Rak tē ‘e Hensạsiạg Ma‘at Fak‘ata

‘Is a‘pumuạ‘ȧk aier hensạsiạg ma‘at fak‘ata ‘e laloag ne ‘os kạurotuga. Iris ‘on rereag huạg aier ‘e ‘oris agaga se Jihova ‘e laloag ne ta av roat. Iris ‘on rereag kop ma kotä fạiạv se‘ ‘e garue marag ta. Iris hensạsiạg ‘i kel vạhia se salat ne Jisu muạ‘ạkia kạurotuạg rot fakKaristo ‘e av fakmür te‘, ‘e ‘on a‘ofrạu‘ȧk ne ‘oris garue marag ta ma ‘oris la rē lelea‘ rak tē. (Mat. 28:19, 20) ‘E ‘oris ‘es väeag ‘e garue marag ta, iris pō se “ne‘ne‘ man ti‘ ta” ‘e ‘oris agtạu ma noanoa ma pefä‘e. (2 Kor. 4:7) Ma ‘on tē ma‘oi ‘is la pō la rak ‘e iris hensạsiạg ma‘at fak‘at ‘i. ‘E av ne la nā av se irisa, iris ‘oaf pạu la rak‘ạkia se iris ne tore tē ne iris rak vạhia. (Sal. 71:18) ‘Is kop la nā av la rak tē ‘e irisa. Ka la pō tapen?

‘E Garue Marag ta. La pō la garue marag ta la tạu hue lelei, rak‘ȧk tēet kop la rē se iris ne fo‘ou ne se iris ne kat potsusun ra. ‘Is la pō la rak ‘e ‘os la sạkior se iris hensạsiạg ma‘at fak‘ata ‘e ‘oris a‘sokoag ne ‘oris garue marag ta. (‘Io se filo‘ ta “Maintain Your Zeal for the Ministry,” ‘e Watchtower, 15 Fepueri, 2015, pärakraf tä ‘on folu ‘e fȧn ne filo‘ mea‘mea‘ he ta “Help Less Experienced Ones.”) Ka ‘es‘ao tese ta ‘äe pō ‘e ‘ou garue ag‘esea ma ‘iris ‘i ‘e garue marag ta?

Ka tei ka ‘äe la ‘ih ta sạsiạg potsusun het la garue ma ‘äe ‘e garue marag ta? Kepoi ka sạsig ta ‘on la‘la‘o a‘noa kop ma ‘äe la pō la a‘sok ta ‘ou rak Puk Ha‘ het ‘e ‘on hanue ta. Vạhiạg ne rak ta, far‘ȧk la sạsig ta la ‘eakia tē ne iạ räe ma la nā muạ‘ạkiạg.

Nā ‘Ou Ava la Tēag‘esea ma Irisa: Hại‘ineag a‘lelei ma iris ‘e ‘ou la tēag‘esea ma irisa. ‘Ih ta le‘et ‘e irisa se ‘ou titi‘ȧk ne kạunohoga ma hạifäegag ma iạ. Kepoi ka ‘on la‘la‘o a‘noa, ka tei ka la pō la a‘sok sin titi‘ȧk ne kạunohoga ‘e ‘on hanue ta? Sạio‘ la ‘inea ne iạ pō tapen aier ta. Ka ạlạlum‘ạkiạg tese tä iạ agtạu ma? Ka fup tese tä iạ pō ma räe? Ka ‘oaf‘oaf tese tä iạ pō ‘e ‘on agag se Jihova?

Hại‘ineag a‘lelei ma irisa ma ‘os pa ‘ese se irisa la aroag‘esea. La fak se ‘is ‘atakoa, iris hensạsiạg ma‘at fak‘ata ‘oris pō tē fakkeres ‘e garue marag ta tūtū. (Roma 12:6-8) Iris ‘on rereag kop ma mafuạ‘ia, ma kop ma av ne iris la tēag‘esea ma ‘isa täla mea‘mea‘ia. Kat a‘raruạ‘ȧk ra ne ‘is la pō la rak tē ma‘oi ‘e hensạsiạg ma‘at fak‘at ‘i ‘e ‘oris agag se Jihova ‘e huạg aire.