ā mah ta laloag‘ȧk ‘e tög ne rum ta, ‘es‘ao‘ȧk a‘lelei tē ne osi ma se hoa‘kia tēla‘ā, köf ta ne ta tē hoi‘ȧk se ut ne kato‘ag ta a‘soko.

(8) Kel‘ạkia ag ne hue‘ạkia hue ne ‘at ha‘a ‘e av ne ‘is la hạifäegag ma iris ne garue. ‘E rēko iris matạ‘ se famör ma‘oi, iris la a‘pumuạ‘ȧk ‘os kel‘ạkiạg ne mäeavhanisi, huạg lala ma ag figalelei.

(9) O‘o‘i kop la matạ‘ se ‘oris lele‘a ‘e te‘ ne ava ‘e hotel ta, laloag‘ȧk ut kakạuạg ta, ut ne ös ta ma ‘e ut hoi‘ȧk.

◼ Hạiasoag la Garue: Le‘et ne pa ‘es la hạiasoaga la la‘ se Maj ne Hạiasoag la Garue. Iris lä‘riri‘ ne fạu 16 ne mea‘mea‘ se‘ la pō la hạiasoag ‘e fȧn ne muạ‘ạkiạg ne ‘oris ‘o‘oi ne ta sạsigit ne mafuạ se‘.